Beogradi synon të diktojë temat për të cilat do të diskutohet në takimin eventual të Vjenës

Beogradi synon të diktojë temat për të cilat do të diskutohet në takimin eventual të Vjenës

Beograd, 27 dhjetor 2005 /TN /QIK - Anëtari i ekipit serb për bisedime politike për statusin e Kosovës Leon Kojen thotë se ka fundi i janarit në Vjenë do të fillojnë bisedimet për decentralizimin. Sipas tij, me ndërmjetësimin e ndërkombëtarëve për herë të parë pranë tryezës së bisedimeve do të gjenden pala serbe dhe shqiptare.
Kojen, i cili është edhe këshilltar i Presidentit serb Boris Tadiq, është shprehur për një gazetë të Beogradit se Ahtisari dhe ndihmësi i tij Rohan kanë pranuar propozimin e Beogradit që "tema e parë të jenë autorizimet e reja dhe dukshëm më të gjera të vetëqeverisjes lokale në Kosovë".

Që në takimin e Vjenës në shtator pala serbe ka shtruar të gjitha ato që duhet të hyjnë në ato autorizime, thotë Kojen. Por sipas tij, hapi tjetër do të jetë "përcaktimi i komunave të reja me shumicë serbe, gjithkund në Kosovë ku ekzistojnë kushtet - në veri të Mitrovicës, në Kosovën qendrore, në Anamoravë dhe në Dukagjin". Ai thotë se këto tema janë "një test për Rugovën dhe ekipin e tij negociator".
"Pas Vjenës do të shihet nëse përbetimi i tij për të drejtat e njeriut, për demokraci dhe për vlera evropiane është retorikë e zakonshme, siç ka qenë deri më tash, apo për herë të parë ka edhe gatishmërinë që problemet thelbësore të bashkësisë serbe, siç janë siguria, liria e lëvizjes dhe kthimi të zgjidhen në mënyrë të civiluzuar", tha ai.
Ndërkaq zyrtarët e Kosovës kanë kundërshtuar që të bisedohet për temën e decentralizmit, duke thënë se decentralizimi është çështje e Kosovës dhe se kjo çështje mund të diskutohet pas pavarësimit të Kosovës. Presidenti Rugova është shprehur të premtën e kaluar se "decentralizimi është çështje e Kosovës. Mund t'i dëgjojmë edhe palët tjera".