Një qiri për një Njeri

OPINIONE

Një qiri për një Njeri

25 janar 2006 /TN

Ne studentët e UP-së, duke besuar e punuar për studime dhe arsimim bashkëkohor që do të përparojë vendin dhe mirëqenien tonë, me besimin në vizionin që e mbolli dhe e kultivoi PRESIDENTI ynë, duhet të vazhdojmë rrugën dhe misionin filozfik e hyjnor të dr. Rugovës, për të treguar se jemi pjesë e kulturës euro-perëndimore dhe dijmë të çmojmë vlerat civilzuese botërore

Shkruan: Armend RUGOVA*

Lajmi ishte i rëndë më 21 janar: Presidenti i Kosovës Ibrahim Rugova, prijësi i Kosovës në vitet e mëdha të procesit për pavarësi të vendit tonë, ndërroi jetë sot (e shtunë) në orën 11:38.

Presidenti Rugova ndërroi jetë në shtëpinë e vet në Prishtinë, duke pasur përreth familjen e tij, mjekun personal me stafin ndihmës nga vendi, si dhe mjekë amerikanë... dhe askush, asnjë njeri që është shqiptar nuk deshti ta besojë.

Thjesht: Njerëzit emblemë nuk vdesin, Presidenti Rugova ndërroi jetë, për të mos i mjaftuar vdekja që të reflektojë krejt madhështinë, humanizimin dhe vizionin e lirisë e të pavarësisë për vendin e vet-Kosovën!

Studentët të shpallin dr. Rugovën “Honoris Causa” të UP

Kalimi në amshueshmëri i Presidentit, studentët i gjeti duke u përgatitur për zgjedhje të lira, të parat demokratike dhe nën mbikqyrje ndërkombëtare. Për herë të parë Kosova do të dijë sa studentë ka Universiteti i vetëm publik. Për herë të parë studentët nuk do të improvizonin zgjedhjen e përfaqësuesve që vërtetë do ti përfaqësojnë interesat e tyre, pa imponime sikur në sistemin monist dhe pa improvizime siç ndodhën edhe në liri...

Por Janarët e ftohtë përsëritshëm erdhën... ky janar i 2006-tës do të ngrijë hovin tonë dhe shpirtin e shqiptarëve anëembanë. I përkujtuam data të rëndësishme si 600 vjetori i vdekjes së Skënderbeut, 16 vjetori i vrasjes së vëllezërve Gërvalla e Kadri Zeka dhe kumti i zi, edhe një herë, në Janar, erdhi e u bë loti dhe vaji ynë.

Tashmë i gjithë populli i Kosovës, edhe studentët, po i bëjnë homazhet dhe po përkujtojnë e nderojnë kolosin RUGOVA. Edhe ata që për të gjallë nuk e panë vizionin e Tij, e shanë dhe e vranë por kurr nuk ua ktheu!

Lajmin për ikjen e dr. Rugovës e shënoi e gjithë bota. Sepse ishte lider dhe burrshtetas jo vetëm i Kosovës dhe shqiptarëve. I numërojnë edhe sot gjithë ato çmime ndërkombëtare për paqë, shpalljen doktor nderi në Universitete e qytete evorpiane... Dhe ne, së paku ne studentëve, na ngjeshet misht nga një turp që bënë profesorët tanë, ish kolegët e Presidentit, bashkëpunëtorët dhe qytetarët...Për të gjallë nuk bëmë atë që bëri Universiteti i Tiranës, i Parisit 8...Nuk e bëmë pavarësisht që ai studioi e doktoroi në këtë Universitet, pavarësisht veprimtarisë së Tij letrare politike, kombëtare dhe veprave shkencore që ai na i la si një porosi, një amanet, një vizion!

Po z. President! Për ne, studentët e Universitetit të Prishtinës, ke qenë dhe je “HONORIS CAUSA”. Më shumë se kaq, MISIONARI i paqes, lirisë dhe pavarësisë së Kosovës... I dërguari i Zotit që punoi e veproi për t’na e bërë jetën më të mirë, me hapësira të reja studimi e vlerash që i njeh bota.


Në vend të një fjale

Presidenti i Kosovës, njeriu, intelektuali, atdhetari, kritiku letrar, politikani që i dha emër Kosovës, shqiptarëve, dr. Ibrahim Rugova besoi në lirinë dhe pavarësinë.
Ne studentët dhe populli i Kosovës i besoi Presidentit dhe ëndërrës për mëvetësi që AI e kishte projektuar ndryshe.
Me frymën e TIJ prej NJË njeriu dhe vizionin prej politikani, Presidenti ynë historik është I PARI që instaloi filozofinë e tij poltike e kombëtare për realizimin e ëndërrës shekullore për liri e pavarësi.

Ne studentët e UP-së, duke besuar e punuar për studime dhe arsimim bashkëkohor që do të përparojë vendin dhe mirëqenien tonë, me besimin në vizionin që e mbolli dhe e kultivoi PRESIDENTI ynë, duhet të vazhdojmë rrugën dhe misionin filozfik e hyjnor të dr. Rugovës, për të treguar se jemi pjesë e kulturës euro-perëndimore dhe dijmë të çmojmë vlerat civilzuese botërore.

Para së gjithash për të vërtetuar para vetes dhe para botës se çmojmë MISIONARIN e paqes, të lirisë e të pavarësisë, Presidentin e parë të Kosovës demokratike, njeriun e papërsëritshëm, burrshtetasin e Dardanisë.

Prandaj, bashkë me këtë numër të edicionit special të gazetës “Bota e re”, le të ndezim nga një qiri, në nderim të kujtimit për vetëm NJË njeri: Presidentin RUGOVA.

Ky edicion, i mbështetur nga studentët, nga miqtë e donatorët e studentëve dhe të Universitetit e të dijes, vjen në duart Tuaja edhe si kujtim për redaktorin e parë të asaj bote të re që dr. Rugova e kishte parë që kur ishte student!

Të bashkohemi me lutjen për PRESIDENTIN!

Mirë u pafshim në dimensionet tjera z. President!

*Armend Rugova është nënkryetar i UP të SUP