Nju Jork (ShBA): Presidenti Rugova kishte një ëndërr…

Nju Jork (ShBA): Presidenti Rugova kishte një ëndërr…

25 janar 2006 /TN

- Shqiptaro-Amerikanet ngushëlluan dhe u lutën për shpirtin e presidentit Rugova

Nga Dalip Greca-Nju Jork

Shqiptaro-Amerikanët në Nju Jork, u mblodhën në Shtëpinë e Lidhjes Demokratke në Bronx-NYdhe ngushëlluan e u lutën për shpirtin e Presidentit te Kosoves. Lajmi i hidhur i ka tronditur të gjithë dhe ata njëri pas tjetrit hyjnë kokëulur, ndalen prane portretit të Presidentit të rrethuar me shiritin e zi dhe ngushëllojnë kryesinë e LDK-së për Amerikën, natyrisht që ngushëllojnë dhe njeri-tjetrin.

Një varg i gjatë i kryesisë dhe anëtarësisë se Lidhjes Demokratike për Amerikën, janë rreshtuar ne hyrje dhe presin ngushëllimet krye ulur nga dhimbja. Ne krye, kryetari i LDK-se per Ameriken Agim Rexha. Atij i duhet që shpesh herë të dalë e të presë të sapoardhurit që vijnë pa pushim. Secilit ia kthen ngushëllimin me fjalë dhimbjeje:

- Pikëllimi, tronditja e dhembja për humbjen e tij na goditën thellë, sepse me humbjen e Presidentit të Pavarësisë, të personalitetit të përmasave të mëdha.

Kosova humbi njeriun dhe udhëheqësin, i cili, me frymën e mendimit e të veprimit të tij integrues, me këmbënguljen e qëndresën e pashembullt, me guximin e vizionin e atdhetarit të pashoq, nuk u ndal asnjëherë në përpjekjet e tij për realizimin e pavarësisë, të demokracisë e të sovranitetit të Kosovës.

Vepra e tij është e përmasave të mëdha. Atë do ta vlerësojë koha.

Mendoj se mbetet presidenti i parë historik i Kosovës . Ai u nda nga jeta, por ne kemi ëndrrën e tij, kemi pavarësinë që presim ta konfirmojmë. Për këtë duhet të punojmë të gjithë, ndryshe shkelim amanetin e presidentit, tha për Illyria-n, kryetari Rexha..

Kryetari i Vatrës, inxh Agim Karagjozi, ka ardhur të ngushëlloi. Ai është takuar shumë herë me presidentin Rugova dhe e çmon lart figurën e tij të pazëvendësueshme.

- Kosova humbi njeriun e saj më të madh. Humbi liderin historik, arkitektin e pavarësisë, thotë ndërsa ngushëllon të pranishmit dhe më pas shton:- Zoti u dhëntë mend shqiptarëve, na dhëntë mend të gjithëve që ta çojmë në vend amanetin e tij, Pavarësinë.

…Ndërkohë që telfoni i kryetarit Agim Rexha nuk pushon së tingëlluari:

-Ngushëllime, flasim nga Chikago, flasim nga Michigani, marrim nga Florida...Po telefonojmë nga Arizona…Ishte humbje e madhe!- flas nga Kanadaja…Flas nga Gjermania, nga Zvicra…

- Kur do të niseni për në Kosovë, a mund të bashkohemi me delegacionin tuaj që të udhëtojmë së bashku për në Prishtinë?

Sakaq atij i duhet që të afrohet dhe të presë ngushëllimet. Është një ditë e pikëlluar, ditë morti. Poetit Mëhill Velaj, që ka udhëtuar nga Stamford, i lexohet pikëllimi në sy:-Ngushëllime kryetar! Është ditë morti për të gjithë shqiptarët.

Rrallë i kanë ardhë burra si Rugova në këta 200 vjetët e fundit Kombit shqiptar… Ndërsa Ish kryetari i LDK-së për trishtetshin, Marjan Cubi, që e ka udhëhequr në ditë të vështira LDK-në dhe që ka bashkëpunuar për një kohë të gjatë me presidentin Rugova, që i qëndroi kauzës së presidentit edhe në ditët më dramatike,e përjeton humbjen e madhe që ka pësuar kombi shqiptar, e në mënyrë të veçantë Kosova:-Dhimbja nuk i len fjalët që të shprehin atë ç’ka ndjen zemra dhe shpirti që vuan….

