Mesazhe ngushëllimi: Ibrahim Rugova ka treguar një mençuri që rrallë ndeshet tek liderët e këtyre hapësirave

Mesazhe ngushëllimi: Ibrahim Rugova ka treguar një mençuri që rrallë ndeshet tek liderët e këtyre hapësirave

Prishtinë, 25 janar 2006 /TN /QIK - Shoqata, organizata e individë vazhdojnë të dërgojnë mesazhe ngushëllimi prë Presidentin Rugova.
Partia Radikale Transnacionale, Itali: "Në këtë moment të vështirë dhe dhembjeje për humbjen e Presidentit të Kosovës, z.Ibrahim Rugova, jemi afër Jush, me të gjithë shoqet, shokët dhe miqtë e Partisë Radikale Transnacionale. Jemi sot për të njëjtat motive nga të cilat kemi qenë gjithmonë me ju edhe në vitet e vështira të dhunës kriminale të shpërthyer kundër të drejtave tuaja njerëzore dhe politike nga krimineli Millosheviq dhe regjimi i tij, por dhe i aleatëve të tij ndërkombëtarë, të mbështetur edhe nga ligësi europianësh.
Në këtë moment besoj se duhet ta bëj një gjë të tillë edhe në emër të shokut dhe mikut tonë të përbashkët, Antonio Russo, që ndau në mënyrë vëllazërore me ju momentet më të vështira dhe tragjike të Kosovës, duke mbijetuar gjatë bombardimeve dhe dhunës serbe në Prishtinë, për të shkuar më vonë në Gjeorgji në emër të punës për Radion Radikale, por edhe si militant në favor të viktimave shumë shekullore të gjenocidit kundër Çeçenisë.
Shpresoj që në saje edhe të rianëtarësimit dhe pjesëmarrjes suaj në jetën e partisë sonë të përbashkët (Partisë Radikale Transnacionale), të marrim sa më shpejt dhe konkretisht një betejë të përbashkët, që populli i Kosovës të mirëpritet, siç edhe e meriton këtë të drejtë në Bashkimin Europian.
Humbja e Presidentit të Kosovës, z.Ibrahim Rugova është e dhimbshme edhe sepse prestigji që ai kishte mundur ta fitonte në të gjithë botën forconte detyrat dhe rëndësinë Tuaj.
Me përshëndetje të përzemërta, ju sjell në mënyrë të veçantë ngushëllimet më të sinqerta edhe në emër të mikes, Emma Bonino", i juaji, Marko Panela.
Kumuniteti shqiptar në Kuebek, Kanada: "Ndajmë me gjithe popullin shqiptar pikëllimin dhe dhembjen per vdekjen e Presidentit Rugova. Ne nje periudhe te veshtire per popullin tone ai kishte pranuar thirrjen e atdheut dhe i qendroi besnik idealit te tij gjer ne fund. Vepra e tij eshte inspirim per te gjithe neve qe assesi mos t'i ikim sakrificave te domosdoshme ne tendecat tona per te realizuar aspiratat legjitime to popullit shqiptar".

Shoqata Humanitare "Gërvallajt", Arau: Njeriu që rrezatonte mençuri e lumturi! Me dhembje dhe pikëllim të thellë morëm lajmin e hidhur për vdekjen e Presidentit tonë të dashur. Vdekja e Presidentit tone te dashur preku thellë të gjithat zemrat që kane gjak shqiptari ne mbarë rruzullin tokësor. Ju lutem që t'i pranoni ngushëllimet e anëtarëve të shoqatës sonë".
Teatri Kombëtar i Operas dhe Baletit në Shqipëri: "E ndjej së brendshmi të jem bashkë me Ju në këto ditë të përjetimit kombëtarisht të dhimbjes për humbjen e shumë të nderuarit, Presidentit Ibrahim Rugova.
Të gjithë jemi pushtuar nga trishtimi i thellë që krijon vakumi i largimit nga jeta të një personaliteti të patjetërsueshëm, i një intelektuali të kualiteteve të larta të mendimit dhe veprimit, i një vizionari realizator të idealeve dhe ideve të një komuniteti mbarë.
Çdo argument për të sjellë së shpejti atë çka dr.Ibrahim Rugova përfaqëson në Kosovë e për Kosovën së pari, e më pas për gjithë shqiptarët është vërtetë i varfër.
Personalisht i përulem veprës së Tij kombëtare së tëri, por asaj që u realizua në Kosovë në veçanti për ngritjen sa çelen sytë të instituconeve që mundësojnë zhvillimin muzikor profesional dhe atë kulturor e artistik, frutet e së cilës gëzoni ju artistët e devotshëm, publiku artdashër i Kosovës dhe të gjithë ne të tjerët dëshirojmë të ndjejmë përherë gëzimet së bashkë", drejtori Zhani Ciko.
Kryetarja e Komitetit të Helsinkut për Mbrojtjen e të Drejtave të Njeriut në Serbi, Sonja Biserko i dërgon një telegram Kryesisë së Lidhjes Demokratike të Kosovës, në të cilin shkruan:
"Me rastin e vdekjes së liderit Tuaj dhe Presidentit të Kosovës, Ibrahim Rugova, ju shprehim ngushëllimet më të thella. Shkuarja e Ibrahim Rugovës nga skena politike paraqet humbje të pakompensueshme për të gjithë qytetarët e Kosovës.

Si politikan që hyri në skenën politike të Kosovës në rrethanat më dramatike të krizës jugosllave në fund të viteve '80-ta të shekullit të kaluar, Ibrahim Rugova ka treguar një mençuri që rrallë ndeshet tek liderët e këtyre hapësirave. Ndaj dhunës brutale mbi popullatën shqiptare nga ana e regjimit të Beogradit, Ai u përgjigj me mosdhunë.

Me këtë gjest, në vitet që erdhën, u shkri në një program të llojit të vet politik dhe të aksioneve politike me përmasa të gjëra. Ibrahim Rugova me durim trasoi rrugën drejt ardhmërisë evropiane të Kosovës dhe të gjithë banorëve të saj. Për shkak të politikësë së tij të veçantë, vdekja e tij lë zbraztësirë të madhe. Shpresojmë që ju, si partia më e madhe në Kosovë, do të vazhdoni rrugën që ua ka lënë Presidentit Rugova si trashëgimi të tij të çmuar.
Ju lutem që t'i shprehni ngushëllimet tona më të sinqerta anëtarëve të familjes së Presidentit Rugova", me respekt Sonja Biserko.