Fjala e Ministrit të arsimit z. Agim Veliu

Fjala e Ministrit të arsimit z. Agim Veliu
Raporti i punës 2005

29 dhjetor 2005 /TN Prishtinë, 28 dhjetor 2005 - Megjithë problemet e shumta, kryesisht materiale, MASHT ka arritur suksese në realizimin e planeve për këtë vit, për të cilin mendoj se ishte një vit i konsolidimit, në rend të parë për shkak të zgjerimit të faktorëve veprues dhe vendim-marrës në sferën e arsimit, në shtrirjen më të madhe të bashkëpunimit me partnerë vendorë dhe ndërkombëtar, me zbatimin më të mirë të ligjeve, etj.

Angazhimi gjatë këtij viti përkon me objektivat dhe planet e MASHT e të Qeverisë së Kosovës dhe është fokusuar në disa prioritete.

Thellimi i reformës në të gjitha nivelet e shkollimit, zgjerimi i infrastrukturës fizike shkollore, përmbushja e standardeve, etj. kanë qenë disa prej objektivave të cilat MASHT i ka arritur.

Shprehur me shembuj konkret do të përmendja:

- përfundimin e buxhetimit të Strategjisë zhvillimore për arsimin e lartë,
- fillimin e procesit të hartimit të Strategjisë për arsimin parauniversitar,
- transferimin e studentëve të Universitetit të Tetovës në Fakultetin e Mjekësisë të UP-së,
- aplikimi i MASHT që edhe Kosova të bëhet pjesë e Zonës Evropiane të Arsimit të Lartë dhe të Zonës Evropiane për Hulumtime, përmes anëtarësisë së plotë të saj në Procesin e Bolonjës.
- nënshkrimi i Memorandumit të mirëkuptimit me UP-në dhe MEF për menaxhim me mjete vetanake, nënshkrimi i i Kontratës kolektive me SBASHK-un dhe bashkëpunimi i vazhdueshëm që ka shmangur problemet dhe ka ofruar zgjidhje të pranueshme duke u bazuar në mundësitë buxhetore të Qeverisë së Kosovës,
- përmbushja e standardeve që i përkasin MASHT-tit (janë përkthyer, botuar dhe shpërndarë programet mësimore për klasat 3, 8 e 12 për minoritetet me mësim në gjuhën boshnjake, turke dhe janë përgatitur në gjuhën serbe me mungesë të lëndës së historisë, komuniteti goran për herë të parë kanë regjistruar klasën e 10 dhe janë duke punuar me plan programet e Kosovës, janë regjistruar në bazë të kuotave dhe janë ofruar lehtësime në Universitetin e Prishtinës për 40 studentë të komunitetit boshnjak, 24 turk dhe 25 RAE me qëllim të ngritjes së nivelit të arsimit të këtyre komuniteteve, etj).
- procesi i zgjidhjes së problemeve në UP ku tashmë është vendosur Bordi Drejtues deri në zgjedhjen e ligjshme të Rektorit,
- përmbyllja e ciklit të parë të zhvillimit të programeve shkollore në të gjitha nivelet e shkollimit parauniversitar, si në arsimin e përgjithshëm, ashtu edhe në arsimin profesional,
- vazhdimi i bashkëpunimit me partnerët dhe donatorët e MASHT ku duhet përmendur nënshkrimi i rreth 30 memorandumeve e kontratave të bashkëpunimit,
- plotësimi e infrastrukturës ligjore me 5 ligje të reja nga të cilat disa janë në procedurë si dhe nxjerrejn e 46 udhëzimeve administrative,
- forcimi i zbatimit të kritereve në procesin e licencimit të Institucioneve të Arsimit Privat me qëllim të ngritjes së nivelin të arsimit dhe konkurrencës së mirëfilltë, konform standardeve ndërkombëtare,
- përfundimi i ndërtimit të 14 objekteve të reja shkollore (9 shkolla fillore dhe 5 shkolla të mesme) në vlerë mbi 6.5 milion euro si dhe renovimi i disa shkollave në vlerë mbi 300 mijë euro, etj.

Ka edhe shumë projekte e të arritura, por edhe sfida që po na përcjellin, përkundër angazhimeve për tejkalimin e tyre.

Vlen të përmendet mos integrimi i komunitetit serb në sistemin arsimor të Kosovës për shkak të politikës destruktive të Beogradit, baza e ultë e të ardhurave të arsimtarëve, infrastruktura e pamjfatueshme shkollore, etj. për çka MASHT ka kërkuar që arsimi të jetë ndër prioritetet e Qeverisë.

MASHT poashtu ka përcaktuar prioritetet e punës për vitin 2006 që kryesisht kanë të bëjnë me:

- përfundimin e hartimit të Strategjisë së arsimit parauniversitar,
- përmbushjen në tërësi të standardeve që i përkasin fushës së arsimit,
- krijimin e kushteve për arsimim për të gjithë në Kosovë,
- zgjerimin dhe përmirësimin e hapësirës shkollore,
- vazhdimin e reformave arsimore në të gjitha nivelet e arsimit (ngritja e cilësisë së mësimdhënies dhe mësimnxënies),
- plotësimin e bazës ligjore me ligje të reja,
- integrimin e të gjitha minoriteteve në sistemin unik arsimor, me theks të veçantë inkurajimi i minoritetit serb që të kyçet më me sukses në sistemin arsimor të Kosovës,
- vazhdimin e bashkëpunimit me të gjithë donatorët dhe partnerët e MASHT,
- bashkëpunimin me vendet në rajon dhe më gjerë, veçantë me vendet ku jetojnë përkohësisht bashkëqytetarë tanë lidhur me arsimin e fëmijëve në diasporë, etj.

Për ne 2005-shi mbetet një vit i vazhdimësisë për reforma përmbajtësore institucionale në arsim, që sigurojnë cilësi dhe shkollim çfarë të gjithë e dëshirojmë për fëmijët tanë dhe Kosovën e pavarur.

Urime festat...