Qiellit shqiptar iu shkëput edhe një meteor

OPINIONE

Qiellit shqiptar iu shkëput edhe një meteor



23 janar 2006 /TN

Shkruan: Shaban PERAJ

Në trevat shqiptare, kudo ankth. E ne na mbante shpresa e fjalëve të tij “se me ndihmën e zotit dhe mjekëve do ta kalojë edhe këtë betejë”...por jo...

Erdhi ajo që të gjithë e pritnim, por nuk donim ta besonim. Ditë e zezë e shtuna e 21 janarit, kur lajmi i hidhur kaploi dhenë “sot në orën 11.38, vdiq Presidenti i Kosovës, Dr. Ibrahim Rugova”...

Termet në zemrat tona, fytyra të shtanguara, lot faqeve. Pse vallë jeta jonë kaloi me gjak e vaj, çfarë kemi bërë, o zot që kaq ashpër na dënoi, si t’ shkoi moti me gjak e lot, oj shqiptari? Në kohën kur duhet t’i mblidhnim frytet e përpjekjeve tona shekullore, kur Kosova duhej të merrte frymë lirisht, kur sakrificat e të rënëve dhe të gjallëve duhej të kurorëzoheshin me çmimin e mëvetësisë, ndodhë ajo që s’duhej të ndodhte.

Qiellit të Kosovës iu shkëput një meteor i cili pesëmbëdhjetë vite shkëlqeu- shndriti atë qiell duke u përpjekur që ai qiell të ishte i pastër si loti, bile edhe me një gjysmë mushkërie e me frymë të ndarë, pritte ditën e shumëpritur- Ditë e bardhë ku nuk dorëzohej ashtu si Naimi kur thonte “jak o ditë e uruar, se të presë nuk vdes “
E nuk e priti. Pyes ku e ka fundin durimi ynë? U shkrinë breza të tërë e ne po vuajmë në Ballkan, në shekullin 21. O Zot sa vështirë është të përmbahesh para nj vdekjeje kaq të rëndë, por...

Duhet të jemi të fortë dhe të mbështetemi në fjalët dhe veprat e këtij vizionari i cili të kujton heronjtë epikë të trevave tona. Ai iku fizikisht nga ne por me bindje se do të vendoset në historinë kombëtare si hero kombëtar. Është dhe mbete hero për ne ashtu siç mbetën në histori njerëzit e mëdhenj duke qenë dëshmitarë se politikës shqiptare i dha shpirt për t’u përjetësuar në përmasa universale.

Epizmi i popullit tonë kishte skalitur në shpirtin e tij burrërorë, mençurinë, gjakftohtësinë, kur në momentet më kritike arriti që kasapin e Ballkanit ta lente “të nxirrte shkumë nga goja”-duke e përulur edhe para atyre që ndjenin simpati për te.

Mençurinë dhe vizionin e tij e tregoi edhe në raport me ata që e “sulmuan”, të cilëve kurrë nuk ju kthye me fjalë të ashpra. Humbja është e vështirë pavarësisht në cilën kohë ndodhë, por Ai nuk ndahet nga përpjekjet tona për të çuar deri në fund amanetin e tij për një Kosovë shtet sovran e të pavarur. Në këto momente le të na ngushëllojë mendimi se Ai ishte një vizionar që e ka parashikuar edhe më herët pavarësinë e Kosovës, shumë më herët, atëherë kur pak kush e ka besuar një proces të tillë.

Vizioni i tij bëri që bota ta njohë më për së afërmi çështjen e Kosovës dhe simpatia për te si burrë shteti u shtri kudo në vendet demokratike.

Në fund mund të themi: krenohemi që e patëm sepse lider të tillë në fundshekullin e kaluar nuk kishin arritur të nxjerrin shumë vende të tjera, andaj: Lavdi i qoftë dhe i lehtë qoftë dheu i Kosovës për te.