Kryeministri Kosumi priti delegacionin shtetëror të Shqipërisë që ka bërë homazh për Presidentin Rugova

Kryeministri Kosumi priti delegacionin shtetëror të Shqipërisë që ka bërë homazh për Presidentin Rugova

Prishtinë, 25 janar 2006 /TN /QIK - Kryeministri i Kosovës, ka pritur delegacionin shtetëror të Shqipërisë, që kryesohej nga Presidenti i Shqipërisë, Alfred Moisiu.

Në delegacionin shqiptarë ishin edhe Kryeministri i Shqipërisë, Sali Berisha, Kryetarja e Kuvendit të Shqipërisë, Jozefina Topalli; Ministri i Punëve të Jashtme, Besnik Mustafaj dhe qeveritar tjerë shqiptarë.

Kryeministri Bajram Kosumi në pritjen e delegacionit shtetëror të Shqipërisë, shoqërohej nga zëvendëskryeministri i Kosovës, Adem Salihaj, ministrat dhe zëvendësministrat e Qeverisë së Kosovës.
Në emër të delegacionit, Alfred Moisiu ka shprehur ngushëllimet e tij Qeverisë së Kosovës dhe popullit të Kosovës për vdekjen e presidentit Rugova. "Erdhëm për t'i dhënë lamtumirën e fundit Presidentit Ibrahim Rugova dhe për të ndarë me juve dhembjen", ka thënë Presidenti Moisiu në këtë takim.
Kryeministri Kosumi ka shprehur falënderimin për ngushëllimet e Presidentit Moisiu.


"Shumica nga ju e keni njohur nga afër Presidentin Rugova, ndaj edhe jemi falënderues për gatishmërinë tuaj për të ndarë dhembjen me neve në këto ditë të pikëllimit për qytetarët e Kosovës. Ibrahim Rugova i ka dhënë imazh modern lëvizjes për pavarësi të Kosovës", ka vlerësuar kryeministri Kosumi.
"Kjo është humbje e madhe që është ndjerë nga të gjithë shqiptarët kudo që gjenden", tha Kryeministri Sali Berisha.
Kosova ka humbur njeriun e Kosovës moderne të paqes dhe tolerancës. "Kosovës do t'i mungojë Ibrahim Rugova, por do të mbetet trashëgimia e tij politike e trupëzuar në qytetarët e Kosovës", ka theksuar kryeministri shqiptar, Sali Berisha.
Në vazhdim, Sali Berisha ka apeluar te klasa politike që të vazhdojë traditën e trasuar nga Rugova për ndërtimin e një shoqërie të shëndoshë që do të reflektojë stabilitet dhe paqe në rajon.
Në emër të Kuvendit të Shqipërisë, ngushëllime ka shprehur edhe kryetarja e Kuvendit te Shqipërisë, Jozefina Topalli. Ajo në fjalën e saj e ka vlerësuar Dr.Ibrahim Rugovën si njeri me profil gandist dhe paqësorë. "Ne, por edhe Ballkani dhe më gjerë kanë humbur një vizionar", është shprehur Jozefina Topalli.
Duke falënderuar delegacionin shqiptarë për ngushëllimet, zëvendëskryeministri Adem Salihaj, ka vlerësuar Dr.Ibrahim Rugovën si një ikonë të pavarësisë së Kosovës. "Ai ka hapur derën e pavarësisë. Pavarësia nën drejtimin e tij ishte de fakto e realizuar", është shprehur zëvendëskryeministri Salihaj.