Presidenti Rugova ua shpëtoi jetën miliona njerëzve, thanë qytetarët, ndërsa e nderonin me qirinj të ndezur

Presidenti Rugova ua shpëtoi jetën miliona njerëzve, thanë qytetarët, ndërsa e nderonin me qirinj të ndezur

Prishtinë, 21 janar 2006 /TN /QIK - Mijëra qytetarë të kryeqytetit dhe mijëra të tjerë anembanë qyteteve të Kosovës ndezën nga ora 19.00 qirinj në shenjë nderimi për dritësimin e shpirtit të Presidentit Ibrahim Rugova, i cili ndërroi jetë sot.

Pandërprerë gjatë gjithë kohës vazhdonin të vinin qytetarë për të ndezur qirinj, në shkallët e Teatrit Kombëtar, ndërsa atyre u janë bashkuar kryeministri Bajram Kosumi me tërë kabinetin e tij qeveritar, kryetari i Kuvendit Komunal të Prishtinës Ismet Beqiri me kreun komunal, udhëheqës të LDK-së e të Forumeve të tij, si dhe shumë personalitete politike dhe të kulturës.
"Presidenti Rugova është i pazëvendësueshëm për miqësinë që na krijoi me Amerikën e Evropën, por edhe për meritën që shpëtoi miliona veta nga vdekja, jo vetëm shqiptarë, por edhe të tjerët", tha Jahja Rapushaj, bukëpjekës, ndërsa nuk mund të qetësonte vrullin e dhembjes që e ngashënjente. "S'e kemi pritur këtë ditë kështu. Kemi besuar të ishte pas pavarësisë", thotë ai.

Ndërsa, Salihu, një pensionist nga Kosova, tha se isha në qytet kur mora vesh lajmin, "gjithçka m'u rrokullis, nuk po mund ta besoja, u preva, u shtanga". Ai thotë se këtë se kishte pritur përkundër sëmundjes vrastare, e cila e shëmtoi aq shumë vendin në këtë kohë. "Kosova mbet keq në çastet vendimtare, pa heroin e shtegëtimit drejt pavarësisë. Thënë të vërtetën kam frikë se punët nuk mund të shkojnë ashtu siç po shkonin me Presidentin", përfundon ai.
"Ne duhet të jemi të kënaqur se ka lindur një njeri kaq madhështor, humanist dhe njeri i mirë si ai", thotë Idriz Sejdiu, që së bashku me bashkëshorten rrinte në shkallët e Teatrit Kombëtar, ku po ndrinin mijëra qirinj, sikur po prisnin që diçka do të kthehej, do të vinte sërish.

"Ai është i pazëvendësueshëm, ai do të mbetet përherë në mendjet tona. Rrugën e tij duhet ta vazhdojnë politikanë tanë", thotë Ajkuna Sejdiu, pa mundur t'i përmbajë lotët dhe emocionet, që dukej se fshehnin dhembje dhe mllef.
Vdekja e hershme e Presidentit 61 vjeçar dr.Ibrahim Rugova, ka pllakosur vendin jo vetëm në dhimbje të zezë, në lot, në psherëtima, e dënesje, që ta kujtojnë kujën për kryeheroin kombëtar Gjergj Kastriotin, por edhe në frikë se kush do ta udhëheq vendin në rrugën e mëtejme drejt pavarësisë, a do të munden ta shtyjnë procesin në fund të tij, kur aq pak dhe aq shumë ka mbetur?.