Personalitete të larta vendore e ndërkombëtare i bënë nderime Presidentit Ibrahim Rugova

Personalitete të larta vendore e ndërkombëtare i bënë nderime Presidentit Ibrahim Rugova

Prishtinë, 23 janar 2006 /TN /QIK - Personalitete të larta vendore e ndërkombëtare që në orët e para të ditës së sotme bënë homazhe nderimi para arkivolit me trupin e pajetë të Presidentit Ibrahim Rugova, i cili është vendosur në hollin e Kuvendit të Kosovës.
Ndër të parët që bënë homazhe ishte kryeparlamentari Nexhat Daci, kryeministri Bajram Kosumi, kryeadministratori Soren Jesen Peteresen, kryetari i partisë ORA, Veton Surroi, ish- kryeministri Ramush Haradinaj e të tjerë.
Homazhe bënë së bashku shefi i UNMIK-uit Soren Jesene Petsren dhe komandanti i KFOR-it Xhuzepe Valoto.
Nderime të veçanta bënë edhe shefat e zyrave diplomatike në Prishtinë. I pari në mesin e tyre ishte shefi i Zyrës amerikane në Prishtinë Filip Goldberg.
Po ashtu në orët e paradites homazhe bënë edhe zyrtarë të lartë të TMK së, të udhëhequr nga gjeneral Agim Çeku, komandanti i SHPK së, Sheremet Ahmeti, bashkë me zyrtarë tjerë të lartë të policisë. Edhe punonjës të administratës së presidencës, të Kuvendit, të Qeverisë dhe të UNMIK ut, i bënë homazhe Presidentit në mënyrë të organizuar.
Ndërkaq përfaqësues të bashkësive fetare në Kosovë bënë homazhe dhe u lutën për shpirtin e presidentit Rugova.
Qytetarët e kryeqytetit dhe të viseve të ndryshme të Kosovës filluan të bënin homazhe në orët e mesditës. Ata shprehin dhembje të madhe për vdekjen e Presidentit.
Arkivoli me trupin e pajetë të Presidentit Rugova do të qëndrojë në hollin e Kuvendit të Kosovës deri të enjten në mëngjes, dhe pastaj do të vendoset në sallën e Palestrës së Sporteve "1 Tetori", në Prishtinë, ku do të zhvillohet ceremonia morotore e varrimit.