Në lamtumirën e fundit për Presidentin Rugova morën pjesë rreth 40 delegacione të huaja

Në lamtumirën e fundit për Presidentin Rugova morën pjesë rreth 40 delegacione të huaja

Prishtinë, 26 janar 2006 /TN /QIK - Në ceremoninë mortore të Presidentit Rugova morën pjesë rreth 40 delegacione të larta shtetërore nga Shtetet e Bashkuara të Amerikës, Evropa dhe rajoni dhe të institucioneve të ndryshme ndërkombëtare.
Në delegacionin e SHBA-ve, i cili udhëhiqej nga Alfonso Xhekson, ministër i ndërtimit urban, morën pjesë edhe Frenk Uisner, përfaqësues special i sekretarit amerikan të shtetit për bisedime për statusin dhe Filip Goldberg, shef i Zyrës Amerikane në Kosovë. Nga SHBA mori pjesë edhe kongresmeni Eliot Engël, një mik i presidentit Rugova që prej vitit 1990.
Në delegacionin e Bashkimit Evropian, i cili udhëhiqej nga shefi për politikë të jashtme e siguri, Havier Solana, ishte edhe komisionari për zgjerim, Oli Ren, ndërsa Parlamentin Evropian e përfaqësoi evroparlamentarja Doris Pak.
Në përbërje të delegacionit të NATO s, të cilin e kryesoi, Admirali Ulrih, komandant i Aleancës për Krahun Jugor, ishin edhe ndihmës sekretari i përgjithshëm për çështje politike, Martin Erdman.
Delegacionin e Gjermanisë e kryesoi ministri i punëve të jashtme, Frank Valter Shtajnmajer, Belgjikën - ministri i punëve të jashtme, Karl de Guht, ndërsa Zvicrën - ministrja e punëve të jashtme Mishlin Kalmi Rej. Austrinë e përfaqësoi ministrja e punëve të jashtme Ursula Plasnik, ndërsa në përbërje të delegacionit ishin edhe Erhad Busek, kordinator i Paktit të Stabilitetit për Evropën Juglindore dhe Albert Rohan, zëvendësi i kryenegociatorit ndërkombëtar për Kosovën.
Në ceremoninë mortore të Presidentit Rugova morën pjesë edhe krenegociatori ndërkombëtar për bisedimet për statusin e Kosovës, Marti Ahtisari, kryeadministratori i parë i Kosovës, Bernar Kushner, i cili mori pjesë në përbërjen e delegacionit shtetëror të Francës, dhe ish-kryeadministratori gjerman, Mihail Shtajner.
Në ceremoninë mortore të Presidentit Rugova morën pjesë edhe kryeministri i Luksemburgut, Zhan Klod Junker dhe ministri i jashtëm, Zhan Aselborn, ndërsa qeverinë e Suedisë e përfaqësoi ministrja e donacioneve, Karin Jemtinë.
Në ceremoni morën pjesë edhe delegacionet shtetërore të Italisë, Britanisë së Madhe, Francës, Rusisë, Japonisë, Turqisë, Hungarisë, Rumanisë dhe Greqisë.
Nga vendet e rajonit, në ceremoni morën pjesë: delegacioni i Sllovenisë, i kryesuar nga Presidenti Janez Dërnovshek, delegacioni i Kroacisë, i udhëhequr nga Presidenti Stipe Mesiq, delegacioni i Maqedonisë i kryesuar nga Presidenti Branko Cervenkovski, në të cilin gjendeshin edhe zëvendës-kryeministri Musa Xhaferi dhe liderët e dy partive më të mëdha politike shqiptare, Ali Ahmeti (BDI) e Arbër Xhaferi (PDSH).

Delegacioni shumanëtarësh i Shqipërisë, të udhëhequr nga Presidenti Alfred Moisiu, ishin edhe kryeministri Sali Berisha, kryetarja e parlamentit Jozefina Topalli, si edhe disa ministra, kryetarë të grupeve parlamentare e drejtues të partive më të mëdha politike.
Në ceremoni mori pjesë edhe një delegacion i Selisë së Shenjtë, i kryesuar nga Kryeipeshkvi Pier Luigi Celata, nga Këshilli Pontifikal për Dialog Ndërfetar, si edhe Kryegjyshata botërore e bektashinjve, me seli në Tiranë.