Në Gjermani varrimi i Presidentit Rugova u ndoq me vemendje të madhe

Në Gjermani varrimi i Presidentit Rugova u ndoq me vemendje të madhe

Rottweil/Gjermani, 26 janar 2006 /TN /QIK (Ç. Bytyçi) - Sot pjesa më e madhe e bashkatdhetarëve tanë në Gjermani pothuajse nuk punuan fare. Që herët me punëdhënësit e tyre u dakorduan që këtë ditë ta rezervojnë për të qenë pranë ekraneve televizive, përmes të cilave ndoqën transmetimin e drejtëpërdrejtë të varrimit të Presidentit të Kosovës Dr. Ibrahim Rugova.

U mblodhën familjet, shokët, miqtë e farefisi në shtëpi banimi e në lokalet e klubeve e asociacioneve shqiptare dhe ndoqën sëbashku këtë ngjarje që i pikëlloi të gjithë. Me zemra të thyera e me lot në sy, iu bashkangjiten kështu bashkatdhetarët tanë në Gjermani, nderimeve që iu bënë në kryeqytetin e Kosovës kryetarit të parë të Kosovës, mjeshtrit të letrave shqipe, politikanit dhe luftëtarit konsekuent për pavarësinë e Kosovës.
I shprehnin njëri tjetrit ngushëllime për humbjen e njeritu të dashur, të respektuar nga bashkësia botërore por dhe njëkohësisht shprehnin krenarinë dhe trimëroheshin për faktin se në Prishtinë, në këtë ditë të pikëllimit e zemrave të lënduara, u tubuan qindra delegacione e burrështetas të niveleve më të larta shtetrore e ndërkombëtare për të nderuar Kryetarin Rugova.

Gjithkush, mbante shpresën se edhe në këtë rast u manifestua një mbështetje e fuqishme për rrugën e sigurtë të Kosovës së pavarur nga nivelet e ndryshme të vendosjes. Natyrisht u forcua kështu besimi për unitetin e vendosur dhe pathyeshmërinë e subjekteve politike shqiptare për të vazhduar me këmbëngulësi rrugën për pavarësi e inkuadrim të Kosovës në familjen e madhe Evropiane dhe strukturat verioantlantike.
Ja se çfarë thanë disa nga bashkatdhetarët tanë për këtë ditë të pikëllimit të veçantë:

Adem Dodolli, verpimtar, Oberndorf: "Dr. Rugova është dhe do të mbetet gjithmonë sinonim i pavarësisë së Kosovës. Ai ka ditur me mençuri të sublimojë kërkesën e popullit për Kosovën sovrane të cilës ia kushtoi tërë jetën.

Edhe në ditën e fundit, pra në ditën e varrimit të tij, e luajti rolin e madh sepse në Prishtinë në nderim të tij dhe verpimtarisë e përkushtueshmërisë për çështjen madhore të Kosovës, u tubuan politikan e diplomat nga gjithë bota, fjala e të cilëve çmohet dhe respektohet për ardhmërinë e Kosovës. Ardhja e tyre në Prishtinë ishte shenjë e shprehjes së ngushllimit të sinqertë popullit të Kosovës por edhe porosi shpresëdhënëse për zgjidhjen e afërt të statuist final të Kosovës të cilit iu përkushtua Dr. Ibrahim Rugova".
Mark Kristaj, Rottweil: "Edhe pse jemi me zemra të lënduara dhe të pikëlluar për vdekjen e Kryetarit Rugova, jemi krenar që në këtë ditë, sa pamë përmes ekraneve televizive, në Kosovë u dëshmua një organizim i nivelit më të lartë shtetror ku çdo gjë funksiononte e programuar dhe me seriozitetin më të madh.

Trupat Mbrojtëse të Kosovës, shërbimi policor, njerëzit e tubuar, protokoli dhe të gjitha të tjerat ishin në nivelin më të lartë. U dëshmua se në Kosovë veprojnë ligjet kurse njerëzit e Kosovës edhe në ditët më të vështira si kjo dinë të organizohen dhe tregojnë botës se kosovarët i përkasin popujve tejet të civilizuar e me kulturë të lartë. Ndërkaq, Dr. Ibrahim Rugova, mbetet përgjithmonë në zemrat e njerëzve të civilizuar të cilët do të shpiejnë përpara përcaktimet për Kosovën e pavarur".
Nuridin Gashi, Rottweil: "Kryetari Rugova ishte një si profet dhe me urtësinë e mençurinë e tij luajti rol të rëndësishëm në historinë e Kosovës. Ai do të mbetet i njohur si Gandi i madh i Kosovës. Ndërkaq, ceremonia e varrimit të tij është dëshmi e funksionimit të mirëfilltë të institucioneve shtetrore.

A nuk ishte ky, edhe pse mortor, edhe më shumë se manifestim i sendërtimit të standardeve për Kosovën. Botës, e veçmas atyre që ishin të pranishëm, iu është mëse e çartë se Kosova, njerëzit e saj të civilizuar, e meritojnë pavarësinë e plotë, për të cilën Kryetari Rugova u angazhua deri në ditën e fundit të jetës".
Në Gjermani, përndryshe që nga kumtimi i lajmit të hidhur për vdekjen e Dr. Ibrahim Rugova, u organizuan një serë tubimesh komemorative nga bashkatdhetarët në qytete të ndryshme, në klube e shoqata shqiptare. Tubime në shenjë të përkujtimit të Kryetarit Rugova dhe nderimit të angazhimit të tij, sakrificës dhe veprës madhore për Kosovën, lirinë dhe pavarësinë e saj, paralajmërohet se do të organizohen edhe ditëve të ardhshme në shumë mjedise e qytete ku jetojnë bashkatdhetarët tanë.