Kosova do të ketë edhe ministrinë e mbrojtjes dhe të punëve të jashtme, tha Presidenti Rugova

Kosova do të ketë edhe ministrinë e mbrojtjes dhe të punëve të jashtme, tha Presidenti Rugova

Prishtinë, 23 dhjetor 2005 /TN /QIK - Presidenti Ibrahim Rugova tha se Kosova pret që në të ardhmen të formojë edhe dy ministri të reja, ministrinë e mbrojtjes dhe të punëve të jashtme, pas takimit me Kryeministrin Kosumi që kishte sot në rezidencën e tij në Velani.

Njëherit takimi u ka dhënë fund spekulimeve mediale për shëndetin e tij, pas paraqitjes publike në këtë takim pune me kryeministrin e Kosovës Bajram Kosumi, ndërsa më parë është takuar edhe me kryetarët e degëve të LDK-së në Kosovë dhe diasporë me rastin e 16 vjetorit të themelimit të LDK-së.
Presidenti Rugova tha se me Kryeministrin është takuar me rastin e këtij fundviti, vitit të ri dhe Krishtlindjeve për të biseduar për gjendjen në Kosovë, të cilën e vlerësoi të mirë. Presidenti tha se ka biseduar me Kryeministrin edhe për punën e qeverisë dhe të institucioneve, dhe veçanërisht me rastin e fillimit të bisedimeve për pavarësinë.
"Unë e vlerësoj si vit të suksesshëm për qeverinë dhe institucionet tona për punën që është bërë, ndërsa në një moment me rëndësi është edhe hapja e bisedimeve për të ardhmen për pavarësinë e Kosovës që është rezultat i punës që e ka bërë qeveria, institucionet dhe populli i Kosovës", tha Presidenti Rugova, ndërsa përsëriti insistimin e tij, për njohjen direkte të pavarësisë së Kosovës, e cila tha se do të qetësonte këtë pjesë të Evropës dhe të botës.
Ai tha se nga Kryeministri është njoftuar për punën që ka bërë qeveria dhe 'për objektivat që na presin vitin e ardhshëm". "Objektiv kryesor është pavarësia e Kosvoës dhe që do të punojmë në të gjitha segmentet që të jetë një pavarësi e qëndrueshme, pavarësi që do t'i përgjigjet të gjithë qytetarëve të Kosovës, në të mirë të të gjithë qytetarëve të Kosovës", tha ai.
Ndërsa, Kryeministri Kosumi tha se qeveria gjatë kësaj kohe ka bërë një punë të madhe që të krijojë rend, rregull në shumë struktura të shoqërisë që ka pas çrregullime të ndryshme ose që kanë qenë të sapo krijuar siç është vënia e rendit dhe rregullit në politikat buxhetore.
"Ne i kemi stabilizuar politikat buxhetore të vitit 2005, ju e dini se në dhjetor të vitit 2004 buxheti i Kosovës ka qenë i rrezikuar për së tepërmi dhe tërë vitin kemi punuar që të stabilizojmë buxhetin e Kosovës dhe jam shumë i kënaqur që më në fund këtë e kemi bërë dhe fundi i vitit 2005 Kosovën e gjen me një buxhet sado kudo të varfër, por stabil dhe me politika stabile", tha Kosumi.
Ai poashtu rikujtoi se një stabilitet është arritur edhe në sferën e arsimit, sidomos në UP, siç tha ai kanë kthyer rendin dhe ligjin, ndërsa premtoi që të njëjtën gjë ta bëjnë edhe në shëndetësi, "ku ka disa parregullësi të theksuara". Ai tha se qeveria dhe disa ministri kanë treguar një sukses të madh në rifunksionalizimin e disa gjigantëve në Kosovës, siç është Trepca.

Ai ka falënderuar Presidentin Ibrahim Rugova për përkrahjen që i ka dhënë qeverisë gjatë gjithë kohës dhe unë kam pasur një mbështetje të madhe nga presidenti në të gjitha situatat. Ai paralajmëroi dy projekte, madhore me të cilat shpresohet të zhvillohet ekonomikisht vendi.
Sa i përket çështjes së decentralizimit të shtruar nga gazetarët, Presidenti Rugova tha se procesi i bisedimeve ka filluar tash, ndërsa ka pika të ndryshme.
"Decentralizimi siç e kemi thënë është çështje e Kosovës, pra mund t'i dëgjojmë edhe palët tjera. Mund të bisedohet si pako shtesë e pavarësisë, unë kështu e quaj, se pavarësia është e padiskutueshme, prandaj ne siç e dini kemi filluar një fazë të privatizimit me pilot projektet që ka qenë hap mjaft i guximshëm dhe më vonë do të shikojmë një reform të përgjithshme të pushtetit lokal që më leht do ta bënim me njohjen e pavarësisë së Kosovës", tha Presidenti.
Rugova shtoi se gjithmonë mbesin punët që nuk mund të kryhen. "Ne i përmendëm vetëm ato punë që i kemi kryer dhe që janë mjaft të rëndësishme, ndërsa objektivat dhe programin për vitin e ardhshëm e paraqet qeveria dhe institucionet e Kosovës. Punë që ka mbetura e madhe pa u kryer është çështja e njohjes së pavarësisë", tha ai.
Ndërsa, sa i përket formimit të ministrive të reja, Presidenti Rugova tha se së shpejti do të vendosin për këtë, duke rikujtuar licencimin e tyre nga UNMIK-u dhe njëherit ka paralajmëruar formimin e ministrisë së mbrojtjes dhe të punëve të jashtme.