Delegacionet nga Gjermania, Zvicra dhe Austria kryesohen nga ministrat e jashtëm

Delegacionet nga Gjermania, Zvicra dhe Austria kryesohen nga ministrat e jashtëm

Prishtinë, 25 janar 2006 /TN /QIK - Qytetarët e Kosovës, në numër të madh, vazhdojnë të presin në radhë të gjata, nëpër mot shumë të ftohtë, për të bërë homazhe pranë trupit të pajetë të Presidentit Rugova në hollin e Kuvendit të Kosovës.
Delegacione të shumta vendore dhe ndërkombëtare po bëjnë homazhe në nderim të jetës dhe figurës së Presidentit Rugova.
Delegacione të shumta nga bota kanë paralajmëruar pjesëmarrjen në funeralin e Presidentit Rugova. Disa prej tyre tashmë kanë arritur, duke përfshirë edhe delegacionin e lartë nga Shqipëria, kryesuar nga Presidenti Mojsiu.
Delegacioni presidencial amerikan do të kryesohet nga z. Alphonso Jackson, Sekretar për Banim dhe Zhvillim Urban. Në delegacionin që ka caktuar Presidenti amerikan George W. Bush janë edhe: z. Philip Goldberg, shef i Misionit Amerikan në Kosovë, dhe z. Frank Wisner, Përfaqësues Special i Sekretares Amerikane të Shtetit në Bisedat për Statusin e Kosovës.
Nga NATO ja konfirmohet ardhja e admiralit Harry Ulrich, komandant i Aleancës për Krahun Jugor të Aleancës, Ndihmëssekretari i Përgjithshëm për Çështje Politikë, Martin Erdmann, etj.
Paralajmërohet ardhja e presidentëve të Sllovenisë, Kroacisë, Maqedonisë, përkatësisht Janez Dërnovshek, Stipe Mesiq, Branko Cërvenkovski.
Nga strukturat evropiane është konfirmuar ardhja e Javier Solanës dhe Olli Rehn it.
Delegacionet nga Gjermania, Zvicra dhe Austria do të kryesohen nga ministrat e jashtëm, përkatësisht Frank Walter Steinmeir, Michele Calmy Rey, Ursula Plasnik.
Britania, Franca, Turqia, Hungaria, Rumania, dhe një numër vendesh të tjera poashtu përfaqësohen në nivel ministrash. I dërguari i OKB së për statusin e Kosovës, Marti Ahtisaari, dhe ekipi i tij kanë paralajmëruar më herët pjesëmarrjen në ceremonitë mortore për Presidentin Rugova.
Pjesëmarrjen e ka paralajmëruar edhe një delegacion nga Vatikani, kryesuar nga Kryeipeshkvi Pier Luigi Celata, nga Këshilli Pontifikal për Dialog Ndërfetar.
Ka edhe delegacione të tjera që kanë konfirmuar dhe pritet të konfirmojnë pjesëmarrjen në ceremonitë e varrimit të Presidentit.
Grupi për Pritjen e Delegacioneve Ndërkombëtare, i caktuar n! ga Këshilli për Varrim, po u bën pritje të organizuar në Aeroportin e Prishtinës delegacioneve që vijnë nga bota.
Nga Aeroporti i Prishtinës njoftohet se aeroporti ka kapacitete që të përballojë të gjithë fluturimet e paralajmëruara të delegacioneve pjesëmarrëse nga bota.