|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Presidenti Moisiu priti anëtarët e Komisionit të Jashtëm të Kuvendit të Kosovës

Tiranë, 21 dhjetor 2005 /TN /QIK - Presidenti i Shqipërisë Alfred Moisiu, priti sot anëtarët e Komisionit të Jashtëm të Kuvendit të Kosovës, kryesuar nga Sabri Hamiti, që ndodhet për një vizitë në Tiranë me ftesë të parlamentit shqiptar.

Presidenti Moisiu u shpreh gjatë bisedës për rëndësinë që ka në kushtet aktuale bashkëpunimi dhe mirëkuptimi mes faktorit politik kosovar, thuhet në një njoftim nga ky takim.

Duke qenë se Kosova ndodhet përpara zhvillimesh shumë të rëndësishme historike unifikimi i qëndrimeve për të realizuar prioritetin madhor, zgjidhjen e statusit të saj, do të provojë njëkohësisht aftësitë shtetformuese të shqiptarëve, kulturën e tyre si popull që respekton të drejtat e minoriteteve, por dhe fisnikërinë e tyre për të parë së bashku drejt të ardhmes së përbashkët evropiane.

Kreu i shtetit shqiptar vuri në dukje se në Shqipëri zhvillimet rreth kësaj çështje ndiqen me shumë vëmendje e interes; njëkohësisht u vu në dukje rritja e shkallës së komunikimit shkëmbimeve dhe lehtësirave që do të krijonte në këtë drejtim përmirësimi i infrastrukturës rrugore mes dy anëve të kufirit.

Nga ana e tij Sabri Hamiti falenderoi z. Moisiu për pritjen dhe për qëndrimet e tij konsekuente në interes të zgjidhjes së qëndrueshme të çështjes së Kosovës si dhe rolin që ka pasur e ka qëndrimi unik shqiptar në shtetin amë në drejtim të artikulimit të pavarësisë. Ai tha se zgjidhja sa më shpejt e këtij problemi është një domosdoshmëri për banorët e Kosovës.

Presidenti Moisiu iu lut z. Hamiti t'i transmetojë përshëndetjet miqësore Presidentit Rugova duke uruar shëndet të plotë.

---

 

Mustafaj thotë se Shqipëria është e angazhuar për të luajtur një rol aktiv gjatë bisedimeve për statusin e Kosovës

 

Tiranë, 21 dhjetor 2005 /TN /QIK - Ministri i Punëve të Jashtme, Besnik Mustafaj priti përfaqësuesit e Komisionit të Jashtëm të Kuvendit të Kosovës, të cilët i njohu me aktivitetet më të fundit të diplomacisë shqiptare për trajtimin e çështjes së Kosovës, në kuadër të procesit të përcaktimit të statusit.

Zoti Mustafaj theksoi se Shqipëria është e angazhuar për të luajtur një rol aktiv gjatë këtyre bisedimeve dhe këtë ndërmarrje të sajën synon ta realizojë duke e kthyer Tiranën në qendrën diplomatike konsultative për këtë çështje si dhe duke zhvilluar një tur të rëndësishëm vizitash në kryeqytetet e vendeve anëtare të Grupit të Kontaktit, thuhet në një komunikatë nga ky takim.

Ministri Mustafaj vuri në dukje se përfaqësuesit politikë të Kosovës po tregojnë një nivel të lartë profesionalizmi dhe qytetarie gjatë kësaj periudhe historike. Në këtë kontekst ai u bëri thirrje të gjithë drejtuesve të lartë institucionalë dhe deputetëve të Kuvendit të Kosovës që të tregohen realistë dhe të transmetojnë të gjitha energjitë e tyre pozitive gjatë këtij procesi që sapo ka nisur, si dhe të tregojnë mirëkuptim dhe intensifikojnë bashkëpunimin me bashkësinë ndërkombëtare dhe Grupin Ndërkombëtar Negociator.

Ministri i Punëve të Jashtme u shpreh se Shqipëria do të vazhdojë të japë kontributin e saj edhe në kuadër të marrëdhënieve tona dypalëshe, duke ofruar ekspertizën dhe eksperiencën e saj për trajnimin e diplomatëve të ardhshëm kosovarë apo në fusha të tjera, ku do të shihet i nevojshëm ky shkëmbim.
Kryetari i delegacionit të Kuvendit të Kosovës, Sabri Hamiti, e njohu Ministrin me zhvillimet më të fundit në Kosovë si në kuadrin e përgjithshëm ashtu edhe në lidhje me punën konkrete që po bën Grupi Negociator i Kosovës.

 

Ai përcolli vlerësimet për politikën aktive dhe qëndrimin që po mban Shqipëria në lidhje me Kosovën në këto momente, duke kërkuar njëkohësisht ndihmën e institucioneve të larta shqiptare për të përçuar zërin e popullit të Kosovës, atje ku Kosova nuk mund të përfaqësohet për shkak të rrethanave në të cilat ajo ndodhet.

Në mbyllje, Ministri i siguroi bashkëbiseduesit se do t'i përgjigjej pozitivisht ftesës për të vizituar Kosovën në një kohë shumë të afërt.

 

 |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |