Lidhja Demokratike e Kosovës në Norvegji ngushëllon Institucionet e Kosovës dhe Familjen Rugova

22 janar 2006 /TN

Lidhja Demokratike e Kosovës në Norvegji
22 janar 2006, Norvegji
Telegram Ngushëllimi

Kryetarit të Kuvendit të Kosovës
Akademik Nexhat DACI
Kryesisë së LDK-së
z. Kolë Berisha - Nënkryetar
Familjes RUGOVA

I nderuari Akademik Daci

Me pikëllim të thellë morëm lajmin që Presidenti i Kosovës Dr. Ibrahim RUGOVA ndërroi jetë. Lajmi i hidhur tronditi bashkatdhetarët me banim në Norvegji dhe opinionin paqedashës norvegjez, të cilët nga momenti i dhënies së lajmit, pareshtur shprehën keqardhje dhe ngushëllime në formë të shkruar dhe telefonike në adresë të LDK-së, Dega në Norvegji.

Ngjarja e 21 janarit padyshim është një ndër ngjarjet më të hidhura për qytetarët e Kosovës dhe për shqiptarët kudo që janë. Ora 11,38, ndau fizikisht nga ne Udhëheqësin historik të Kosovës Dr. Ibrahim RUGOVËN, i cili me mençurin politike dhe guximin patriotik për vite më radhë e udhëhoqi popullin e Kosovës drejt çlirimit nga okupatori serbë dhe punoi intensivisht në ndërtimin e institucioneve të qëndrueshme dhe demokratike të Kosovës.

I nderuari Akademik Daci, më lejoni që në emër të kryesisë, anëtarësisë dhe simpatizantëve të LDK-së në Norvegji të shprehi ngushëllimet tona me rastin e vdekjes së Presidentit të Kosovës Dr. Ibrahim RUGOVA. Dega e LDK-së dhe bashkatdhetarët me banim në Norvegji me të drejtë presim nga JU dhe udhëheqja aktuale e Kosovës në realizim të plotë të idealit të Presidentit Rugova, dhe njëherit dëshirë dhe kërkesë e qytetarëve të Kosovës, të punohet me përgjegjësi në njohjen e Pavarësisë së Kosovës.


I nderuari z. Berisha
E nderuara kryesi e LDK-së

Në këto çaste të vështira për JU, ku ligji I natyrës kësaj radhe nuk ishte në anën tonë, duke e ndarë fizikisht nga JU dhe qytetarët e Kosovës Ikonën e Pavarësisë së Kosovës dr. Ibrahim RUGOVA, shpresojmë që pikëllimi dhe dhimbja për liderin tonë të madh do të shndërrohet në forcë dhe dije për ta vazhduar rrugën e prijësit tonë të dashur, kjo do të ishte dhurata më e mirë që mund ti bëhet Liderit tuaj dhe Presidentit të Kosovës, tashmë të ndjerë dr. Ibrahim RUGOVA. Pranoni ngushëllimet tona dhe dalshi faqebardhë!

E nderuara Familje RUGOVA

Në emër të Degës së LDK-së në Norvegji shprehim ngushëllimet më të sinqerta për JU dhe të gjithë qytetarët e Kosovës me rastin e vdekjes së bashkëshortit, babait dhe Presidentit Historik të Kosovës dr. Ibrahim RUGOVA. Sikurse që puna dhe vepra e Presidentit Rugova do të zërë vend të veçantë në histori ashtu dhe puna dhe mundi juaj do të shënohet në historinë e Kosovës.

Lutemi që shpirti i Presidentit të prehet në paqe.
Zoti e bekoftë punën e Presidentit.


Kryesia e Degës së LDK-së
Me respekt
Daut Haxhaj - kryetar