Forumi Rinor i LDK-së gëzon epitetin e organizatës më të fuqishme në Kosovë

Forumi Rinor i LDK-së gëzon epitetin e organizatës më të fuqishme në Kosovë

Prishtinë, 30 dhjetor 2005 /TN /QIK - Forumi Rinor i Lidhjes Demokratike të Kosovës e përmbyll vitin 2005 me të paktën tri ngjarje kryesore të zhvilluara nga ai, si procesi zgjedhor në vetë organizatën, hartimi i strategjisë zhvillimore për tri vitet e ardhshme dhe planifikimi i aktiviteteve dhe projekteve për vitin 2006, vlerësoi sot Sejdë Tolaj, kryetar i këtij subjekti rinor.
"FR LDK-ja gjatë 2005 ka realizuar me sukses projekte të cilat kanë qenë të një rëndësie kapitale për të rinjtë e Kosovës", tha Tolaj dhe se sipas tij, që të gjitha kanë bërë që "me mburrje të mund të vlerësohet që FR ta gëzojë epitetin si organizata më serioze, më masive dhe më e fuqishme rinore politike në vend".
Tolaj, në takimin me gazetarë në përmbyllje të vitit të ri, numëroi disa nga aktivitetet më të rëndësishme të Forumit Rinor, si bashkëpunimet me përfaqësues të organizatave rinore shqiptare dhe ndërkombëtare, organizimin e konferencave, tryezave e debateve në lëmin e politikës, edukimit, demokratizimit, sigurisë etj.

Ai poashtu ka përkujtuar organizimet e bëra në fushën e kulturës si të festivaleve të ndryshme, të panaireve e spektakleve. Poashtu Forumi, tha Tolaj, ka organizuar aktivitete rinore për luftimin e dukurive negative te të rinjtë, ndërsa që ky Forum nuk ka harruar as sportin duke organizuar aktivitete të shumta sportive.

Sipas Tolajt, Forumi i ka kushtuar rëndësi edhe edukimit dhe trajnimit të vetë anëtarësisë së vet, duke organizuar trajnime si në planifikimin strategjik të buxhetit, menaxhimin në fushatat zgjedhore etj.
Aktivitete të tjera që FR ka kryer gjatë këtij viti ishin edhe manifestimet kushtuar festave të rëndësisë kombëtare, si 24 marsi, dita e ndërhyrjes ushtarake të NATO-s dhe 10, 11, 12 qershori si ditët e çlirimit, pastaj 2 korrikun ditën e Republikës dhe 7 shtatorin ditën e Kushtetutës së Kaçanikut, 28 nëntorin Ditën e Flamurit Kombëtar etj.