Lekë Gojcaj, ka qenë ndër të parët që ka ardhur këtu sapo ka marrë lajmin e hidhur. Ai e ka pas mik presidentin Rugova dhe siç e ka ndjerë veten të lumtur e krenar kur e takonte këtu në Amerikë apo edhe atje në Kosovë, ku pat shkuar shpesh me ftesë të presidentit, po ashtu sot ndjen dhimbjen e thellë.

- Ai nuk ishte njeri i zakonshëm. Njerëz të tillë Zoti ia dërgon rrallë një kombi, siç na pat dërguar Gjergj Kastriotin, siç na pat dërguar Nënën Terezë! Pah, kjo është dhimbje që nuk na e mban zemra, thotë Leka dhe shton:Dashtë Zoti, që punët e mëdha të kombit tonë të ecin sipas ëndrrës së dr. Ibrahim Rugovës! Që më 1989 , kur e takova për të parën herë, në seminarin kushtuar Pjetër Bogdanit, për të cilin ai kishte mbrojtur dhe doktoraturën, unë e ndjeva se ai ishte njeri i madh dhe do t’i printe me urtësi Kosovës-thotë Leka.

- Hajdar Bajraktari, tek shpreh ngushëllimet për presidentin, thotë se vdekja e tij ishte një humbje tepër e madhe në këto çaste. Kosova humbi arkitektin e pavarësisë, njeriun që ktheu drejt Kosovës fytyrën dhe kujdesin e botës perëndimore, përkujdesjen e Amerikës. E kemi takuar shpesh herë në Kosovë dhe këtu në Amerikë, ai i ka mbushë mendjen amerikanëve se është njeriu i përshtatshëm për ta çuar Kosovën përpara. Sa herë e kemi takuar me kongresistin Engel, ai ndjehej i çliruar nga biseda pasi i përcillte mesazhet e Kosovës me një kthjelltësi të plotë.

- Musli Mulosmani, në ngushëllimin e tij, shpreh respektin e madh për presidentin Rugova, të cilin e konsideron si një figurë të lartë kombëtare, që diti ta çonte Kosovën drejt ëndrrës së Pavarësisë. Kam pasur rast që më ka pritur në zyrën e vet në Prishtinë, ndërsa disa herë e kemi takuar edhe këtu, ai mbetet një udhëheqës i rrallë i kombit tonë të vuajtur.Dua t’i dërgoj ngushëllimet e përzemërta familjes së Dr. Rugovës, thotë ai për Illyria-n.

Deputetja e Kosovës, Sanije tek ngushëllon thotë se të gjithë duhet të jemi bashkë për të realizuar atë që ndërtoi dr.Rugova, presidenti i parë i Kosvës. Ëndërra e presidentit duhet realizuar me çdo kusht…Shqipe Biba, ndër ativistet e palodhura të LDK-së, e shpreh dhimbjen e shpirtit me fjalë që i dalin të lagura nga lotët. Martin Shkreli, ngushëlloi në emër të Këshillit Kombëtar Shqiptaro-Amerikan:Presidenti Rugova ishte udhëheqës i rrallë, politikan i matur dhe arkitekt i pavarësisë së Kosovës. Ai ishte njeri i bashkëpunimit.

Ish ambasadori i qeverisë Demokratike të Shqipërisë në Kombet e Bashkuara, shkrimtari Pëllumb Kulla, ka ardhur si shumë të tjerë që të paraqesë ngushëllimet e veta kryetarit Rexha dhe kryesisë së LDK-së për Amerikën.Kulla tha për Illyria-n: Lajmi i humbjes së Presidentit të Kosovës, më hidhëron pamasë. Kjo ndodhi në një moment kyç, kur çështja e Kosovës po kalon në momentet vendimtare të një përpjekje mbishekullore, në të cilën angazhimi i Ibrahim Rugovës u bë histori me fitore.

