Punonjësit e Institutit Albanologjik të Prishtinës me pietet përkujtuan veprën e jetën e Dr.Ibrahim Rugovës

Punonjësit e Institutit Albanologjik të Prishtinës me pietet përkujtuan veprën e jetën e Dr.Ibrahim Rugovës

Prishtinë, 23 janar 2006 /TN /QIK - Punonjësit e Institutit Albanologjik, vlerësuan se Presidenti Rugova u tregua profetik në udhëheqjen e vendit duke e çuar sigurtë drejtë pavarësisë, gjatë komemoracionit të organizuar sot në shenjë nderimi për vdekjen e tij.
"Falë punës së palodhshme, vendosmërisë rezistente e diplomacisë së Tij largpamëse, çështja e lirisë dhe pavarësisë së Kosovës, u afirmua ndërkombëtarisht dhe në emër të tij, ajo do të realizojë synimet dhe qëllimet e refrenit profetik të lirisë e të pavarësisë së Kosovës - shtet i pavarur dhe sovran", tha Mehmet Halimi, këshilltar shkencor i Institutit, koleg shumëvjeçar i Presidentit Rugova, të cilin të pranishmit e nderuan me një minutë heshtje. Halimi tha se Dr.Rugova ishte një burrë shteti me përmasa botërore, me çka edhe krenohet IA, pasi një personalitet i tillë doli nga gjiri i tij.
"Njeri i urtë, personalitet i rrallë intelektual, i cili u bë shembull se si njeriu i frymëzuar nga idealet, me punë të përkushtuar, me durim e sakrifica do të ngrihet deri në majat më të larta të kulturës, të shkencës dhe politikës", tha dr.Sadri Fetiu, drejtor i Institutit. "Ai ishte këtu, midis nesh më shumë se dy dhjetëvjetësha, ...lirisht mund të thuhet se Rugova, intelektualisht u rrit në Institut", tha ai.

Fetiu tha se me punë të përkushtuar sistematike, Dr.Rugova u ngjit deri në titullin më të lartë studimor të Këshilltarit shkencor dhe anëtarit të Akademisë. "Ky mjedis ia hapi rrugët për t'i zgjeruar njohuritë e veta për letërsinë edhe në Universitetin e Zagrebit dhe në atë të Parisit, ku mësoi për metodat e reja të studimit të trashëgimisë letrare të popullit tonë", tha ai. Fetiu tha se Rugova duke pasur njohuri të larta teorike si dhe me punë sistematike, që nga bibliografia e kritikës letrare, ai u bë "studiues i nivelit më të lartë të letërsisë".

Duke folur për personalitetin shkencor të Dr.Rugovës, Fetiu tha se ai ka trajtuar me sukses çështjet e letërsisë së vjetër shqipe. "Prandaj, studimi i tij për Pjetër Bogdanin do të jetë një shembull se si zbulohen vlerat e artit edhe në veprat e krijuesve që kanë një potencial të veçantë kreativ, që e dëshmojnë edhe në veprat me karakter filozofik e fetar", tha ai. Fetiu, gjithashtu ka vlerësuar lart punën e dr.Rugovës dhe të suksesshme në studimet e letërsisë bashkëkohore.

Ai veçoi analizat e Dr.Rugovës për vlerat estetiko-letrare të prozës së Kadaresë. Ndërsa, nga botimet e Institutit, Dr.Fetiu veçoi librin "Kahe dhe premisa të kritikës letrare shqipe", e cila tha se është një realizim gjithëpërfshirës dhe mund të konsiderohet si enciklopedi e historikut të kritikës letrare shqipe, që nga zanafilla e saj me veprat e Marin Barletit e deri në kohën tonë.
"Por, veprimtaria prej studiuesi dhe intelektuali të madh e Dr.Rugovës nuk mund të shkëputet nga veprimtaria e tij prej udhëheqësi dhe politikani me shumë pedigre. Për z.Fetiu, pa marrë parasysh, në preferohet apo jo nga të gjithë, politika e tij gandiste për kushtet e Kosovës dhe të marrëdhënieve të ndërlikuara të Ballkanit, Dr.Ibrahim Rugova meriton respekt për qëndrimin e tij të vazhdueshëm e konsekuent për pavarësinë e Kosovës dhe realizimin e saj me mjete paqësore”, tha Fetiu duke bërë një vlerësim politik të figurës së dr.Rugovës.

“Ai edhe kur u largua nga IAP-i dhe iu përkushtua politikës, gjithmonë ishte shpirtërisht me kolegët e tij. Për më tepër, në saje të përkrahjes së tij në çastet më të vështira, ky institucion mbijetoi krizën e shpërbërjes, atëherë kur me dhunë më 8 mars të vitit 1994 punonjësit e IAP-it u dëbuan nga godina", tha ai.
Në emër të kolegëve, Fetiu tha se Dr.Rugova do të kujtohet gjithnjë: si një burrë i urtë e si shembull i përkushtimit ndaj punës, shembull i sjelljes njerëzore, por para së gjithash edhe si shembulltyrë e njeriut që në rrethanat dramatike të përpjekjeve të popullit të tij për çlirim nga sundimi i huaj u ngrit deri në nivelin politik të liderit prijetar, të adhuruar nga shumica e popullit të tij.