Qeveria e Kosovës ka aprovuar Projektligjin për mbrojtje nga fatkeqësitë natyrore

Qeveria e Kosovës ka aprovuar Projektligjin për mbrojtje nga fatkeqësitë natyrore

Prishtinë, 27 dhjetor 2005 /TN /QIK - Në takimin e sotëm Qeveria e Kosovës ka aprovuar Projektligjin për mbrojtje nga fatkeqësitë natyrore dhe nga fatkeqësitë e tjera. Me këtë akt, Qeveria e Kosovës ka plotësuar një zbrazëtirë të sistemit juridik në vendosjen e sistemit unik të mbrojtjes dhe shpëtimit nga fatkeqësitë në Kosovë, thuhet në një njoftim nga ky takim.
Projektligji ka përcaktuar subjektet në sistemin e mbrojtjes dhe shpëtimit ku bëjnë pjesë qytetarët, shërbimet e ndryshme publike si dhe ndërmarrjet dhe institucionet tjera. Nga kjo, të gjithë qytetarët e moshës 18 65 vjeç për meshkuj, për femra deri në 55 vjeç, janë të obliguar që të përfshihen në forcat e mbrojtjes dhe shpëtimit nga fatkeqësitë natyrore dhe fatkeqësitë tjera.

Projektligji përcakton edhe kompetencat e institucioneve të ndryshme në këtë lëmi që nga Qeveria e deri te institucionet tjera në nivelin komunal dhe të ndërmarrjeve të ndryshme.
Institucionet e ndryshme në Kosovë duhet të përgatisin planin dhe programin e veprimit në situata të fatkeqësive të ndryshme. Në këtë drejtim Projektligji parasheh edhe sistemin unik të alarmimit dhe koordinimit emergjent, që do të themelojë dhe mirëmbajë Qeveria e Kosovës.
Projektligji përkufizon edhe masat për mbrojtjen dhe shpëtimin nga fatkeqësitë, por edhe mbrojtjen personale, duke përkufizuar mjetet dhe pajisjet me të cilat duhet të pajisen pronarët dhe shfrytëzuesit e ndërtesave, ndërmarrjet ekonomike, institucionet dhe organizatat qeveritare, për të qenë në çdo moment në dispozicion të qytetarëve.
Forcat për mbrojtje dhe shpëtim nga fatkeqësitë natyrore dhe nga fatkeqësitë e tjera, janë konsideruar sipas projektligjit, ndërmarrjet, institucionet, strukturat operative të organizatave joqeveritare, Trupat e Mbrojtjes së Kosovës, Shërbimi Policorë i Kosovës, Policia e UNMIK ut dhe KFOR i, dhe është përcaktuar veprimi i këtyre forcave në rast të fatkeqësive natyrore dhe fatkeqësive tjera.
Udhëheqja dhe administrimi i forcave për mbrojtje bëhen nga Komiteti Ndërministror për Mbrojtje dhe Shpëtim i Kosovës. Ndërsa në nivele komunale formohen komitete komunale dhe në ndërmarrje komitetet e ndërmarrjeve.
Për mbikëqyrjen e realizimit të dispozitave të këtij Projektligji, do të themelohet Inspektorati i Kosovës për Mbrojtje dhe Shpëtim nga Fatkeqësitë Natyrore dhe Fatkeqësitë Tjera në kuadër të Ministrisë së Shërbimeve Publike të Qeverisë së Kosovës.
Projektligji, gjithashtu rregullon edhe sferat e përgatitjes dhe aftësimit të qytetarëve në mbrojtje nga fatkeqësitë natyrore dhe fatkeqësitë tjera, si dhe financimin dhe dispozitat ndëshkuese për personat juridik dhe fizikë në rast të shkeljes të dispozitave të këtij ligji.
Ligji është vlerësuar se është në harmoni me të drejtën kushtetuese në Kosovë dhe me standardet e legjislacionit evropian, ndërsa implikimet buxhetore të tij janë të ngarkuara në rezervën e shtetit, ndërsa disa nga pozicionet tasmë janë të përfshira në projektet buxhetore në Departamentin e Menaxhimit të Emergjencës dhe Komuna.
Me qëllim të krijimit të kushteve për funksionimin e rregullt të auditimit të brendshëm dhe të Njësisë qendrore harmonizuese në seancën e 181 -të, Qeveria ka miratuar Projektligjin që rregullon gjendjen në këtë segment të rëndësishëm për Kosovën.
Me këtë ligj synohet rregullimi i çështjeve që kanë të bëjnë me auditimin e brendshëm dhe të Njësisë qendrore harmonizuese, në mënyrë që të mos ketë hapësirë për keqpërdorim të parasë publike. Ligji parasheh që të formohet Bordi mbikëqyrës dhe Departamenti i auditimit të brendshëm, i cili ka rol të rëndësishëm në hartimin e rregulloreve dytësore, direktivave dhe praktikave më të mira në menaxhimin transparent të financave publike.
Dispozitat e këtij ligji parashohin preventivën, rekomandimet dhe forma tjera të eliminimit të parregullsive që mund të paraqiten në menaxhimin e parasë publike. Fusha e auditimit të brendshëm deri tash nuk është mbuluar me asnjë dispozitë ligjore apo akt tjetër ligjor.
Departamenti i Buxhetit të Konsoliduar të Kosovës pas shqyrtimeve të nevojshme me propozuesit e këtij projektligji ka lëshuar një deklaratë financiare. Kostoja buxhetore vjetore e zbatimit të këtij projektligji është rreth 150 mijë euro. Në çmimin e këtij projektligji ka ndikuar nevoja e formimit të Bordit mbikëqyrës të Njësisë qendrore harmonizuese dhe ngritjes së kapaciteteve.