Unë kam arsye që personalisht ta ndjej thellë dhimbjen, pasi kanë qenë me dhjetëra takimet e mia me të, që në Gjermani e më pas në Nju Jork, ku e ndjeva dhe e ndoqa më nga afër, hap pas hapi, kontributin e tij në ndërkombëtarizimin e çështjes kosovare dhe futjen e saj në agjendën e OKB.

Mbaj mend kur si kryetar i Misionit Shqiptar në vitin ’94 i dorëzova Këshillit të Sigurimit një notë proteste për mbylljen e dhunshme nga autoritetet serbe të Institutit Albanologjik dhe të Akademisë së Shkencave në Prishtinë si edhe për vrasjen e dy shqiptarëve.

Disa ditë pas protestës sonë në Nju Jork, Presidenti Rugova në një konferencë shtypi në Prishtinë, tha: "Këto ditë ne protestuam pranë Këshillit të Sigurimit të OKB-së për mbylljen e Institutit Albanologjik dhe Akademisë, si edhe për vrasjen e dy shqiptarëve…" Kur lexova deklaratën e Presidentit Rugova m'u lagën sytë nga lotët. Ai thoshte "ne protestuam" dhe jo "Misioni Shqiptar protestoi". E pra, ne nuk kishim biseduar me doktor Rugovën e megjithatë ai e ndjente se ne ishim Misioni i tij dhe ai ishte presidenti ynë.

Fusha politike që le pas Rugova në hapësirën shqiptare e sidomos në Prishtinë, është mjaft e trazuar, por unë uroj dhe lus Zotin që kjo dhimbje që ka prekur te gjithë kombin tonë, të bëhet faktor kthjellimi dhe uniteti.

Ish kryeredaktori i parë i gazetës Liria, gazeta e ish të përndjekurve politikë të Shqipërisë, poeti Uran Kostreci e shpreh dhimbjen përmes vlerësimit të figurës së presidentit Rugova: Ikja e presidentit në këto momente kaq vendimtare për fatin e Kosovës, ikja tani e këtij burri të shquar, ma thotë zemra se është një humbje e madhe për shqiptarët, kudo që janë. Ky atdhetar i devotshëm dhe i mençur diti se çfarë duhej të kërkonte e si ta kërkonte, atë që të gjithë e duam-Pavarësinë.

Ekuilibri i tij bëri që të ishte ky njeriu më i besueshëm jo vetëm për shqiptarët e Kosovës, por edhe për Departamentin Amerikan të Shtetit. Për mendimin tim Dr. Ibrahim Rugova është arkitekti i pavarësisë së Kosovës, pavarësi që dashtë Zoti ta shohim së shpejti të konfirmuar.

Figura e dr. Rugovës do të mbetet për Kosovën si figura e Xhuzepe Mazzinit për italianët. Dashtë Zoti që vdekja e atij burri të shquar t’i bëjë të gjitha palët e politikës në Kosovë më të matura e me të ekuilibruara me qëllimi që të arrihet për Kosovën ajo pavarësi për të cilën ai u përpoq aq shumë. Do të uroja që edhe shteti amerikan, të cilin presidenti Rugova, aq shumë e besonte dhe e respektonte, ta konfirmonte sa më shpejt pavarësinë e Kosovës!

….Të gjithë shqiptarët nuk pushuan së ardhuri për të ngushëlluar, ata s’ishin vetëm nga Kosova, por edhe nga Shqipëria, Maqedonia, Mali i Zi, Presheva....Niko Kirka, Feti Rexhepi, Muhamet Omari, Zija Lepenica, Spiro Gjikondi, Skënder Shkreli, dhe një varg i pambarimtë shqiptarë të Shqipërisë kanë ardhur bashkë që të ngushëllojnë kryesinë e LDK-së.

Edhe pasdite vonë të së shtunës apo dhe të dielën gjatë të gjithë ditës, nuk kanë pushuar ardhjet. Zyrat e LDK-së ishin tepër të vogla për të zënë në hapësirën e tyre mijëra shqiptarë të ngarkuar nga dhimbja.

Ndërsa libri, ku lënë shënimet, duket sikur rënkon nga dhimbja e atyre që arrijnë të zotërojnë veten për të shkruar pak rreshta ....