S. Larabi: Kosova së pari me pavarësi të kushtëzuar, e pastaj edhe pavarësi të plotë

S. Larabi: Kosova së pari me pavarësi të kushtëzuar, e pastaj edhe pavarësi të plotë

Pragë, 21 dhjetor 2005 /TN /QIK - Kosova me siguri do të fitojë pavarësi të kushtëzuar, ndërkaq pas një periudhe transitore që mund të zgjasë disa vjet, edhe pavarësinë e plotë, thotë Stiven Larabi (Steven Larrabee), drejtor për çështje evropiane në koorporatën amerikane RAND.

Ai konsideron se për Serbinë është më mirë që sa më parë të pranojë pavarësinë e Kosovës dhe të Mali të Zi.
Stiven Larabi në një intervistë për radion "Evropa e lirë" shprehu mendimin se bashkësia ndërkombëtare synon një lloj pavarësie të kushtëzuar të Kosovës. Kjo, sipas tij, do të thotë se duhet plotësuar disa standarde para se të merret vendimi për statusin përfundimtar, kështu që dëshira e shqiptarëve për pavarësi nuk do të përkrahet plotësisht, thotë Larabi.
Duke sqaruar se çfarë do të thotë pavarësi e kushtëzuar, ky ekspert amerikan thotë se "së pari Kosova duhet të respektojë kufijtë e njohur ndërkombëtarisht dhe të përmbahet nga çfarëdo lloj irredentizmi". Si çështje tjetër ai thekson ndërtimin e institucioneve demokratike dhe të infrastrukturës. Ndërkaq sa i përket anëtarësmit në institucionet ndërkombëtare Larabi mendon se kjo varet nga ajo nëse Kosova respekton kufijtë ndërkombëtarë dhe punon në forcimin e institucoieneve demokratike.
Sipas mendimit të tij, periudha transitore mund të zgajsë 5, ndoshta 7 apo 1O vjet. "Por, ideja themelore është që Kosova në fund të kësaj periudhe rë realizojë pavarësinë me kusht që ndërkohë, të përmbushen standardet e përmendura dhe të tjera", tha ai.
I pyetur sesi Perëndimi mund ta bindë Moskën dhe Pekinin të përkrahin pavarësinë e kushtëzuar të Kosovës e pastaj edhe atë të plotë, Larabi tha se kjo nuk do të jetë aspak e lehtë, ndonëse sipas mendimit të tij qëndrimi i Rusisë pjesërisht ka ndryshuar. Në të kaluarën Rusia ka kundërshtuar pavarësinë e Kosovës për shkak të Çeçenisë.

Mirëpo tash vonë, Rusia më tepër është e interesuar të ruajë kontrollin në Osetinë Jugore e pastaj në Abhazi, rajone proruse në Gjeorgjisë, të cilat nuk respektojnë pushtetin qendror të këtij shteti, duke konsideruar se ndoshta mund të ndikojë në mëvetësimin e tyre dhe prandaj ka ndryshuar qëndrimin për statusin e Kosovës, tha Larabi. Ndërkaq sa ai thotë se pozicioni Kinës është diçka ndryshe dhe se nuk e di se si do të jetë ai në fund.