Humbja e Rugovës, përbën apel për popullin dhe klasën politike që të jenë më të bashkuar se kurrë

Humbja e Rugovës, përbën apel për popullin dhe klasën politike që të jenë më të bashkuar se kurrë

Prishtinë, 21 janar 2006 /TN /QIK - Presidenti i Republikës së Shqipërisë, Alfred Moisiu, i dërgoi sot një mesazh ngushëllimi Kryetarit të Kuvendit të Kosovës, Nexhat Daci, me rastin e ndarjes nga jeta të Presidentit Ibrahim Rugova.
Në mesazhin e z. Moisiu ndër të tjera thuhet: “Me hidhërim të thellë mora vesh lajmin e ndarjes nga jeta të Presidentit të Kosovës, burrit të shtetit dhe mikut tim, Ibrahim Rugova.

Kjo është një humbje e madhe për popullin e Kosovës, për popullin shqiptar, dhe që e ndjen e gjithë bota shqiptare.
Ibrahim Rugova është udhëheqësi historik i Kosovës. Ai ia kushtoi tërë jetën e tij ardhmërisë së Kosovës dhe ka një meritë të veçantë në futjen e Kosovës në axhendën ndërkombëtare dhe në orientimin e saj drejt pavarësisë.
Rugova mishëronte cilësi të vyera të popullit të tij. Mençuria dhe urtësia e tij u bënë simbol i rezistencës paqësore, një etapë që do të mbetet e pashlyeshme në historinë e Kosovës.

Rezistenca paqësore, lufta çlirimtare dhe sakrificat e popullit, prodhuan Kosovën e sotme, një vend që po shkon drejt pavarësisë, si një shtet demokratik dhe europian.
Edhe në këto momente të dhimbjes së madhe, humbja e Rugovës, përbën një apel për popullin dhe klasën politike të Kosovës, për të qenë më të bashkuar se kurrë në emër të idealeve të mëdha, të cilave ia kushtoi jetën edhe Rugova.
Me pikëllim të madh, në emër të popullit shqiptar dhe në emrin tim personal i shpreh ngushëllimet më të thella familjes, popullit dhe qeverisë së Kosovës”.