Suedi: Humbje e madhe

Suedi: Humbje e madhe

Malmë, 22 janar 2006 /TN
Ramadan RESHITAJ

Vdekja e Presidenit të Kosovës, dr Ibrahim Rugova, në mesin e shqiptarëve që jetojnë në Suedi ka zgjuar dhëmbje. Njerëzit ndjejnë dhembje për këtë humbje shumë të madhe jo vetëm për Kosovën.

Për të nderuar figurën e dr Rugovës, në Horby, sot është mbajtur Mbledhje Komemorative, të cilën e ka organizuar dega e LDK në Suedi, ku përpos anëtareve të LDK, kanë marrë pjesë edhe shumë veprimtarë të tjerë që jetojnë në Suedi.

Shtypi, Radio e televizioni shtetëror si dhe masmediat elektronike të këtushme, lajmit për vdekjen e Presidentit Rugova i kushtojnë rëndësi të dorës së parë.

Shumë gazeta, përshfshirë edhe Agjencinë Shtetërore të Lajmeve TT, përpos biografisë së dr Rugovës, po botojnë edhe komente e shkrime analitike për veprën e tij. Në këto shkrime po dominon konstatimi se Rugova ishte një emër i madh me përmasa ndërkombëtare, moto e të cilit ishte liria dhe pavarësia e Kosovës me mjete paqësore dhe me demokraci.

Ministresha e Punëve të Jashtme të Suedisë, Lelja Freivads, duke shprehur ngushëllime për vdekjen e Rugovës, në një deklaratë zyrtare, thekson se ai ishte një emër përmbledhës i kërkesave të shqiptarëve të Kosovës dhe kishte rol vendimtar në negociatat për statusin final të Kosovës. Unë shpresoj, thotë ajo, se këto negociata do të vazhdojnë dhe qetësia do të mbretërojë edhe mëtutje në Kosovë.

Kryetari i ndjerë Ibrahim Rugova këtu vlerësohet si Gandi i Kosovës dhe si njeri i paqes angazhohej që me mjete politike të zgjidhet çështja e Kosovës.