Shqiptarët po tregojnë pashkëputshmërinë e fatit të tyre me liderin shpirtëror, presidentin Rugova

Shqiptarët po tregojnë pashkëputshmërinë e fatit të tyre me liderin shpirtëror, presidentin Rugova

Prishtinë, 25 janar 2006 /TN / Idriz MORINA - Sot ishte dita më e prekshme, që prej çastit kur u dha lajmi i zi për vdekjen e presidentit Rugova. Ditët tjera dukeshin sikur ende presidenti është këtu, është i gjallë, se ende është në mesin tonë.

Dhe afrimi i çastit për ndarjen përgjithnjë nga kontakti fizik me botën, ka rikthyer emocionet e fuqishme të dhembjes së pangushëllimtë, tek qytetarët-adhuruesit dhe mbështetësit e tij, miqtë dhe bashkëpunëtorët deri tek më të ngushtit, dhe veçmas tek Familja Rugova kur është ngushëlluar sot sërish nga ekipi mjekësor amerikan nga baza në Landshtul të Gjermanisë, të cilët që nga zbulimi i sëmundjes vdekjeprurëse të Presidentit, të cilët kanë bërë të pamundurën për mbrojtjen nga vdekja të presidentit Rugova.

Guillermo Telez, nënkolonel, kirurg, Joseph Flynn, major, onkolog dhe Kenny Davis, kapiten, teknik, të cilët kishin ardhur shpesh në rezidencën në Velani gjatë pesë muajve të kaluara për ta shpëtuar Presidentin dhe Kosovën nga kobi që po e gëlltet. Tellez, Flin e Davis ishin edhe në fundin tragjik.

Më shumë se 400 mijë veta i kanë bërë deri më sot homazhe presidentit të Kosovës Dr.Ibrahim Rugova, në shenjë identifikimi me vullnetin e ikonës së tyre historike. Numri i atyre që kanë bërë dhe po bëjnë homazhe sot, deri në orët e pasdites do të kenë qenë të paktën njëqindmijë veta, bazuar në numrin sot më të madhë dhe më të gjatë të rreshtave që në orët e mëngjesit, dhe se homazhet sot kanë filluar më herët.

Hapjen zyrtare të homazheve nga kryekuvendari Daci, e ka pasuar gjatë mesditës, presidenti i Shqipërisë Alfred Moisiu, kryeministri Sali Berisha, kryekuvendarja Jozefina Topalli me anëtarë të tjerë të delegacionit, të cilët kanë thyer protokollin shtetëror, duke e lënë vendin pa asnjërin nga krerët e shtetit, për t’iu gjetur afër familjes Rugova dhe për ta ngushëlluar Kosovën me garancione se do të realizohet amaneti dhe ëndrra e Presidentit Rugova.

Veç këtij delegacioni të lartë shtetëror, po vazhdojnë të bëjnë homazhe delegacione të shumta vendore, si ai i Brigadës 138 “Agim Ramdani”, të prirë nga ish-Komnadanti Rrustem Berisha, Hysen Berisha dhe Musa Gjakova, të uniformuar, si dhe delegacioneve ndërkombëtare përfshirë të ish udhëheqësve të lartë në Kosovë, si kryeadministratorit Mihael Shtajner, dhe pasdite të delegacioneve të larta shtetërore, të BE-së, të NATO-s etj.

Ndërsa, për pjesëmarrje në varrim kanë konfirmuar ardhjen delegacioni presidencial amerikan i kryesuar nga z.Alphonso Jackson, Sekretar për Banim dhe Zhvillim Urban, nga NATO-ja admirali Ulrich, komandant i Aleancës për Krahun Jugor të Aleancës, presidenti i Sllovenisë, Kroacisë, Maqedonisë. Pastaj delegacionet nga Gjermania, Zvicra dhe Austria Britania, Franca, Turqia, Hungaria, Rumania, që do të përfaqësohen në nivel ministrash.

Poashtu edhe një delegacion nga Vatikani, i kryesuar nga Kryeipeshkvi Pier Luigi Celata. Mesazhet e të gjithëve përmbushin shpresën se me veprën e vet Presidenti Rugova e ka lënë Kosovën në agun e pavarësisë dhe sfidat janë thyer nga Ai. Ndërsa, kulmimi i projektit, ndërtimit të shtetësisë, është vetëm një rend që kërkon vazhdimin e rrugës së tij deri në atë që ai kërkonte, “njohjen sa më të shpejtë edhe formale të pavarësisë së Kosovës”.

Të gjithë ata që sot kishin ardhur për homazhe, qoftë nga Prishtina, apo anembanë skajeve të Kosovës, nga fshatrat më malore e më të mbyllta për rrugëtim, si dhe nga trevat shqiptare të Kosovës Lindore, Maqedonisë, Mal të Zi, por edhe nga Shqipëria, dhe vendet perëndimore, që sot janë ngutur të arrijnë kryesisht me aeroplan, dukej se donin të plotësosnin imazhin e pavdekësisë së Presidentit Rugova.

Njëkohësisht sikur duan të krijojnë përmbushjen e imazhit të pavarësisë dhe njëkohësisht sikur betohen para Presidentit, se kompromis për pavarësinë nuk

do të ketë. Në mbrojtje të kësaj thirrje të Tij, jemi të gatshëm! Është mesazhi që duket se mund të shkëputësh nga thirrjet e dhjetëra mijëra shqiptarëve, pleq, burra, gra e fëmijë, të cilët sot edhe dielli i ngrohte sëbashku me çajin që e shpërndanin zemrat e mira, nga shoqatat “Nëna Terezë” dhe “Gratë për gratë”.

“Ishte njeri i kompromiseve dhe njeri që dinte të falë, vetëm që Kosova të vazhdojë drejt lirisë, pavarësisë dhe demokracisë”, thotë Agimi, një i ri, që beson se përkulja ndaj presidentit Rugova do të vazhdojë me breza e breza.

“Vetëm që na vjen shumë keq që tash kur jemi aq afër realizimit të qëllimit tonë shekullor Presidenti Rugova na iku dhe nuk do të jetë aty edhe fizikisht për ta nënshkruar realizimin e ëndrrës së tij e për të festuar së bashku me ne e për të përkujtuar me lot në sy ata që dhanë jetën për atë ditë, edhe pse e dijmë se shpirti i tij do të jete atë ditë me neve për të na bekuar si gjithnjë”, thotë Besa, një studente, që ka pushuar së lexuari libra këto ditë zie.

“Sot, Dardania humbi birin më të mirë të saj! Sot, humbëm Ambasadorin më të madh të identitetit dhe të qëllimeve tona madhore, humbëm udhëheqësin historik të Dardanisë, Babain tonë të Kombit!”, thotë Artani, duke të përkujtuar presidentin Rugova me terminologjinë e tij.

“Unë personalisht dhe familja ime nuk po mundem me u pajtuar me fatin e natyrës, se si na e muar aq herët Presidentin e parë të Pavarësisë së Kosovës”, thotë Nderimi, duke shprehur përjetimin më të rëndë të pamundësisë së ballafaqimit me rendin natyror.

Qytetarët shqiptarë, po tregojnë kështu pashkëputshmërinë e tyre me liderin shpirtëror presidentin Rugova, frymën e tij, se pavarësia është e pashmangshme! Kulti për presidentin Rugova është indetifikimi me pavarësinë, fatin e përbashkët!