Banorët serbë të Brestovikut i tha Kosumit se do të pranojnë çfarëdo zgjidhje për statusin e Kosovës

Banorët serbë të Brestovikut i tha Kosumit se do të pranojnë çfarëdo zgjidhje për statusin e Kosovës

Pejë, 23 dhjetor 2005 /TN /QIK - Kryeministri i Kosovës Bajram Kosumi bashkë me kryetarin e KK të Pejës Ali Lajçin, ka vizituar fshatin Brestovik të komunës së Pejës, i banuar me pjesëtarë të pakicës serbe.

Ai u shpreh i inkurajuar me procesin e kthimit të të zhvendosurëve nga kjo anë. Fillimisht kreu i Qeverisë së Kosovës ka biseduar me kryetarin e KK të Pejës Ali Lajçin për proceset aktuale dhe për ecurinë e jetësimit të standardeve.
Gjatë vizitës në Brestovik, Kryeministri Kosumi është takuar me një pjesë të banorëve të fshatit Brestovik të kthyer në shtëpitë e tyre dhe u ka premtuar atyre përkrahje të vazhdueshme institucionale. Sipas tij, procesi i kthimit të të zhvendosurëve në rajonin e Pejës ka filluar shumë kohë më parë dhe po realizohet me sukses, mirëpo nënvizoi se është e nevojshme që ky proces të vazhdojë.
"Njerëzit që kthehen në pronat e tyre janë mirëpritur prej qeverisë komunale dhe prej fqinjëve të tyre", ka thënë Kosumi.
Banorët serbë gjatë takimit me Kryeministrin Kosumi u shprehën qartë se do të pranojnë çfarëdo zgjidhje për statusin e Kosovës, që do t'i kontribuonte jetës më të mirë të të gjithë qytetarëve.
Serbët kanë kërkuar nga Kryeministri i Kosovës që t'u kthehen pronat e uzurpuara, ndërkaq Kosumi tha se Qeveria do të garantojë të drejtat pronësore të të gjithëve. Sipas tij prona dhe pronari janë të mbrojtura me ligj dhe nuk ka forcë që vepron ndryshe.
Përfaqësuesi i fshati Brestovik Milorad Jashoviq pasi falënderoi Kryeministrin dhe Qeverinë që ai e drejton për kontributin e dhënë në ndërtimin e shtëpive të reja për personat që janë kthyer, tha se banorët e Brestovikut dhe të Sigës lëvizin lirisht nga fshati në qytet dhe anasjelltas pa kurrëfarë problemesh.
Ndërkaq, Ali Lajçi, kryetar i Kuvendit komunal të Pejës ka premtuar se pakicat do të kenë mbrojtje institucionale.
Kohë më parë, Qeveria italiane në kuadër të projekteve të të zhvendosurëve ka ndarë 3.5 milionë euro për rindërtimin e 49 shtëpive të këtij fshati.
Në këtë fshat është ndërtuar edhe shkolla multietnike në të cilën së shpejti pritet të mësojnë edhe fëmijët shqiptarë dhe ata serbë.