Nga tubimi komemorativ për Presidentin Rugova organizuar nga mërgimtarët shqiptarë në Leko të Italisë

Nga tubimi komemorativ për Presidentin Rugova organizuar nga mërgimtarët shqiptarë në Leko të Italisë

25 janar 2006 /TN

- Virtytet e larta shpirtërore dhe largpamësia e Dr Ibrahim Rugovës mësim dhe shëmbëlltyrë për prijësit e popujve dhe mbarë botën civilizuese

Kështu u vlerësua nga udhëheqësit e institucioneve vendore të pushtetit, të cilët përmes mërgimtarëve shqiptarë të pranishëm në këtë mbrëmje komemorative kushtuar Presidentit Rugova, ua kanë përcjellë ngushëllimet e tyre familjarëve të Presidentit të ndjerë, institucioneve shtetërore e mbarë popullit të Kosovës dhe mbarë kombit shqiptar. Edhe në sjelljet civilizuese të mbi njëmijë kosovarëve në Leko e rrethinë vërehet qartë vullneti i mirë liridashës dhe miqësor e tolerues, sigurisht sipas mësimeve të prijësit shembullor Ibrahim Rugova – thanë krerët e institucioneve shtetërore vendore. Interesim i madh i masmediave të këtushme që kanë përcjellur mbrëmjen komemorative.

Engjëll KOLIQI

Leko, 25 janar 2006 – Këshilli kordinues i shoqatave shqiptare në Leko e rrethinë, sipas vendimit të marrë të dielën e kaluar, të martën kanë organizuar në Leko një mbrëmje komemorative kushtuar Presidentit të Kosovës – Dr Ibrahim Rugova.

Mbrëmja komemorative ka filluar në ora 19, në kishën famullitare të Shën Andreut, në lagjen e Lekos – Maxhaniko, ku është celebruar Meshe Shenjte për shpirtin e Ibrahim Rugovës, në gjuhën shqipe, udhëhequr nga prifti i ardhur enkas për këtë nga Kosova – Dom Fatmir Koliqi. Në këtë meshë ka bashkëcelebruar edhe prifti vendës – Dom Alessandro Chiesa, mik i madh i shqiptarëve e qytetar nderi i Stubllës, i shpallur më 11 gusht 2005, në shenjë falënderimi për ndihmat e mëdha kundrejt mërgimtarëve shqiptarë këtu, të cilët në lokalet fetare, rekreative e sportive të famullisë së tij zhvillojnë të gjitha veprimtaritë, si në shtëpinë e tyre.

Mbrëmja komemorative që pas meshe ka vazhduar në teatrin e famullisë, me theksime dhe dëshmi për jetën dhe veprën madhore të Presidentit Rugova, në shërbim të realizimit të aspiratave të popullit të Kosovës për pavarësi dhe përgjithësisht të aspiratave kombëtare mbarëshqiptare, gjithnjë me rregullat dhe vlerat më të larta të civilizimit, demokracisë, tolerancës dhe të dashurisë së mirëfilltë njerëzore.

Kanë qenë të pranishëm krerët e institucioneve shtetërore vendore - të Këshillit të Rrethit (Consiglio Provinciale), të Prefekturës, të Kuesturës, të Komunës së Lekos, përfaqësues të sindikatave, përfaqësues të partive në pushtet dhe të atyre opozitare, përfaqësues të bashkësive etnike të emigrantëve, si dhe një numër i madh gazetarësh të qendrave lokale radiotelevizive dhe të gazetave "Il Giornale di Lecco", " La Provincia di Lecco", "Il Resegone" etj.

Vlenë të përmendet pjesëmarrja e Presidentit të Këshillit të Rrethit – Virgino Brivio, zëvendëspresidenti dhe ministër provincial i punës – Alfredo Marelli, Prefekti i sapozgjedhur i Lekos Carlo Fanara etj. Fjalën kryesore, me evokime nga jeta dhe vepra madhore e Presidentit Rugova e ka mbajtur kryetari i Shoqatës "Nëna Tereze" – Pashk Ballabani, i cili ka thënë se përkushtimi këmbëngulës dhe i mençur i Presidentit Rugova për vulosjen e aktit të pavarësisë dhe sovranitetit të Shtetit të Kosovës, do të kurorëzohet së shpejti, por ai na ka lënë një zbrazësi të madhe, kështuqë në Ditën e Madhe të vulosjes së Pavarësisë, ne do këndojmë e vallëzojmë me lotë në sy, sepse Ai do të na mungojë.

Megjithatë – ka shtuar Pashku – kudo që shkojmë jemi krenarë, sepse kudo trajtohemi e respektohemi me admirim, në saje të shëmbëlltyrës së lartë civilizuese dhe intelektuale të Presidentit Rugova, tashmë i pranishëm edhe në zemrat e të gjithë paqedashësve, anekënd botës.

Edhe autoritetet vendore të pranishëm në këtë mbrëmje komemorative kanë vlerësuar lartë veprimtarinë e mençur dhe me një kulturë të lartë politike të Presidentit Rugova, duke e quajtur misionar të madh të paqes dhe të demokracisë dhe predikues e kultivues të dashurisë së mirëfilltë njerëzore. "Virtytet e larta shpirtërore dhe largpamësia e Dr Ibrahim Rugovës ka qenë dhe do të mbetet deri në amshim mësim dhe shëmbëlltyrë për prijësit e popujve dhe mbarë botën civilizuese.

Ai me mençuri dhe me kulturë dashurie ka bllokuar edhe kryekriminelin e Ballkanit Millosheviqin dhe ka vënë në mat-pozicion bashkësinë ndërkombëtare, duke mos i lejuar më të luajnë e të tregtojnë me fatin e kombit të Tij", ka thënë ndër të tjera Z. Marelli, duke folur në emër të institucioneve vendore të Lekos. Brizida Balla – mërgimtare nga Durrësi ka thënë se dhembja për humbjen e figurës së madhe kombëtare e ndjen barabar çdo shqiptar, pa marrë parasysh a është shqiptar nga Kosova, nga Shqipëria, apo nga viset e tjera, sepse ne jemi një dhe kurrë nuk i kemi përfillur ndarjet e dhunshme nga arbitrazhi ndërkombëtar.

"Dr Ibrahim Rugova është konsideruar nga mbarë shqiptarët si lider mbarëkombëtar, sepse me shembullin e tij ne jemi mësuar të kultivojmë atdhedashurinë dhe dashurinë e mirëfilltë njerëzore e të angazhohemi gjithnjë e më shumë e më konkretisht, koform rrethanave dhe dinamizmit shumë të shpejtuar të proceseve, në përmbushjen e aspiratave tona kombëtare – të ligjshme dhe të natyrshme.

Ai ka zënë vendin e merituar në të njëjtën faqe të historisë sonë kombëtare, bashkë me Gjergj Kastriotin – Skënderbe dhe me Të lumturuarën Gonxhe Bojaxhiun – Nënë Terezën", ka përfunduar Zonja Balla. Njëri nga përfaqësuesit e sindikatave, duke u përkulur para portretit të Presidentit Rugova, ndër të tjera ka thënë se edhe janë shumë të kënaqur me sjelljet dhe kulturën e lartë të mërgimtarëve kosovarë në Leko, të cilët i sheh si ambasadorë të vërtetë të dërguar nga i Madhi Ibrahim Rugova.

Është hapur edhe Libri i Zisë dhe të gjithë të pranishmit janë regjistruar e shumë prej tyre edhe kanë shkruar një kujtim për Presidentin Rugova.