TREPCA.NET: Telegram ngushëllimi me rastin e ndërrimit jete të Presidentit Ibrahim Rugova, drejtuar: Institucioneve të Kosovës, Familjes Rugova, shqiptarëve kudo në botë dhe miqve të Presidentit


22 janar 2006 /TN

Nga TREPCA.NET

Telegram ngushëllimi

Drejtuar :
- Kryetarit të Kuvendit të Kosovës,
- Kryeministrit të Kosovës,
- Kryesisë së nderuar të LDK-së,
- Familjes së nderuar të Presidentit Rugova,
- Qytetarëve të dashur të Kosovës,
- Shqiptarëve në të katër anët e globit, dhe
- Gjithë Miqve të dashur të Presidentit në botë.

Me rastin e ndërrimit jete të zotit Ibrahim Rugova, Presidentit të Kosovës, Ju lutemi pranoni ngushëllimet e mia më të thella dhe të gjithë bashkëpunëtorëve të faqes në internet, Trepca.net.

Në këto momente të dhembjes, ndihemi krenar që patëm një President aq të dashur, të vyer e të nderuar nga populli shqiptar dhe gjithë bota mbarë.

Si në momentet më të vështira ashtu edhe në ato më të mira, Ai gjithmonë ishte në gjirin e popullit të Tij. Në mendje kishte vetëm një ideal, Kosovën e pavarur.

Largpamësia e Tij politike e para 17 vjetësh, sot po mahnitë politikën botërore.

Familja e nderuar e Rugovës, Kosova, Ballkani, Evropa dhe Bota po ndahen nga një Burrështetas bujar e atdhetar i një shteti të vogël në formësim e sipër. Jeta dhe vepra e Tij do të nderohet e kujtohet brez pas brezi.

Dashtë zoti që ëndrra e Tij e madhe dhe jona, Shpallja e Pavarësisë së Kosovës të kurorëzohet sa më shpejtë.

I falemi kujtimit të Tij të përjetshëm.
Lavdi jetës dhe veprës së Presidentit Rugova.
I qoftë i lehtë dheu i Kosovës së lirë.
Zoti e bekoftë Familjen Rugova.
Zoti e bekoftë Kosovën.

TREPCA.NET
Në emër të të gjithë bashkëpunëtorëve të Trepca.net-it,
Botuesi, Luftim KELMENDI