Zgjerohet lista e delegacioneve që marrin pjesë në ceremoninë mortore të Presidentit Rugova

Zgjerohet lista e delegacioneve që marrin pjesë në ceremoninë mortore të Presidentit Rugova



Prishtinë, 25 janar 2006 /TN /QIK – Lista e delegacioneve që do të marrin pjesë në ceremoninë mortore të Presidentit Dr. Ibrahim Rugova sa vjen e zgjerohet.

Gjatë ditës së djeshme është bërë e ditur se Gjermania, anëtare e Grupit të Kontaktit, do të dërgojë një delegacion, të kryesuar nga ministri i punëve të jashtme, Frank Valter Shtajnmajer.

Pjesëmarrjen e ka konfirmuar gjithashtu edhe ministri belg i punëve të jashtme, njëkohësisht kryesues i radhës i OSBE-së, Karl de Guht.

Nga Roma konfirmohet se do të vijë një delegacion, por nuk saktësohet ende se kush do t'i prijë delegacionit.
Tashmë dihet se një delegacion i madh nga Shqipëria, i udhëhequr nga Presidenti Moisiu dhe Kryeministri Berisha do të do të përfaqësojë Shqipërinë, pa llogaritur individë të shumtë që tashmë dihet se do të marrin pjesë individualisht.
Dje ka arritur dhe ka bërë homazhe për Presidentin Rugova, ish-kryeministri i Shqipërisë Fatos Nano, ndërkaq sot homazhe ka bërë një tjetër ish-kryeministë i këtij vendi - Ilir Meta.
Më herët është konfirmuar pjesëmarrja e shefit për politikë të jashtme dhe siguri të BE-së, Havier Solana, komisionarit për zgjerim i BE-s Oli Ren, krenegociatori ndërkombëtar për bisedimet për statusin, Marti Ahtisari.
Nga vendet e rajonit, ka paralajmëruar pjesëmarrjen kryetari i Sllovenisë, Janez Dërnovshek, i Kroacisë Stipe Mesiq, i Malit të Zi Milo Gjukanoviq, kryetari i Maqedonisë Branko Cervenkovski dhe kryeministri Vlado Buçkovski, liderët partiak shqiptar, Ali Ahmeti, BDI, Arber Xhaferi, PDSH, etj.
Zyra austriake ka bërë të ditur se këtë shtet e përfaqëson ministrja e punëve të jashtme Ursula Plasnik dhe në përbërje të delegacionit do të jenë e dhe Erhad Busek, kordinatori i Paktit të Stabilitetit për Evropën Juglindore dhe zëvendësi i kryenegociatorit ndërkombëtar për Kosovën, Albert Rohan.

Zvicrën do ta përfaqësojë ministrja e punëve të jashtme Mishlin Kalmi Rej, e mirënjohur për mbështetjen e hapur të pavarësisë së plotë të Kosovës.
Nga Zyra ndërlidhësue e Luksemburgut njoftohet për pjesëmarrjen e kryeministrit Zhan Klod Juncker dhe ministrit të jashtëm të këtij vendi, Zhan Aselborn. Ndërkaq, qeverinë holandeze do ta përfaqësojë Jan Lukas van Horn, drejtor për Evrpopën Juglindore dhe është paraparë edhe pjesëmarrja e ministrit të shtetit Van der Shtul.