Rendi dhe ligji në veri të Kosovës peng i statusit politik, tha Kryeministri Kosumi

Prishtinë, 27 dhjetor 2005 /TN /QIK - Kryeministri i Kosovës Bajram Kosumi, tha sot se çështja e zbatimit të rendit dhe ligjit në veri të Kosovës nuk mund të zgjidhet pa zgjidhjen politike të këtij problemi, që do të zgjidhet bashkë me statusin.
Kosumi ka vlerësuar shumë lart punën e Qeverisë gjatë këtij viti, e cila kishte takimin e fundit vjetor, ndërsa tha se është i kënaqur në veçanti me punën e çdo ministrie, por edhe për realizimin e programit të punës.

Ai tha se për një vit qeveria ka vazhduar disa nga projketet e filluara nga qeveria paraprake, ndërsa shumë më shumë ka filluar projekte të reja, si projektin planit zhvillimor të Kosovës, politikat afatmesme buxhetore etj.
Kosumi tha se ka një listë prej 20 çështjesh në të cilat qeveria ka shënuar progres, ndërsa një raport për punën njëvjeçare të qeverisë do të miratohet nga qeveria në janarin e ardhshëm.
Kryeministri si një nga arritjet më të mëdha të 2005-ës ka vlerësuar lart fillimin e procesit të bisedimeve për statusin e Kosovës.
Ai ka rikujtuar edhe çështjen e veriut të Kosovës, si një problem madhor të politikës nacionale, të cilin e vlerësoi parasëgjitha si çështje politike.
"Në pjesën veriore të Mitrovicës dhe Kosovës janë dy lloje zgjidhjesh. Funksionimi i rendit dhe ligjit, që aktualisht po e bëjnë, grupe informale, jolegjitime. Zgjidhja e dytë që është kryesore, dhe i paraprin të parës, është zgjidhja politike", tha Kosumi. Ai tha se çështja e unifikimit, përkatësisht integrimit të veriut do të shtrohet gjatë diskutimeve të statusit dhe që do të zgjidhet me zgjidhjen e statusit.
Ai quajti të sukseshëm planin e qeverisë për pilot komunat, meqë tri nga pesë të parashikuarat janë formuar dhe "janë mirëpritur nga qytetarët". "Oferta e qeverisë nuk është mirëpritur vetëm nga pakica serbe për shkaqe politike me qëllim të kundërshtimit të procesit", tha Kosumi, ndërsa rikujtoi se kjo pakicë pavarësisht ineteresave jetësore reale po i nënshtrohet ineteresave politike të Beogradit.
Ndërsa, sa i përket çështjes së operatorit të dytë të telefonisë mobile në Kosovë, Kosumi tha se kjo është kompetencë e bartur tek qeveria dhe prandaj, vendimi i qeverisë për rivlerësimin e tenderit për telefoninë e dytë mobile, beson se do të mbetet në fuqi, dhe jo ndërhyrja e UNMIK-ut, për rishpallje të tenderit. Vendimi i qeverisë tha se është marrë pas ngecjes njëvjeçare të kësaj çështjeje.
Kosumi tha se plani legjislativ i qeverisë për 2006 i është paraqitur në këtë mbledhje, ndërsa që ky draft do të miratohet në mbledhjen e parë të vitit të ardhshëm.
Ai tha se 70 projekligje të qeverisë janë miratuar nga Kuvendi gjatë një viti pune, ndërsa qeveria e parë e pasluftës gjatë tri vjet pune kishte të miratuara vetëm 90 projektligje.
Ai tha se në takimin e sotëm qeveria ka qartësuar statusin juridik të zyrës për barazi gjinore të qeverisë. Qeveria sot ka themeluar edhe ndërmarrjen publike Lotaria e Kosovës, e cila do të jetë e ndryshme nga ajo aktuale, Lotaria e Kosovës e Prishtinës, që është në procesin e privatizimit.
Poashtu qeveria në takimin e sotëm ka miratuar shërbimet postale universale të PTK-së, ndërsa është caktuar paga mujore për kryeshefat ekzekutiv, e barabartë me atë të sekretarëve të përhershëm të ministrive, që do të zbatohet pas 6 muajve.
Kosumi tha se është miratuar themelimi i një komisioni për miratimin e projekteve mediatike për minoritete dhe atyre multietnike, ose për persona me aftësi të kufizuara, të cilat sipas Kosumit, do të ndihmohen edhe nëpërmjet donatorëve.