Të bindur për profecinë e Presidentit Rugova qytetarët po tregojnë fuqishëm gjithë dashurinë për të

Të bindur për profecinë e Presidentit Rugova qytetarët po tregojnë fuqishëm gjithë dashurinë për të

Prishtinë, 25 janar 2006 /TN

Shkruan: Idriz MORINA

Prishtinë, 24 janar- Dhembja dhe tronditja për vdekjen e Presidentit Rugova, njeriut mitik dhe historik të Kosovës, po vazhdon të lëndojë pandalshëm zemrat e qytetarëve të Kosovës, por edhe gjithë shqiptarinë në botë. Këtë dhembje shumë nga shqiptarët po mundohen ta zbusin duke ngushëlluar vetvetven dhe familjen Rugova me homazhet që po i bëjnë para trupit, të cilësuar shumë prej tyre si një shenjtë, Presidentin Rugova.

Si në gjithë jetën politike të Presidentit Rugova në 16 vjetët e fundit, që ishin treguar, të bindur për udhëheqësin dhe njeriun e tyre të dashur, të cilit me plotë besnikëri ia kishin dorëzuar dhe falur besimin e tyre që t’i udhëhiqte së pari në betejën tepër të vështirë për ta sfiduar politikën e presidentit Rugova.

Të bindur për profecinë e tij, pavarësimin e Kosovës duke ruajtuar substancën njerëzore, ata sot po ritregojnë edhe më zëshëm dhe më fuqishëm gjithë dashurinë, por edhe po qajnë për jetën e tij të shkurtër dhe vetminë e tyre. Shumë nga pjesëmarrësit, veçmas ata të moshave më të pjekura që bashkëjetuan me udhëheqjen e tij, dhe gëzuan mbrojtjen e tij, janë më të papërmbajtur në shfaqjen e emocioneve pikëlluese.

Edhe sot, homazhet kanë filluar rreth orës 9.00 të mëngjesit në hollin e Kuvendit të Kosovës, ku ka qëndruar trupi i Presidentit Rugova më shumë se 24 orë, i rrethuar nga 4 roje nderi të TMK-së, ndërsa i pari e ka nderuar sot kryekuvendari Daci dhe Kryesia e Kuvendit.

Më pas është nderuar me homazhe nga kryetari i PDK-së Hashim Thaçi, zyrtarë të partisë ORA si dhe personalitete tjera të jetës politike vendore dhe ndërkombëtare. Nuk kanë munguar sot as kurora lulesh nga udhëheqës të lartë. Sot, ato i ka ofruar gjatë ditës stafi i UNMIK-ut, njërën në emër të Sekretarit të Përgjithshëm të Kombeve të Bashkuara Kofi Anan dhe tjetrën nga kryeadministratori Petersen.

Po ashtu në grupe të organizuara kanë bërë homazhe delegacione nga kuvendet e komunave të ndryshme, përfaqësues fetar, pjesëtarë të ShPK-së, punëtorë shëndetësor, të arsimit, por edhe minatorë, sportistë etj. Nderime para trupi bënë bënë edhe udhëheqës dhe punëtorë të organizatave të ndryshme vendore, të jashtme dhe ndërkombëtare, në mesin e të cilave ata të konfederatës së Sindikatave të Shqipërisë, të AKM-së etj.

Shumë nga nëpunësit e përfaqësive diplomatike dhe zyrtarë të administratës pas homazheve para trupit të Presidentit Rugova, janë ngjitur deri në katin e parë të ndërtëses ku gjendet administrata e Presidencës, ku shumë nga zyrtarët e lartë ndërkombëtarë i ka pritur Presidenti Rugova gjatë katër vjetëve të udhëheqjes. Në hollin e saj, ata nënshkrueheshin në librin e zisë, rreth së cilës janë vendosur kurora lulesh, ndërsa anash bënë roje nderi poashtu Garda Ceremoniale e TMK-së.

Askush sot sikurse edhe dje nuk ka bërë një numërim të atyre që kanë nderuar me homazhe presidentin Rugova, por besohet se nëse përllogaritet përfaërsisht numri edhe i atyre që kanë bërë ngushëllime në rezidencën e Presidentit Rugova në Velani, besohet të ketë arritur në rreth 200 mijë. Që të gjithë këta janë treguar të heshtje dhe durim plotë ashtu siç i ka edukuar prijësi i tyre, i mbiquajtur edhe baba edhe arkitekt i pavarësisë së Kosovës.

Jahja Leka, së bashku me vëllaun Ruzhdiun dhe nipin e tij nga Gjilani, që sapo arritën në fundin e kolonës të gjatë disa qindra, që gjendej tek ministria e Kulturës, kishte ardhur nga Gjermania të marrë pjesë në varrimin e presidentit.

“Unë kam ardhur nga Gjermania të marrë pjesë në varrimin e presidentit Rugova. Unë mendoj se vendin e tij është tepër vështirë ta zë dikush, na kemi shqiptarë bollë të zot, por veprën e tij nuk mund ta bëjë kush. E ka njohur krejt botën me Kosovën. Por, prej perëndisë s’kemi ku shkojmë”, thotë ai.

