Akademik Esat Stavileci në Shkup: “nuk është fatkeqësi e Maqedonisë të ketë vend fqinj një Kosovë të pavarur”

Akademik E. Stavileci në Shkup: “...nuk është fatkeqësi e Maqedonisë të ketë vend fqinj një Kosovë të pavarur”

Shkup, 24 dhjetor 2005 /TN - Akademik Esat Stavileci qëndroi në Shkup, me ç’rast në Klubin e deputetëve të Kuvendit të Maqedonisë mbajti një ligjëratë për deputetët shqiptarë dhe intelektualët e Shkupit mbi Kosovën dhe çështjen shqiptare.

Duke elaboruar pikëpamjen se pavarësia e Kosovës, si zgjidhje e vetme e drejtë për të ardhmen e saj, paraqet një faktor stabiliteti në rajon dhe në Maqedoni, ai theksoi se nuk mund të ndërtohen perspektivat evropiane të Maqedonisë pa shqiptarët si faktorë të ndërtimit të demokracisë multietnike dhe të shtetit të qytetarëve të barabartë.

Ai kërkoi prej deputetëve shqiptarë në Kuvendin e Maqedonisë që të angazhohen që Qeveria e saj të ndërtojë një qëndrim të qartë në lidhje me pavarësinë e Kosovës dhe mbështetjen e saj, duke u shprehur se nuk është fatkeqësi e Maqedonisë të ketë vend fqinj një Kosovë të pavarur.

Duke bërë fjalë për pozitën e shqiptarëve në Maqedoni, akademik Esat Stavileci u shpreh se Marrëveshja e Ohrit e ka përmirësuar pozitën, mirëpo nuk e ka zgjidhur njëkohësisht edhe statusin kushtetues-juridik të tyre.

Zgjidhja e statusit të shqiptarëve, sipas akademik Esat Stavilecit, duhet të bazohet në kuadër të shtigjeve historike të lindjes dhe të zhvillimit të mëvetësisë së Maqedonisë dhe në kuadër të qenies bashkëkohore të saj, mbi bazën e afirmimit të plotë të lirive dhe të të drejtave qytetare dhe kombëtare të shqiptarëve, liritë dhe të drejtat qytetare dhe kombëtare të të cilëve historikisht janë nëpërkëmbur.

Prandaj,ai u angazhua për vendosjen e një koncepti të ri të shtetit që do të pamundësonte dominimin sistemor të një etnikumi, edhe ashtu me identitet të kontestueshëm, mbi shqiptarët etnikë, të cilët janë popull autoktonë në ato troje, të cilët i veçon kompaktësia e tyre etnike, territoriale, historike, gjuhësore dhe kulturore dhe të cilët në trojet e tyre etnike janë popull shumicë.