Që nga viti i ardhshëm në Itali do të punësohen 4.500 punonjës sezonalë shqiptarë, tha ministri i jashtëm italian

Që nga viti i ardhshëm në Itali do të punësohen 4.500 punonjës sezonalë shqiptarë, tha ministri i jashtëm italian

Tiranë, 29 dhjetor 2005 /TN /QIK - Ministri i Jashtëm i Italisë Xhankfranko Fini deklaroi në Tiranë se "midis Shqipërisë dhe Italisë ekziston një marrëdhënie e lartë miqësie, e cila është rinovuar në kohë".

"Dhe nuk hezitoj aspak kur konfirmoj se midis qeverisë së re të z. Berisha dhe qeverisë sonë, ka patur me të vërtetë një përmirësim shumë të dukshëm të këtyre marrëdhënieve. Italia është një partner ekonomik e tregtar shumë i rëndësishëm për Shqipërinë", u shpreh Fini pas takimit me kryeministrin Sali Berisha.
Fini paralajmëroi se Shqipëria do të bëhet një treg shumë tërheqës për investimet dhe kapitalet e huaja dhe sidomos për ato italiane. "Dua të theksoj se bashkëpunimi mes dy qeverive tona është një bashkëpunim shumë i fuqishëm dhe real, për të luftuar në radhë të parë kriminalitetin dhe fenomenet e tjera negative".
Fini tha se Italia ditë më parë mori një vendim shumë të rëndësishëm për të rritur kuotat e punonjësve sezonalë shqiptarë, me më shumë se 30% , të cilat do të hyjnë në fuqi nga viti që vjen. "Pra nuk do të jetë më ajo kuotë prej 3.000 punonjësish por do të bëhen 4.500 punonjës sezonalë", tha Fini.


Ministri i Jashtëm italian Fini është takuar mbrëmë në Tiranë me Kryeministrin Berisha

Tiranë, 29 dhjetor 2005 /TN /QIK - Ministri i Jashtëm i Italisë, Xhanfranko Fini është takuar mbrëmë në Tiranë me kryeministrin e Shqipërisë, Sali Berisha. Gjatë takimit, Berisha ka theksuar rëndësinë që ka zgjidhja e statusit të Kosovës për tërë rajonin. Kryeministri i Shqipërisë ka përsëritur se Tirana këmbëngul në të drejtave të pakicave në Kosovë, përfshirë edhe atë të serbëve.
Nga ana e tij, ministri i Jashtëm italian, sipas agjencive të lajmeve, ka deklaruar se mbështet qëndrimin e kryeministrit Sali Berisha. Fini ka theksuar rolin aktiv që BE ja ka në procesin e zgjidhjes së statusit të Kosovës. Vizita në Tiranë i jep fund turneut ballkanik të shefit të diplomacisë italiane.