Kosovës i duhet qetësia vepruese që në mesin e 2006-ës ta realizojë pavarësinë, thotë Daci

Kosovës i duhet qetësia vepruese që në mesin e 2006-ës ta realizojë pavarësinë, thotë Daci

Prishtinë, 23 dhjetor 2005 /TN /QIK - Që Kosova ta arrijë qëllimin e saj, njohjen e pavarësisë deri në gjysmën e vitit të ardhshëm, Kosovës i duhet qetësi vepruese, tha kryekuvendari Nexhat Daci në takimin e fundit me gazetarë për këtë vit. Në këtë fund viti gjatë përmbledhjes së punës njëvjeçare të Kuvendit dhe të zyrës së tij, Daci tha se ndiehet i relaksuar për faktin se në Ekipin Negociator ku ndodhet ai, që në vazhdimësi i përcjell opinionit kosovar dhe atij botëror, rrjedhat në institucionet e Kosovës, në këtë rast në Kuvend.
"Do të doja që për fillim t'ju them që ky vit, është vit i arritjeveve të mëdha të realizimit jo vetëm të ëndrrës, të punës, të sakrificës, që gjenerata të tëra bën për Kosovën, për mazhorancën e saj shqiptare, që në fund e arritura më e madhe e 2005 ishte hapja e rrugës ndërkombëtare, për njohjen pa kusht të pavarësisë së Kosovës, dhe me këtë do të filloja që parlamenti ka dhënë një kontribut të vetin, nëpërmjet kryetarit dhe deputetëve, është deleguar vullneti i popullit", tha kryekuvendari Daci në përmbyllje të këtij viti.
Ai tha se fillimi i vitit ishte shumë i vështirë, i zymtë, dhe ishte me porosi tejet, tejet të këqija nga "ata që Kosovës gjithmonë i sollën dhe i shkaktuan vetëm plagë". Ai përkujtoi në këtë kontekst shkuarjen në Hagë të ish-kryeministrit Haradinaj, pas rreth 100 ditë qeverisje.
"Ishte një parashikim i tmerrshëm nga projektuesit e të këçijave të Kosovës, që pas kësaj ngjarje në Kosovë do të vjen deri te lufta civile vëllavrasëse në Kosovë”, tha ai duke përkujtuar informacionet interne që kishte në atë kohë. Ai tha se ishte kontributi i madh i vetë z.Haradinaj, pastaj i institucioneve të tjera të Kosovës, Kuvendit dhe vet kryekuvendarit, që të mbahej "qetësia vepruese në Kosovë".
Ai tha se ky sukses nuk do të ishte arritur sikur institucionet e Kosovës dhe Kuvendi në veçanti, të mos kishte arritur të krijonte një unitet shumë konstruktiv dhe veprues me bashkësinë ndërkombëtare në Kosovë, "në veçanti me Përfaqësuesin Special, por më së shumti me anëtarët e Grupit të Kontaktit".
"Ky unitet veprues ka ndikuar që Kuvendi i Kosovës në krahasim me kuvendet tjera në rajon t'i kryejë me përgjegjësi detyrat siç ishte miratimi i buxhetit", tha ai. Ndërsa, buxheti që për herë të parë në plotni është krijuar nga institucionet e Kosovës, nga qeveria e komisionet e Kuvendit nga Fondi Monetar Ndërkombëtar është vlerësuar që Kosovës t'i hapë një perspektivë zhvillimore. FMN-ja dhe Banka Botërore ka vlerësuar se Kosova ka krijuar të gjitha parakushtet e nevojshme që të ketë qasje në kapitalin dhe në tregun financiar botëror.
Një të arritur tjetër të këtij viti, tha se është bashkëpunimi me Shqipërinë, që ka shënuar shkallën më të lartë të bashkëpunimit konstruktiv.
"Ne presim që në gjysmën e parë të vitit të ardhshëm, ta finalizojmë qëllimin, punën tonë të filluar shumë dekada më parë dhe në veçanti të finalizuar me institucione. Për të arritur këtë tha se Kosovës i duhet qetësi vepruese, popullit të Kosovës dhe institucioneve i duhet liri e plotë, në mënyrë që vërtetë të bindet faktori ndërkombëtar me kapacitetin e dinjitetshëm të qytetarëve të Kosovës", tha ai.
Në vitin 2006 në pjesën përfundimtare të saj, do ta kemi shansën, t’i kthehemi në plotni vetvetes, ndërsa ka kujtuar se për katër vjet institucionet ishin kryesisht të orientuara në bashkëpunimin ndërkombëtar për të realizuar qëllimin. Ai tha se tashmë janë edhe vlerësimet ndërkombëtare se gjendja reale në Kosovë nuk është më e ulët se e vendeve në rajon, por ne kemi kapacitete që të prijmë në shumë aspekte për jetën e qytetarëve.

Ai tha se viti 2006 duhet të shihet si vit i kalimit në normalitet të punës së Kuvendit, dhe në përshpejtim të dinamikës. Ai tha se ka hartuar një projekt program të Kuvendit, ku do të ketë seanca dy javore, rritje të numrit të debateve për çështjet që i mundojnë qytetarët si dhe më shumë ftesa për qeverinë për paraqitje para Kuvendit, përmbylli njoftimet kryekuvendari Daci duke i uruar shëndet dhe gjithë të mirat qyetarëve dhe gazetarëve për vitin e ardhshëm.
Kryetari i Kuvendit ka pasur 181 takime vetëm ndërkombëtare në të cilat tha se është munduar që ta prezantojë me një dinjitet të theksuar e profesionalizëm detyrën dhe obligimet që qytetarët ia kanë deleguar. Ishin 69 takime me poërfaqësues vendor, pa llogaritur punët ditore, dhe më se 20 intervista në radio e televizione dhe gazeta, vendore e të huaja.