Ati i Shenjtë Benedikti XVI ngushëllon popullin dhe institucionet e Kosovës

Ati i Shenjtë Benedikti XVI ngushëllon popullin dhe institucionet e Kosovës

25 janar 2006 /TN

- Virtyte solide e kanë inspiruar jetën dhe veprën e Presidentit Rugova

- Kështu thuhet në telegramin e Papës, i cili kërkon nga Zoti bekime të plota për banorët e dashur të Kosovës.

Engjëll KOLIQI

Qytet i Vatikanit, 25 janar 2006 – Ati i Shenjtë Benedkti XVI ka ngushëlluar, dje, popullin dhe institucionet e Kosovës, me rastin e humbjes së parakohshme të Presidentit Rugova. Përmes një telegrami, Papa e ngarkon Administratorin Apostulik të sapoemëruar “ad interim” (të përkohshëm) – Imzot Zef Gashin, që t’ua përcjellë popullit dhe administratës (institucioneve) të Kosovës ngushëllimet e përzemërta, me rastin e humbjes së Presidentit Rugova, të cilin e ka vlerësuar si një personalitet me virtyte solide civilizuese, në shërbim të popullit të tij, duke siguruar afërsinë shpirtërore me popullin e Kosovës, në këto çaste të sprovës. Njëherësh Papa Benedikti ka kërkuar nga Zoti që të shtrijë bekime të plota – siç thuhet në telegramin që e ka përcjellur përmes Sekretarit të Shtetit – Kardinal Angelo Sodano-s – mbi banorët e dashur të Kosovës.

Ja teksti integral i telegramit, që Sekretari i Shtetit të Vatikanit – Sodano i ka dërguar në emër të Shenjtërisë së Tij Benediktit XVI, kryeipeshkëvit Imzot Zef Gashit – administrator i përkohshëm apostuilik i Kosovës:

“Shkëlqesi Imzot Zef Gashi, Administrator Apostulik i Prizrenit,

Me marrjen e lajmit të trishtueshëm për humbjen e Presidentit të Kosovës Ibrahim Rugova, Lartmadhëria e Tij Papa, ngarkon Shkëlqesinë Tuaj për përcjelljen e ngushëllimeve të Tij të përzemërta për zinë që ka goditur popullin dhe administratën (institucionet) e Kosovës, ndërsa siguron afërsinë shpirtërore në këtë orë të sprovës. Në përkujtim të virtyteve solide civile që kanë inspiruar jetën dhe veprën në shërbimin shpirtmadh, që i ndjeri ka dhënë për bashkëqytetarët e Tij, Shenjtëria e Tij ka kërkuar nga Zoti bekime të plota për banorët e dashur të Kosovës.

Qytet i Vatikanit, 24 janar 2006
Kardinal Angelo Sodano
Sekretar i Shtetit të Shenjtërisë së Tij”