Goldberg tha se edhe viti 2006 do të jetë vendimtar dhe historik për Kosovën, si 2005

Goldberg tha se edhe viti 2006 do të jetë vendimtar dhe historik për Kosovën, si 2005

Prishtinë, 22 dhjetor 2005 /TN /QIK - Viti i ardhshëm ofron çdo mundësi të mirë për Kosovën dhe qytetarët e saj, tha sot shefi i Zyrës amerikane në Prishtinë Filip Golberg, pas takimit me kryekuvendarin Nexhat Daci, në selinë e këtij të fundit.

Sipas z.Golberg, edhe viti 2006 do të jetë vendimtar dhe historik njësoj sikurse edhe viti që po e lëmë pas, 2005.
"Viti 2005 ishte vit vendimtar dhe historik për Kosovën. Besoj se viti 2006 do të jetë i njëjtë. Nëse merrni parasysh zhvillimet e këtij viti dhe faktin se jemi në fundin e vitit kur u hapën bisedimet për statusin, duhet të jemi të kënaqur", u shpreh Golberg, ndërsa premtoi edhe vazhdimin e mbështetjes amerikane për Kosovën. Shtetet e Bashkuara, shtoi a, do të vazhdojnë të kenë rol të rëndësishëm miqësor ndaj qytetarëve të Kosovës.
"Viti 2006 përmban të gjitha llojet e mundësive për Kosovën, për njerëzit këtu dhe për jetë më të mirë. Shtetet e Bashkuara do të kenë rol shumë të rëndësishëm dhe do të jemi me njerëzit e Kosovës", tha Golberg.
Viti që shkoi është vlerësuar i suksesshëm për Kosovën nga z.Golberg dhe zoti Daci, duke e çmuar si faktin më të rëndësishëm fillimin e bisedimeve për statusin e Kosovës.
Nga ana e tij, Daci u zotua për partneritet me faktorët ndërkombëtarë, ndërsa takimin e quajti si vazhdimësi të përpjekjeve për ndarje të sfidave me miqtë, siç u shpreh: "Shpeshherë për të na tërhequr vërejtjet në lëshimet eventuale".
"Thelbësore është se institucionet e Kosovës do të jenë partner i përgjegjshëm i Shteteve të Bashkuara dhe popullit amerikan, si dhe i Bashkimit Evropian e Grupit të Kontaktit. Me shumë sinqeritet i marrim analizat që ndajnë miqtë tanë me ne. Ne mundohemi të japim vlerësimet tona që kanë një emërues të përbashkët: zgjidhjet e mira për Kosovën dhe rajonin", tha Daci.
Ai në vazhdim tha se ndan me qytetarët optimizmin dhe se vendi është në rrugë shumë të mbarë dhe me mbështetje të duhur ndërkombëtare.
Diplomati amerikan përmendi edhe ndjenjat zhgënjyese të tij gjatë vitit të shkaktuara nga pakicat. "Njëri nga zhgënjimet e mia më të mëdha është se shumica e serbëve të zgjedhur nuk kanë marrë pjesë në punën e Kuvendit", tha Goldberg. Por, megjihatë ai se shpreson se gjatë vitit të ardhshëm, "Kuvendi do të vazhdojë të jetë bastion i kursit dhe sjelljes demokratike në Kosovë".