Daci dhe Kosumi pritën delegacionin e Gjermanisë që mori pjesë në varrimin e Presidentit Rugova

Daci dhe Kosumi pritën delegacionin e Gjermanisë që mori pjesë në varrimin e Presidentit Rugova

Prishtinë 26 janar 2006 /TN /QIK - Kryeparlamentari Nexhat Daci dhe Kryeministri Bajram Kosumi priten delegacionin e Gjermanisë që kryesohej nga ministri i Punëve të Jashtme, Frank-Valter Shtajnnmajer, që mori pjesë në varrimin e Presidentit Rugova.
Kryeparlamentari Daci u tha anëtarëve të këtij delegacioni se dinjiteti i qytetarëve në këto ditë pikëllimi e nderimi për Presidentin Rugova është një manifestim i referendumit të llojit të veçantë, në frymë të përkrahjes së projektit për Kosovën, që kishte Presidenti.

Në të gjitha ceremonitë e homazheve është treguar shkallë e lartë edhe e unitetit institucional. Daci falënderoi delegacionin gjerman që gjeti kohë që të jetë bashkë me popullin e Kosovës në këto ditë të rënda të zisë dhe theksoi kontributin e Gjermanisë në rrjedhat e bashkëpunimit me Kosovën, e në këtë vështrim përmendi ndihmën aq të çmuar që japin ushtarët gjermanë në kuadër të KFOR-it në Kosovë, si dhe Zyra Gjermane.
Në anën tjetër, Shtajnmajer theksoi se Presidenti Ibrahim Rugova ka qenë shumë i afërt me popullin gjerman, duke premtuar ndihmën e mëtejme të Gjermanisë në procesin e statusit final të Kosovës.
Këtë delegacion gjerman e priti edhe Kryeministri Kosumi i cili falënderoi ministrin Shajnmajer për pjesëmarrjen e tij në ceremoninë e varrimit të presidentit Rugova dhe ka shtuar se vdekja e presidentit Rugova nuk do të ndikojë në prishjen e unitetit të lidershipit kosovar. Kosumi ka precizuar se Delegacioni i Kosovës do të punojë për përmbylljen e procesit negociues dhe bërjen e shtetit të Kosovës gjatë vitit 2006.
Ndërkaq ministrin gjerman Steinmeier ka vlerësuar se ceremonia e varrimit të Presidentit ishte dinjitoze, ashtu siç e meritonte presidenti Ibrahim Rugova, duke shtuar se është inkurajuese që të gjithë liderët kosovarë janë shprehur se procesi negociues do të vazhdojë. Ai gjithashtu ka siguruar kryeministrin Kosumi se Gjermania do jap kontributin e saj në procesin negociues për krijimin e një Kosove multietnike dhe demokratike.