LDK kremtoi 16-vjetorin e vet, duke qenë afër finalizimit të njohjes së pavarësisë së Kosovës

LDK kremtoi 16-vjetorin e vet, duke qenë afër finalizimit të njohjes së pavarësisë së Kosovës

Prishtinë, 23 dhjetor 2005 /TN /QIK – Lidhja Demokratike e Kosovës ka shënuar 16-vjetorin e themelimit të saj, ndërsa në këtë përvjetor të pranishmit i ka përshëndetur Presidenti i Kosovës Ibrahim Rugova dhe nënkryetari Kolë Berisha.
Presidenti Rugova, në një urim të lexuar nga Fatmir Sejdiu, vlerëson gjatë 16 vjetëve të saj se LDK-ja është udhëhequr nga çështja e lirisë, pavarësisë dhe demokracisë. Presidentir Rugova e vlerëson këtë përvjetor si një ditë të rëndësishme për Kosovën, pasi kjo parti nuk pushoi së vepruari fuqishëm në realizimin e synimeve madhore.
"LDK-ja, për këto 16 vjet, u tregua si parti e veprimit të gjerë, me një strategji efikase dhe të urtë për Kosovën dhe të gjithë shqiptarët. Për këto 16 vjet, LDK-ja u tregua parti e fuqishme, më vitale në Kosovë dhe në botën shqiptare, parti e tolerancës e mirëkuptimit dhe parti shtetformuese. Për këto 16 vjet, LDK-ja veprim udhëheqës e pati lirinë, pavarësinë dhe demokracinë e Kosovës", theksoi në urimin e tij Presidenti Rugova.
Presidenti Rugova thekson se edhe në këtë 16 vjetor LDK-ja objektiv qendror ka njohjen sa më të shpejtë të shetit të Kosovës. "Në këtë 16 vjetor, mund të themi se LDK-ja objektiv qendror e ka njohjen e pavarësisë më të shpejtë të Kosovës nga miqt tanë", thuhet në fund të urimit, i cili përmbyllet me urimin për bekimin e LDK-së dhe të Kosovës, i cili është përcjellë me duartrokitje në shenjë përkrahjeje nga anëtarët dhe simpatizantët e LDK-së për Presidentin e tyre dhe të Kosovës.
Ndërkaq, nënkryetari i LDK-së Kolë Berisha pasi përshëndeti kryekuvendarin Nexhat Daci, kryeministrin Kosumi, përfaqësuesit e korit diplomatik dhe anëtarët dhe simpatizantët e LDK-së, tha se ua përcjell me kënaqësi, përshëndetjet më të ngrohta dhe urimet më të sinqerta të Presidentit të Kosovës, Ibrahim Rugova.
Ai tha se të shënosh dhe të kremtosh përvjetorin e krijimit, të rritës, të zhvillimit, të punës dhe të sakrificës së cilësdo nga partitë politike shqiptare në këtë pjesë të Ballkanit, në përgjithësi, e atë të Lidhjes Demokratike të Kosovës, në veçanti, do të thotë, "në radhë të parë, t'i kujtosh për pak çaste ato vite të stuhishme dhe të shënosh një datë, jo thjeshtë partiake; ta kujtosh me respekt një ngjarje që shënon fillimin e një epoke të re, të pashembullt deri atëherë në historinë tonë kombëtare; do të thotë, të flasësh apo të shkruash për fillimin e një epoke, e cila, i ndryshoi rrjedhat e historisë në këtë pjesë të Evropës".

Z.Berisha tha se popullin shqiptar para 16 vjetëve po e priste fati që e përjetuan popujt tjerë të ish-jugosllavisë, duke rrezikuar që Kosova "të shndërrohej e tëra në një varrezë masive, ose në një park nacional serb, ku do të mbillej një barë i ri". "Do të ngatërroheshin shekujt.

Do të përsëritej viti 1878. Do të përgjysmohej atdheu, edhe ashtu i përgjysmuar. Kosova do të shndërrohej në një Toplicë të dytë serbe. E, ata që do të arrinin të mbijetonin - do të shndërroheshin në shërbëtorë të “engjëjve të luftës, të zotërinjve serbë", tha ai.
"Dhe, pikërisht në atë kryqëzim fatesh e fatkeqësish, 16 vjet më parë, një grup intelektualësh shqiptarë nga Prishtina, të tubuar rreth një programi, më shumë kombëtar - se sa partiak, dhe të prirë nga intelektuali Ibrahim Rugova– urtia e fjalës, madhështia e veprës dhe vizioni i qartë i të cilit, edhe sot e kësaj dite, i tejkalojnë përmasat kombëtare, në këto hapësira të stërkequra nga Mortaja e Kuqe pesëdhjetëvjeçare, formoi Lëvizjen e parë legale demokratike shqiptare – Lidhjen Demokratike të Kosovës", tha ai.

Berisha përkujtoi më pas suksesin e rrufeshëm të LDK-së që kishte të arritur të shndërrohej përnjëherë në lëvizje kombëtare, duke artikuluar kërkesat e ligjshme kombëtare; aplikoi metodën e rebelimit kolektiv, të injorimit dhe të mosnjohjes totale të pushtetit aktual serb; pastaj organizoi jetën krejtësisht të pavarur shoqërore, politike, juridike, ekonomike etj dhe, ndërtoi mekanizmat e para të një shteti të ardhshëm të Kosovës; iu shmang, për aq sa ishte e mundur, konfliktit të hapur, me qëllim të ruajtjes së faktorit demografik, si armën më të fortë që kishte, për ta mbrojtur karakterin përherë shqiptar të Kosovës; krijoi dhe zgjeroi rrjetin e miqve, përmes të cilëve, ndërkombëtarizoi çështjen e Kosovës, dhe duke e promovuar, kështu, për herë të parë, një frymë të re filozofike në politikën e kësaj pjese të Ballkanit dhe të Evropës, dëshmoi së, më në fund, ne ishim përcaktuar të rirreshtoheshim aty ku duhej, aty ku përherë e kishim vendin, por, aksidentalisht, në një moment të caktuar historik, e kishim devijuar rrugën, dhe pastaj, për disa shekuj me radhë, u gjendëm aty ku, në fakt, nuk e kishim vendin; u gjendem në anën tjetër të historisë".
Z.Berisha përkujtoi se si rezultat i kësaj pune, Bushi plak, përmes të ashtuquajturit "kërcënimi i Kërshëndellave", e tërhoqi "vijën e kuqe".
"Dhe, mu atëherë kur lakorja e fatit tonë arriti buzë zhbërjes tonë totale, kur kjo pjesë e atdheut dhe e kombit u gjend në prag të përmbytjes apokaliptike, falë Zotit, kësaj fryme të re filozofike, gjakut tonë të derdhur, dhe mbrojtësve të vlerave të civilizimit kudo në botë - pra, miqve tanë të shumtë, ndodhi, ... kthimi i shpejtë, dhe ngritja jonë, pothuajse biblike", tha ai.
Lidhja Demokratike e Kosovës, po i finalizon objektivat e saj të profilizuara edhe për këtë fazë, tha mes tjerash Kolë Berisha.