Presidenti Moisiu kërkon që institucionet e Shqipërisë të kenë një qëndrim unik për të ardhmen e Kosovës

Presidenti Moisiu kërkon që institucionet e Shqipërisë të kenë një qëndrim unik për të ardhmen e Kosovës

Tiranë, 27 dhjetor 2005 /TN /QIK - Presidenti i Shqipërisë Alfred Moisiu ka kërkuar që institucionet shqiptare të kenë një mendim unik për të ardhmen e Kosovës. Ndryshe, thotë Moisiu, Shqipëria do të ketë një qëndrim jo dinjitoz dhe do të dëmtojë problemin e Kosovës.
"Problemi i statusit të Kosovës është një problem shumë i rëndësishme. Për shumë arsye, në radhë të parë, se ne jemi shqiptarë dhe ata janë shqiptarë, ndaj dhe ne nuk mund të rrimë indiferentë. Kushtetuta jonë duhet të dalë në mbrojtje të qytetarëve që nuk banojnë në territorin e Republikës", është shprehur Presidenti Moisiu për gazetën "Shekulli".
Presidenti shqiptar tha se Tirana zyrtare duhet të interesohet për një zgjidhje sa më të qëndrueshme të problemit të Kosovës, duke përsëritur qëndrimin tashmë të njohur të tij se "pavarësia është zgjidhja më e drejtë". "Ajo që ka ndodhur është një padrejtësi që është bërë duke filluar që nga Kongresi i Berlinit dhe më vonë. Këto probleme unë i kam thënë hapur në takimet ndërkombëtare. Pavarësisht se këto mund të jenë të njohura për publikun, por unë nuk kuptoj se si mund të quhet djep i një kombi ky vend ku 95 % e popullsisë janë qytetarë të një kombësie tjetër dhe vetëm 5% janë ata që pretendojnë se e kanë djepin e tyre".
Prandaj, thekson Moisiu, "kur vjen puna për divorcin e shqiptarëve me serbët që janë një popull krejt ndryshe, me gjuhë të ndryshme, histori e të gjitha, kjo vihet në diskutim".
"Këtu politika shqiptare duhet të nxjerrë konkluzionet e saj. Duhet të jetë më problematike se me të vërtetë japim një shembull jodinjitoz për një shtet demokratik dhe mund të dëmtojmë vërtet dhe problemin e Kosovës".
I pyetur nëse janë planifikuar bisedime mes institucioneve të shtetit shqiptar dhe faktorin kosovar për një përfaqësim sa më të mirë në negociatat për statusin, Presidenti Moisiu tha se Shqipëria nuk mund të bëhet aktor në këtë mes, por vetëm aktive, duke iu referuar përcaktimit që ka bërë Ahtisari.
"Duhet të ndihmojmë për një zgjidhje sa më të mirë, sa më të qëndrueshme dhe sa më të përshtatshme në përputhje dhe me dëshirat e popullit të Kosovës dhe kur themi populli i Kosovës, kemi parasysh dhe të gjithë banorët e tjerë që banojnë atje".


B.Mustafaj: "Kemi premtuar të mbështesim fuqimisht procesin e statusit final të Kosovës e që duhet të jetë Pavarësia"

Tiranë, 27 dhjetor 2005 /TN /QIK - Kosova dhe çështja e statusit të saj kanë qenë dhe mbeten një nga prioritetet kryesore të politikës dhe diplomacisë shqiptare, tha Besnik Mudafaj. Shefi i diplomacisë shqiptare në një analizë për 100 ditët e para të aktivitetit të tij në krye të Ministrisë së Punëve të Jashtme, ritheksoi se në këtë proces Shqipëria do të jetë aktive, por jo aktore.
"Kemi premtuar të mbështesim fuqimisht procesin për përcaktimin e statusit final të Kosovës e që duhet të jetë Pavarësia. Dhe e kemi mbajtuar premtimin. Për të mos hyrë në hollësira të njohura për opinionin publik, po theksoj se arritëm shumë shpejt të përcaktojmë mënyrën e veprimit tonë në këtë proces e që është: Shqipëria do të jetë aktive, por jo aktore", tha Mustafaj.
Mustafaj tha se rezoluta e miratuar pak kohë më parë nga Parlamenti shqiptar dhe qëndrimi i shprehur nga Presidenti, Alfred Moisiu, ishin piketa finale drejt së cilës, do të synohej të arrihej gjatë kontributit që do të japë Tiranë zyrtare dhe diplomacia shqiptare në këto negociata. "E kemi për detyrë që të jemi pranë procesit, jo të shohim ç'do të ndodhë", tha Mustafaj.
Diplomacia shqiptare është shprehur për një pavarësi të shoqëruar nga prania e komunitetit ndërkombëtar, civile e ushtarake, e cila do të sigurojë mbrojtjen e të drejtave të minoriteteve dhe ndërtimin e shtetit ligjor e demokratik në Kosovë.
"Kemi premtuar ta kthejmë Tiranën në një adresë të rëndësishme të veprimit diplomatik ndërkombëtar për rajonin. Dhe po e mbajmë premtimin. Ardhja në Tiranë e të gjithë aktorëve ndërkombëtarë për të shkëmbyer mendimet me ne gjatë kësaj periudhe, dëshmon se mendimi ynë është koherent dhe me ndikim pozitiv për paqen e stabilitetin e rajonit", tha Mustafaj.
Mustafaj vuri në dukje se qëndrimi dhe roli aktiv që do të luajë Shqipëria gjatë negociatave nuk do të kushtëzojnë marrëdhëniet që Tirana zyrtare ka me Beogradin.
"Ne kemi pjesë të aktivitetit tonë intensifikimin e marrdhënieve me Beogradin. Kemi planifikuar nënshkrimin e një seri marrëveshjesh bilaterale. Çështja e Kosovës nuk mund të kushtëzojë marrëdhëniet tona", tha Mustafaj.