Daci priti udhëheqjen e PS të Shqipërisë, Princin Leka Zogun dhe Shtajnerin

Daci priti udhëheqjen e PS të Shqipërisë, Princin Leka Zogun dhe Shtajnerin

Prishtinë, 25 janar 2006 /TN /QIK - Kryetari i Kuvendit të Kosovës, akademik Nexhat Daci priti udhëheqjen e Partisë Socialiste të Shqipërisë, të udhëhequr nga kryetari Edi Rama, në përbërje të së cilës ishin edhe Pandeli Majko e Arta Dade.

Pas shprehjes së ngushëllimeve bashkëbiseduesit ishin unikë në konstatimin se ceremonia dinjitoze e nderimit të presidentit Rugova është shenjë e një energjie të madhe brenda qytetarëve dhe institucioneve, e cila do t'u japë shtytje shumë pozitive mbarë proceseve politike në Kosovë.

Uniteti që po tregohet jep të kuptohet se janë shkrirë kufijtë ndërmjet faktorëve, që jep besim se proceset në Kosovë do të shkojnë mbarë. Gjithë kjo është një referendum i popullit për të ardhmen e vet.
Daci priti princin Leka Zogu

Për të shprehur ngushëllimet dhe për të marrë pjesë në ceremoninë e varrimit të Presidentit Rugova, në Prishtinë ka ardhur edhe princi Leka Zogu. Princi i oborrit mbretëror i shprehu ngushëllimet më të sinqerta kryeparlamentarit Daci, duke u zotuar se gjithnjë do të punojë për të ardhmen e Kosovës. Në të gjitha proceset që çojnë drejt finalizimit të synimeve të popullit të Kosovës do të keni edhe mbështetjen time dhe të familjes, theksoi ai .
Po ashtu Daci priti sot ish shefin e UNMIK ut, z. Mihael Shtajner. Me këtë rast z. Shtajner i shprehu ngushëllimet më të thella kryeparlamenatarit Daci.