Deklarime dhe mesazhe ngushëllimi për Presidentin Ibrahim Rugova: Puna e pandërprerë e Presidentit Rugova së shpejti do të kurorëzohet me Pavarësinë e Kosovës

Deklarime dhe mesazhe ngushëllimi për Presidentin Ibrahim Rugova: Puna e pandërprerë e Presidentit Rugova së shpejti do të kurorëzohet me Pavarësinë e Kosovës

Prishtinë, 23 janar 2006 /TN /QIK - Vazhdojnë të arrijnë deklarime dhe mesazhe ngushëllimui për Presidentin Ibrahim Rugova nga mbarë Kosova, Evropa, Amerika dhe vende të tjera të botës.

Organizata Studentore Shqiptaro Amerikane në Michigan në emër të saj dhe të gjithë shqiptarëve në Amerikë, i ka shprehur ngushëllimet më të sinqerta familjes së Presidentit Rugova, Kuvendit të Kosovës, Qeverisë së Kosovës, Grupit Negociator si dhe gjithë popullit Shqiptar për këtë humbje te madhe.

"Ne shprehim besimin se kontributi dhe puna e pandërprerë e Presidentit Rugova në drejtim të arritjes së qëllimit final të kërkuar nga të gjithë shqiptarët së shpejti do të kurorëzohet me Pavarësinë e Kosovës, duke plotësuar kështu amanetin e tij".
Mburremi ne në Perëndim për burrështetasin që do ta dëshironte ta kishte secili popull
Me dhimbje të madhe morëm lajmin e vdekjes së presidentit tonë z.Ibrahim Rugova, i cili na tronditi pa masë ne mërgimtarëve nga kantoni i Valisit në Zvicrës. "Mburremi kudo që jemi në perëndim se patëm një burrështetas që do ta dëshironin ta kishin në mesin e tyre secili popull", thuhet ndër të tjera në telegramin e bashkatdhetarëve në Valis të mbledhur në Qendrën kulturore islamike me seli në Visp.
Humbja e Presidentit Rugova dhimbje për të gjithë popullin shqiptar

"Me pikëllim dhe dhimbje të thellë, morëm lajmin e vdekjes së presidentit tonë të dashur Dr.Ibrahim RUGOVA. Humbja e tij në këtë moment kritik për fatet e Kosovës, shkaktoi një dhimbje jo vetëm për familjen dhe të afërmit, por edhe për të gjithë popullin shqiptar kudo që ndodhet!", thuhet në ngushëllimin e shoqatës "Arbëria", në Istrisë.
Ngushëllime për vdekjen e Babait dhe Rilindasit të shekullit XX Dr.Rugova

Nxënësit e shkollës shqipe në Verden të Gjermanisë së bashku me mësuesin e tyre Shaban Bërbatovci shprehin ngushllimet më të thella shpirtërore për vdekjen e "Kryetarit, Babait dhe Rilindasit të shekullit XX Dr.Ibrahim Rugova", drejtuar Familjes Rugova, Kuvendit të Kosovës, LDK-së si dhe Popullit të Kosovës.

Partitë politike dhe institucioneve të tregojnë maksimumin e unitetit për pavarësi
Komuniteti shqiptarë në Zelandë të Re i tubuar në -Auckland për vdekjen e Presidentit Ibrahim Rugova i shpreh ngushëllime të thella familjes Rugova, Kuvendit të Kosovës, Kryeministrit Kosumi dhe mbarë popullit të Kosovës duke porositur, “në këto momente të vështira për popullin e Kosovës udhëheqsit e partive politike dhe institucioneve tjera shtetërore që të tregojnë maksimumin e unitetit të tyre për pavaresinë dhe sovranitetin e Kosovës”.
Ne besojmë që në ditën e shpalljes së Pavarësisë shpirti i Tij do të jetë pranë nesh
"Presidenti Rugova me të drejtë u quajt Patriark i Pavarësisë dhe President Historik i Kosovës dhe ne besojmë që në ditën e shpalljes së Pavarësisë së Kosovës, shpirti i Tij do të jetë pranë nesh në ngritjen e flamurit të Pavarësisë”, thuhet në telegramin e ngushëllimit të Shoqatës farmaceutike të Kosovës drejtuar familjes Rugova, Kuvendit, Kryeministrit.
Rugova mbeti frymëzim i atdhedashurisë, thotë boksieri i njohur Luan Krasniqi
"Lajmi për vdekjen e kryetarit tonë të dashur Dr.Ibrahim Rugova, më pikëlloi thellë. Ju lutem pranoni ngushëllimet e mia më të sinqerta dhe të familjes time”, thuhet në telegramin e Luan Krasniqit, boksierit me famë botërore.

“Vepra gandiose e Dr.Ibrahim Rugova është e do të jetë kurdoherë shembull i njeriut me vlera madhore që la gjurmë të pashlyeshme në letrat shqipe, në jetën politike, atë kulturore e mbi të gjitha në historinë kombëtare për sendërtimin e lirisë dhe pavarësisë së plotë të Kosovës të cilës ia kushtoi tërë jetën”, thuhet në telegramin e Krasniqit drejtuar Familjes Rugova, presidencës së Kosovës, Kryetarit të Kuvendit akad.Dacit, Kryeministrit Kosumi, qytetarëve të Kosovës.

“Dr.Ibrahim Rugova ishte dhe mbeti frymëzim i atdhedashurisë, sinonim i rrugës së mirëfilltë që Kosovën dhe qytetarët e saj i shpie drejt lirisë së përhershme, drejtë paqes së përhershme, drejtë demokracisë e sovranitetit të gjithmbarshëm, në familjen e madhe Evropiane dhe atë Verioantlantike", thuhet ndër të tjera në telegramin e ish-kampionit evropian Luan Krasniqi.

Rugova është dhe do të jetë një emblemë e njohjes së Kosovës”
"E nderuara familje Rugova dua të ju sigurojë se Presidenti Rugova ka qenë, është dhe do të jetë një emblemë e njohjes së Kosovës jo vetëm tek bashkatdhetarët, por edhe tek popullata belge dhe autoritetet", shkruajnë Enver Veseli nga Namuri në Belgjikë, dhe Hamza Halabaku me familje nga Nürnbergu-Gjermani.