Mërgimtarët tanë në vendet e Beneluksit i ka goditur në shpirt vdekja e Presidentit Rugova

Mërgimtarët tanë në vendet e Beneluksit i ka goditur në shpirt vdekja e Presidentit Rugova

Bruksel, 23 janar 2006 /TN /QIK - Me pikëllim të madh e morëm lajmin e hidhur, që Presidenti historik i Kosovës Dr. Ibrahim Rugova, u nda nga jeta.

Anëtarët dhe simpatizantët e Lidhjes Demokratike të Kosovës, si dhe të gjithë mërgimtarët shqiptarë që jetojnë në Belgjikë, Holandë dhe Luksemburg, i ka goditur në shpirt e zemër, vdekja e Presidentit Rugova, arkitektit të Pavarësisë së Kosovës, vizionarit dhe burrështetasit më të shquar në historinë shqiptare - shkruan nga Brukseli njëri nga bashkëpunëtorët shumëvjeçar të Presidentit Rugova rreth kauzës së Kosovës, Gani Azemi.

"Për Presidentin e Kosovës Ibrahim Rugova do të shkruhen shumë libra në të gjitha gjuhët e botës për të shpjeguar se si një shtëpi të vogël në qendër të Prishtinës e bëri të njohur në të gjitha kontinentet, se si me konferenca javore të shtypit e mundi propaganden e një shteti fashist, se si e takoi Papën dhe udhëheqësit më të njohur të botës...

Jemi të bindur se Presidenti i Kosovës Dr. Ibrahim Rugova, me Skenderbeun dhe Nënë Terezën, do të radhiten ndër personalitetet e njohura të historisë Evropiane dhe botërore.

Nuk ka nder më të madh për popullin më të vjetër të Gadishullit Ilirik", theksohet se në mesazhin G.Azemit, kryetar i Degës së LDK së për Beneluks, në emër të anëtarëve e simpatizantëve dhe të të gjithë gjithë shqiptarëve në këto vende.

Një delegacion i gjërë i Kryesisë së LDK së për Beneluks, do të marrë pjesë në ceremoninë e varrimit kombëtar të Presidentit historik të Kosovës.

Në kryeqytetin e Evropës, në Bruksel me mijëra mërgimtarë dhe shumë miq të njohur të Presidentit Rugova, u nënshkruan në Librin e Përkujtimeve.