Deklaratë e Qeverisë: Kosova humbi jo vetëm Presidentin, por edhe njeriun e politikanin më vizionar

Deklaratë e Qeverisë: Kosova humbi jo vetëm Presidentin, por edhe njeriun e politikanin më vizionar

Prishtinë, 21 janar 2006 /TN /QIK - Vdekja e Presidentit të Kosovës, Dr. Ibrahim Rugova, është lajmi më i pikëlluar për Kosovën dhe qytetarët e saj. Me dhimbje të thellë kemi marrë lajmin mbi vdekjen e Presidentit Rugova, simbolit të lirisë dhe pavarësisë së Kosovës.
Qeveria e Kosovës ndan pikëllimin me familjen e Presidentit dhe beson se ajo do të gjejë forcë për ta tejkaluar dhimbjen me rastin e humbjes së më të dashurit të saj.
Qytetarët e Kosovës kanë humbur njeriun e vizioneve paqësore dhe të historisë së re të Kosovës. Vdekja e Presidentit është humbje e madhe për popullin e Kosovës në këto momente vendimtare për të ardhmen tonë.
Kosova humbi jo vetëm Presidentin e saj por edhe njeriun e politikanin më vizionar dhe qëndrimi politik, emri dhe vepra e të cilit do të mbeten përherë në kujtesën e kombit shqiptar.
Me forcën e tij njerëzore ai i ka dhënë vulë historisë së re të Kosovës dhe ka besuar e punuar fuqishëm në idealet e larta për shtetin e Kosovës, duke siguruar një respekt të madh në mesin e qytetarëve të Kosovës dhe të bashkësisë ndërkombëtare.
Qeveria i bën thirrje popullit të Kosovës që në këto çaste të ruaj qetësinë dhe të vazhdojë punën drejt ndërtimit të një të ardhmeje më të mirë për të gjithë.
Në këto çaste pikëllimi për Kosovën na duhet më shumë se kurrë bashkimi dhe forca jonë për të tejkaluar dhembjen e madhe për njeriun e paqes dhe të pavarësisë.
Pjekuria dhe uniteti ynë në këtë momente të rëndësishme dhe historike për Kosovën do të na shërbejnë në ndërtimin e të ardhmes sonë.