|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Na ngushëllon vepra, vizioni dhe puna e Presidentit Rugova për shtetin e pavarur

Prishtinë, 25 janar 2006 /TN /QIK
   
Shoqata e Studentëve Shqiptarë në Universitetin e Lozanës: "Dhembja për Presidentin Rugova i ka prekur thellë të gjithë studentët nga Kosova, Shqipëria, Maqedonia dhe Kosova Lindore. 

Nderimin dhe keqardhjen tonë për Presidentin Rugova do ta shndërrojmë në punë dhe shërbim të idealit kombëtar pë të cilin Presidenti Rugova gjeti forcë madhështore edhe në ditët më të vështira. Dhembja i tejkaloi kufijtë për të bërë të përjetshëm kujtimin për Presidentin Rugova".

Klubi letrar "Faik Konica" – Cyrih: Fuqia e mendimit dhe veprimit kulturor, politik e filozofik të cilën e zhvilloi për më tepër se dy dekada Presidenti Rugova, solli kohën të cilës ne shqiptarët tashmë defakto po i themi e lirë, e që për fat të keq dejurizimin e saj nuk e priti Presidenti i parë moral e Institucional i Shtetit të Kosovës Dr. Ibrahim Rugova.

 

Kjo është koha më e keqe e ikjes së tij, e ikjes për pak, sepse ai është larguar vetëm për një çast, veç pak është larguar nga ne, nga Kosova e tij e dashur, së cilës ia kushtoi tërë jetën dhe veprën.

 

Por le të na ngushëllojë vepra, vizioni dhe puna e Presidentit Rugova për shtetin e pavarur të Kosovës, arkitekt i së cilës është dhe do të mbetet përgjithmonë".

Komuniteti Shqiptar i besimit islam në Detroit të SHBA-së: "Lajmi për vdekjen e Presidentit Ibrahim Rugova ishte shumë i dhembshëm. Kjo dhembje bëhet edhe më e madhe kur kihet parasysh se në çfarë momenti ndodhet Kosova, pra në prag të negociatave për njohjen e pavarësisë së Kosovës për të cilën i ndjeri Dr. Rugova punoi tërë jetën e tij.

 

Andaj diaspora shqiptare bashkë me të gjithë popullin shqiptar ndan dhembjen për humbjen e njeriut të madh, i cili me urtësi, mençuri dhe me vizionin e tij e udhëhoqi mbarë popullin e Kosovës, arriti të nderkombtarizojë çështjen e Kosovës dhe çlirimin e saj nga kthetrat e egërsirës serbe".

Komuniteti Shqiptaro-Amerikan nga Madisoni:- Me dhembje të madhe dhe pikëllim morëm lajmin për humbjen e prijësit, strategut dhe humanistit tonë të dashur, Presidentit Ibrahim Rugova. Ne shqiptarët në diasporë përherë ishim e do të jemi krenarë që e patëm një lider të tillë, i cili me mençuri dhe urtësi na udhëhoqi në periudhën më të rëndë të historisë sonë.

 

Personaliteti i Tij dhe respekti ndaj Tij në gjithë botën edhe neve në diasporë na mundësojë që të kyçemi në rrjedhat demokratike të vendeve, ku jetojmë dhe veprojmë. Vizioni i Tij për një Kosovë të lirë, demokratike e të pavarur, ishte dhe do të mbetet udhërrëfim për të gjithe ne.

Një mesazh ngushëllimi me dhembje të madhe për Presidentin Ibrahim Rugova e ka dërguar edhe Idriz Dauti nga Australia Perëndimore dhe Ukë Lajçi me familje nga Nju-Jorku, si dhe Haki e Ruzhdi Bunjaku nga Zvicra.

Aktivi i LDK-së në Heilbron, Gjermani: "Me pikëllim të madh dhe me dhembje të thellë shpirtërore morëm lajmin e hidhur të ndarjes nga jeta të Presidentit të parë dhe i vetëm i Kosovës, dr.Ibrahim Rugova.

 

Kosova ka humbur udhëheqësin më të madh të të gjitha kohërave të historisë së saj, ideatorin e parë të shtetit të Kosovës – ikonën e pavarësisë së Kosovës, burrin e besës e të burrërisë, burrin e madh të kombit, dr.Rugova, i cili gjithmonë do të kujtohet për vizion e vendosmëri".

Shoqata Humanitare "Dardania" e V.Ëiesbaden: Me pikëllim të thellë në zemër morëm lajmin për vdekjen e Presidentit dr.Ibrahim Rugova. Kjo është humbje e madhe për të gjithë ne. Pranoni ngushëllimet tona më të sinqerta".

Shoqata "Don Gjon Buzuku": "Me rastin e vdekjes se dr.Ibrahim Rugovës, Presidentit të Kosovës, ju përcjellim ngushëllimet tona më të sinqerta për këtë humbje të madhe".

 |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |