Mitrovicë: Kryetari i KK, M. Ibrahimi priti dje një delegacion nga qyteti i Ferizajt

Mitrovicë: Kryetari i KK, M. Ibrahimi priti dje një delegacion nga qyteti i Ferizajt

Mitrovicë, 24 dhjetor 2005 /TN - Një delegacion nga qyteti i Ferizajt (të premtën, më 23 dhjetor), udhëhequr nga Gafurr Imeri, zëvendëskryetar i Kuvendit të Komunës së Ferizajt, në përbërje të të cilit ishin edhe Leta Carruth, afarsite amerikane, Drita Hasani, Demush Zefi, Musli Berisha dhe Jakup Sabedini, është pritur në ambientet e Kuvendit të Komunës nga kryetari i Kuvendit të Komunës Mursel Ibrahimi, zëvendëskryetarja Fatmire Berisha dhe kryeshefi i Ekzekutivit të Kuvendit të Komunës, Sadri Ferati.

Kryetari i Kuvendit të Komunës, Mursel Ibrahimi i ka njoftuar mysafirët nga Ferizaj me gjendjen e përgjithshme dhe zhvillimet në komunën e Mitrovicës, me ç’rast situatën e sigurisë e ka vlerësuar si relativisht të qetë, me tendencë të përmirësimit të vazhdueshëm.

Kryetari Ibrahimi, ka folur posaçërisht për gjendjen e rëndë ekonomiko sociale që aktualisht mbretëron në komunën e Mitrovicës, si pasojë e ndarjes së qytetit dhe problemeve politike, duke përmendur me këtë rast numrin e madh të personave të zhvendosur nga pronat e tyre.

Duke folur për gjendjen ekonomike dhe sociale, kryetari Ibrahimi ka thënë se ajo është më e rënda në vend dhe se Mitrovica ende nuk e ka kaluar kohën e emergjencës, kështu që kësaj i nevojitet një përkujdesje dhe ndihmë shumë më e madhe e institucioneve qendrore si dhe prani më e madhe e organizatave të ndryshme të huaja, qeveritare dhe joqeveritare, me qëllim të ofrimit të ndihmës për zgjidhjen e problemeve të shumta ekonomike, sociale, infrastrukturore, zhvillimore, etj.

Afaristja amerikane, Leta Carruth, e cila ishte në përbërje të delegacionit nga Ferizaj, tha se krahas përpjekjeve që po bënë për të ndihmuar Ferizajn dhe për të krijuar ura lidhëse në mes të këtij qytetit dhe qyteteve në SHBA, tha se me sugjerimin e udhëheqësve nga Ferizaj ka ardhur këtu në Mitrovicë për tu njoftuar drejtpërsëdrejti me gjendjen në këtë qytet dhe për të shiquar mënyrën dhe mundësitë për të ndihmuar edhe këtu.

Po ashtu, afaristja nga Amerika Leta Carruth, u shpreh të jetë e gatshme për të ndihmuar në binjakëzimin e Ferizajt dhe Mitrovicës me nga një qytet të SHBA-ve.

Ndërkaq, udhëheqësit nga Ferizaj thanë se janë vazhdimisht të interesuar për zhvillimet në Mitrovicë, duke shprehur gatishmërinë për intensifikimin dhe thellimin e bashkëpunimit në të gjitha fushat, por edhe duke ofruar ndihmë për Mitrovicën aq sa lejojnë mundësitë.

Në këtë kontekst ata thanë se kanë një donacion bukur të madh librash dhe mendojnë që një pjesë t’ia dedikojnë Mitrovicës, ashtu sikur që do të veprohet edhe me ndihmat tjera që i ofrohen Ferizajt, me ç’rast një pjesë e tyre do të dërgohen në Mitrovicë.

Mitrovicë: kryetari M. Ibrahimin, ka pritur dje përfaqësuesit e Shoqatave të dala nga lufta e UÇK-së

Mitrovicë, 24 dhjetor 2005 /TN - Udhëheqja e Kuvendit të Komunës, me në krye Mursel Ibrahimin, kryetar ka pritur dje përfaqësuesit e Shoqatave të dala nga lufta e UÇK-së, me ç’rast është biseduar për problemet dhe vështirësitë me të cilat po ballafaqohen këto shoqata, mundësitë për të ndihmuar, dhe në veçanti është biseduar për realizimin e projektit të varrezave të dëshmorëve.

Në takim kanë marrë pjesë edhe zëvendëskryetarja e Kuvendit të Komunës, Fatmire Berisha, kryeshefi i Ekzekutivit të Kuvendit të Komunës, Sadri Ferati dhe drejtori i Drejtorisë për Ekonomi dhe Zhvillim, Besim Kurti.

Përfaqësuesit e shoqatave të dala nga lufta e UÇK-së, e kanë njoftuar udhëheqjen komunale me kushtet e vështira në të cilat po jetojnë familjet e dëshmorëve, invalidëve dhe veteranëve të luftës, si dhe për kushtet e vështira të punës së këtyre shoqatave, duke kërkuar njëkohësisht ndihmën e Kuvendit të Komunës për daljen nga kjo gjendje.

Drejtuesit e shoqatave të dala nga lufta e UÇK-së, interesim të posaçëm kanë treguar për shkaqet që kanë sjellë deri tek ndërprerja e punëve për rregullimin e varrezave të dëshmorëve.

Kryetari i Kuvendit të Komunës, Mursel Ibrahimi, u ka thënë përfaqësuesve të shoqatave të dala nga lufta e UÇK-së, se realizimi i projektit për rregullimin e varrezave të dëshmorëve në Shipol është ndërprerë për shkak të disa parregullsive lidhur me përfituesin e tenderit dhe për shkak të kushteve jo të mira atmosferike.

Kryetari Ibrahimi i ka njoftuar bashkëbiseduesit se mjetet për realizimin e këtij projekti janë të zotuara dhe i ka garantuar ata se punimet për rregullimin e varrezave të dëshmorëve do të fillojnë në fund të muajit mars, kështu që ky projekt është aktualisht prioriteti më i madh i komunës dhe se ai do të jetë një projekt madhështor, ashtu siç e meritojë edhe dëshmorët.

Po ashtu, udhëheqja komunale u ka thënë përfaqësuesve të Shoqatave të dala nga lufta e UÇK-së, se Kuvendi i Komunës, brenda mundësive buxhetore, do të krijojë një fond të posaçëm për Shoqatat e dala nga lufta e UÇK-së, më qëllim që të ndihmohen familjet e dëshmorëve, invalidët dhe dhe veteranët e luftës të UÇK-së, të cilët gjithsesi meritojnë një përkujdesje shumë më të madhe të institucioneve shtetërore, për të patur një jetë me më pak brenga, ngase këto janë kategoritë që kanë dhënë më së shumti për lirinë e Kosovës.

Në fund, bashkëbiseduesit janë shprehur të jenë të gatshëm për të thelluar bashkëpunimin e ndërsjellë, në të gjitha fushat, në mënyrë që proceset në komunën e Mitrovicës të kenë rrjedhën e dëshiruar.