"Do të krijojmë një shtet me vlera evropiane", ka thënë Kosumi në takimin me Finin

"Do të krijojmë një shtet me vlera evropiane", ka thënë Kosumi në takimin me Finin

Prishtinë, 28 dhjetor 2005 /TN /QIK - Kryeministri i Kosovës Bajram Kosumi, i shoqëruar nga zëvendëskryeministri Adem Salihaj, priti në një takim të veçantë ministrin e Jashtëm të Italisë, Xhanfranko Fini (Gianfranco Fini).
Siç thuhet në një komunikatë, Kosumi dhe Fini kanë biseduar për zhvillimet e fundit në Kosovë pas fillimit të misionit të kryenegociatorit Marti Ahtisari, respektivisht rreth përgatitjeve që janë bërë për procesin negociues për definimin e statusit final të Kosovës, si dhe për çështjen e integrimit të pakicave.
Kryeministri Kosumi e ka falënderuar ministrin Finin për interesimin dhe angazhimin e Italisë në Kosovë, duke shtuar se Qeveria e Kosovës është e përkushtuar për zgjerimin e marrëdhënieve midis të dy vendeve në fusha të ndryshme, me theks të veçantë në fushën e ekonomisë.
Më pas, Kosumi ka vlerësuar se Qeveria dhe institucionet tjera vendore kanë treguar përkushtim në përmbushjen e standardeve dhe si rezultat i këtij angazhimi KS i KB së ka dhënë dritë jeshile për fillimin e bisedave për statusin final të Kosovës.

"Ky proces është rezultat i investimit afatgjatë i gjithë popullit të Kosovës, por edhe perceptim i yni se përmbushja e standardeve ngritë shkallën e demokracisë në Kosovë, si dhe integrimin e saj në Bashkimin Evropian", është shprehur kryeministri Kosumi.
Duke folur për çështjen e integrimit të grupeve etnike në shoqërinë dhe institucionet e vendit, kryeministri Kosumi ka konfirmuar përkushtimin dhe vendosmërinë e Qeverisë së Kosovës për ndërtimin e një shteti me vlera evropiane, ku të gjithë qytetarët pa dallim etnie do të jenë të barabartë.

Në këtë drejtim, Kosumi ka njohur shefin e diplomacisë italiane edhe për nismën e tij për dialog me të gjitha strukturat e shoqërisë në kuadër të Planit të Veprimit, përmes të cilit synohet krijimi i besimit te të gjithë qytetarët e Kosovës për procesin e definimit të statusit final të Kosovës.
"Kur flasim për një shoqëri demokratike, mendojnë për një Kosovë të mirë për të gjithë qytetarët e saj", tha Kosumi, duke shtuar se, "do të krijojmë një shtet me vlera evropiane, ku grupet etnike do të ndërtojnë ardhmërinë e tyre".
Po ashtu, ai ka theksuar përkushtimin e institucioneve të vendit se edhe gjatë bisedimeve për statusin, si dhe pas definimit të statusit do të vazhdohet me përmbushjen e standardeve dhe ka shtuar se është konsensus i përgjithshëm se edhe pas definimit të statusit Kosova ka nevojë për prezencën e NATO s dhe përkrahjen e vazhdueshme të institucioneve të Bashkimit Evropian.
Gjatë këtij takimi, Kosumi dhe Fini kanë biseduar edhe për zhvillimet ekonomike në Kosovë dhe rajon. Në këtë kuadër, kryeministri Kosumi ka theksuar se pa definimin e statusit final të Kosovës nuk mund të ketë një zhvillim të hovshëm ekonomik, ngase mungesa e statusit është faktor frenues për investimin e kapitalit të huaj.
Në lidhje me raportet e Kosovës me vendet fqinje dhe zhvillimet rajonale, Kosumi ka theksuar se ka një avancim të marrëdhënieve politike me vendet fqinje dhe nënshkrimi i marrëveshjeve për tregti të lirë me këto vende janë suksese të mëdha të Qeverisë Kosovës, si dhe një tregues tjetër se shteti i Kosovës do të jetë faktor paqeje dhe stabiliteti në rajon.
Ministri i Jashtëm italian, Xhanfranko Fini ka ndarë të njëjtat mendime me kryeministrin Kosumi se stabiliteti dhe qëndrueshmëria në rajon është parakusht për zhvillimin ekonomik. Fini po ashtu ka vlerësuar angazhimet e kryeministrit Kosumi dhe të Qeverisë për krijimin e besimit te të gjithë qytetarët e Kosovës dhe për integrimin e grupeve etnike në shoqërinë kosovare, thuhet në fund të komunikatës së Zyrës për shtyp të Kryeministrisë.

Presidenti Rugova për shkak të terapisë, nuk ka takuar ministrin e Jashtëm italian, Fini

Prishtinë, 28 dhjetor 2005 /TN /QIK - Presidenti i Kosovës, Dr. Ibrahim Rugova, nuk ka mundur të realizojë takimin e paraparë për sot (e mërkurë) me ministrin e Jashtëm të Italisë, z. Xhanfranko Fini (Gianfranco Fini), për shkaqe shëndetësore.

Presidenti Rugova gjendet në rezidencën e vet në Velani, ku po i nënshtrohet terapisë së rregullt mjekësore, thuhet në një njoftim të Zyrës për shtyp të Presidentit Rugova.

Anulimi i këtij takimi ka nxitur spekulimet e disa mediave italiane për kinse përkeqësimin e gjendjes shëndetësore të Presidentit Ibrahim Rugova.