“Dhimbja ime është sikur e të gjithë qytetarëve të Kosovës, kemi humbur një njeri të madhë, që gjatë gjithë jetës së vet ia ka kushtuar çështjes kombëtare shqiptare, iu shpreh ngushëllime personale. Veç amanetin e tij ta çojmë në vend, ne tash populli institucionet”, thotë Naime Gashi rreth të 40-ve, nga Prishtina.

“Kam ndjenja shumë të këçija, dhe i ngushëllojë gjithë Prishtinën, Kosovën dhe gjithësesi familjen Rugova”, thotë me një gojë Rona në klasën e gjashtë nga Prishtina së bashku me dy shoqet tjera, njëra në klasën e shtatë dhe tjetra në të tetën.

“Ne e dimë pse kemi ardhur, është dhimbja e fortë për vdekjen e presidentit Rugova”, thotë Ruzhdi Kadriu (39), nga fshati Slivovë i Ferizajit, aktualisht i papunë, që kishte ardhur tri orë më parë, që gjendej diku pëtej mesit të kolonës, dhe së paku edhe një orë i duhej të priste për t’i ardhur radha për ta nderuar presidentin Rugova.

“S’ka qysh ma keq, qysh ma vështirë më rëndë për mua personalisht dhe për të gjithë popullin. Dihet, humbje e madhe, dhembje e madhe fortë është, nuk kemi çka t’i bëjmë. Vdekja është e domosdoshme për secilin, duhet të pajtohemi edhe me këtë”, thotë minatori rreth të 60-ve prej Veçuku të Vushtrrisë që po priste nga ora 9.00 e mëngjesit dhe të paktën edhe gjysmë ore do të kalonte në radhë duke kaluar gjashtë orë pritje pa u mërzitur.“S’ka më keq është shumë tragjike, për të gjithë popullin shqiptarë”, tha një tjetër afër të parit.

“Ai është një lider që gjithë bota e ka njohur, jo vetëm Kosova, prandaj është i pazëvendësueshëm, e për këtë tri ditë katër duhet me pritë në rend, e t’i bëhen homazhet një lideri që veç pas një mijë vjetsh mund të lind një lider sikur ky”, thotë Haqif Sahiqi. “Jam duke pritur qe pesë orë”, thotë Haqifi që është një arsimtar nga fshati Pojadishtë i Ferizajit.

“Vdekjen e kam përjetuar shumë keq, për Kosovën është diçka shumë e keqe për Kosovën, është i pazëvendësueshëm, me punën e tij kush nuk mund të matet. Kështu që i pushoftë shpirti në paqe”, thotë Bujar Asllani (20) nga fshati Gjinoc i komuns së Suharekës, që duket se punon në një firmë ndërtimore.

Ndërsa, sot në shumë pika gjithë atyre që pritnin u shërbehej çaj i ngrohtë dhe poashtu shumë nga të ardhurit ishin veshur shuëm më mirë për të përballuar të ftohtin tepër të madhë.

Enver Abazi, mjek në njërën nga katër ambulantat lëvizëse, prej gjithësejt gjashtëve, dy nga të cilat statike, thotë se deri në ora 13.30 kanë kërkuar ndihmë mjekësore 44 veta. Ai thotë se që të gjithë kanë pasur hipotermi, pavarësisht prej moshës së tyre që ishin “nga 15 vjet deri në mosha të shtyer”. Njëri nga të cilët ka pasur nevojë për shtrim në spital. Nga ato ambulanta ata transportoheshin në dy qendrat e mjekësisë familjare për trajtim më adekuat.

Poashtu vazhdojnë të jenë tejet impresive edhe reagimet e qytetarëve shqipatrë, por edhe të tjerëve, në librat e zitë në internet, por edhe në komentet e lexuesve në shumë faqe interneti. Njëri nga ta thotë se
Presidenti Rugova është legjendar dhe i ka tejkaluar kufijtë shqiptarë.

“Ai është legjenda e kombit shqiptar, lideri i parë antikomunist në të gjithë Evropën Juglindore. Vdekja e tij është një humbje e madhe për të gjithë kombin shqiptar, Ballkanin, Evropën dhe tërë liridashësit në botë.
Zoti e bekoftë presidentit tonë legjendar Ibrahim Rugova!”, Emanuel Bajra, Londër, Angli. Ndërsa një tjetër, është poashtu interesan:"Rugova u largua fizikisht në një moment kur e la Kosovën në embrion të
pavarësisë,"- shkruan Mustafë Ismaili nga Toronto e Kanadasë.

Shumica e tyre shprehin dhembjen e papërballueshme për një zi, që mbisundohet nga frika për ardhmërinë dhe pasigurinë që ka krijuar në rrugën aq të sigurtë për pavarësinë të ndërtuar nga Presidenti Rugova.