Përkujtimore për Kryetarin e Kosovës, Dr Ibrahim Rugova në Egjipt

Kairo (Egjipt), 26 janar 2006 / TN Prof. Dr. Beqir Ismaili

Më dt. 25 janar, zyra e agjencisë informative ‘Albapress”, nën drejtimin e Prof. Beqir Ismaili, mbajti në Kairo të Egjiptit, një mbledhje përkujtimore për të nderuar jetën dhe veprën e Kryetarit të Kosovës, Dr Ibrahim Rugova, i cili u nda nga jeta disa ditë më parë. Në mbledhje, pjesëmarrësit shqiptarë të diasporës dhe personalitete të kulturës vendas, miq dhe dashamirës të Kosovës dhe të agjencisë “Albapress” në Kairo, vlerësuan jetën dhe veprën e Kryetarit Rugova, personalitetin e tij, figurën e tij të njohur në përpjekjet e popullit të tij, për lirinë, pavarësinë dhe zhvillimet demokratike në Kosovë si dhe ndihmesën e tij në krijimin e një vizioni bashkëkohor, të lëvizjes demokratike të Kosovës, në arenën ndërkombëtare.

Për nder të punës, jetës dhe veprës së tij përkushtuese, pjesëmarrësit mbajtën një minutë heshtje.
Ndjenja të veçanta afërsie dhe simpatie, u shprehën për familjen e të ndjerit Kryetar, për gruan dhe fëmijët e tij.

Ndjenjat më të sinqerta të simpatisë, solidaritetit dhe ngushëllimet më të përzemërta, i shprehën ata edhe drejtuesve të Parlamentit dhe të të gjitha institucioneve të Kosovës, me shpresë dhe bindje se do të vazhdohet të ecet në rrugën dhe shembullin frymëzues të Kryetarit Rugova.

I paharruar kujtimi dhe vepra e tij përkushtuese për Kosovën!