Ministri Veliu: Kosova dhe arsimi shqip mbijetoi falë veprës së Presidentit Rugova

MASHT mbajti mbledhje komemorative

Ministri Veliu: Kosova dhe arsimi shqip mbijetoi falë veprës së Presidentit Rugova

Prishtinë, 23 janar 2006 /TN

MASHT, duke u bazuar në këtë krijimtari të pasur e cila ka bërë kthesa në letërsinë shqipe, para pak kohësh, e ka propozuar dr. Rugovën për çmimin kombëtar “Azem Shkreli” për vepër jetësore

Me rastin e ndarjes nga jeta të Presidentit të Kosovës, z. Ibrahim Rugova, sot MASHT organizoi mbledhje komemorative në të cilën përveç të të punësuarve morën pjesë edhe përfaqësues të UNMIK-ut dhe mediat.

Zv. Ministri Fevzi Berisha duke ftuar të pranishmit që ta nderojnë kujtimin për Presidentin me një minut heshtje tha se ndërrimi i jetës i Presidentit Rugova ishte një lajm shokues që shkaktoi dhembje e pikëllim edhe në mesin e stafit të Ministrisë tonë.

Për veprën dhe jetën e Presidentit fjalë rasti mbajti Fehmi Ismajli, u.d i Sekretarit Permanent i cili tha se Dr. Ibrahim Rugova është emër i njohur në letrat shqipe dhe me opusin e tij të pasur letrar, për një periudhë të gjatë kohore, ka lënë gjurmë të thella në historinë më të re të tyre, në përgjithësi dhe në bashkëkohëzimin e veprës madhore të Bogdanit, në veçanti. Ismajli njoftoi se MASHT, duke u bazuar në këtë krijimtari të pasur e cila ka bërë kthesa në letërsinë shqipe, para pak kohësh, e ka propozuar dr. Rugovën për çmimin kombëtar “Azem Shkreli” për vepër jetësore.

Ismajli tha se, fusha e letërsisë nuk ishte e vetmja për dr. Ibrahim Rugovën. “Që kur ai u zgjodh kryetar i Shoqatës së Shkrimtarëve të Kosovës, në vitin 1984, filloi angazhimet e tij edhe në fushën e politikës, të cilën nuk e zgjodhi, por iu imponua, në të cilën me sukses të plotë u ngrit në piedestalin më të lartë, duke u zgjedhur katër herë radhazi president i Kosovës”, tha z. Ismajli duke pohuar se ai bë njëri nga figurat më të njohura dhe më të pranuara, jo vetëm në Kosovë por edhe jashtë saj.

Sipas Ismajlit dëshmi e këtij suksesi janë mirënjohjet e shumta e të ndryshme që iu dhanë presidentit Rugova nga institucione të ndryshme ndërkombëtare. Duke folur për rolin e arsimit shqip gjatë viteve 90-ta Fehmi Ismajli tha se në luftën e përgjithshme të cilën me mençuri e udhëhoqi presidenti Rugova, arsimi shqip u pavarësua, u riorganizua në të gjitha segmentet e tij, duke u bërë, kështu, bastion i pamposhtur. “Kështu, arsimi shqip i Kosovës, duke u bërë ballë të gjitha sulmeve, masave diskriminuese dhe represionit sistematik u bë shtylla kryesore e shtetit të ri të Kosovës”, tha Ismajli.

Në fund të mbledhjes komemorative, zv. Ministri Fevzi Berisha njoftoi pjesëmarrësit për Librin e pikëllimit i cili është hapur në ambientet e MASHT si dhe apeloi të punësuarit dhe të gjitha institucionet arsimore që me përkushtim, disiplinë dhe mobilizim të shtuar të kontribuojnë në përballimin sa më të lehtë të momenteve të vështira që solli ndarja fizike me Presidentin. Berisha njoftoi se Ministri Veliu po vazhdon aktivitetet në Qeveri dhe atij po i arrijnë shumë telegrame ngushëllimi nga shkollat, organizatat dhe institucionet vendore e ndërkombëtare.

Ministri i MASHT Agim Veliu ka pohuar se Kosova dhe arsimi shqip që mbijetoi falë veprës së Presidentit Rugova, humbën njeriun e madh, mikun e arsimit e të dijes.