Novicki edhe pse pranon dështimin largohet pa vullnetin që të trashëgohet nga një vendës

Novicki edhe pse pranon dështimin largohet pa vullnetin që të trashëgohet nga një vendës

Prishtinë, 21 dhjetor 2005 /TN /QIK - Ombudspersoni i Kosovës Marek Anton Novicki, pavarësisht se është i vetëdijshëm për thuaja dështimin e institucionit të tij, nuk kishte vullnet as sot që po shkonte nga Kosova dhe që autoritetin e tij ta trashëgonte një qytetar nga Kosova, pra një shqiptar.
"Kosova vazhdon të ketë probleme serioze në fushën e të drejtave të njeriut, prandaj kam kërkuar që Ombudspersoni të mbetet në duart e ndërkombëtarëve, të paktën edhe në vitin 2006", ëshët shprehur sot kreu i këtij institucioni, Novicki, në komunikimin e fundit me mediat, 24 orë para largimit nga Kosova.

Për mossuksesin e institucionit të tij, përkatësisht siç tha ai, mos përparimin e të drejtave të njeriut, fajësoi institucionet politike dhe administratën e UNMIK-ut, që sipas tij, nuk kanë vepruar me efikasitet ndaj çështjeve të cilat i ka adresuar institucioni i tij.
"Përfaqësuesi Special, para disa muajsh ka vendosur që ky institucion të kalonte në kompetencë të vendorëve, dhe që nga 1 janari i vitit të ardhshëm, t'i përgjigjej Kuvendit të Kosovës. Por, për arsye të cilat, të paktën unë nuk i di, pas vendimit të PSSP-së ky proces nuk është përgatitur si duhet, në mënyrë që nga 1 janari institucioni të hynte në fazën e re të funksionimit", tha Novicki.
Sipas tij, Kosova ende ka probleme serioze në këtë fushë, prandaj ai ka kërkuar që Ombudspersoni, të paktën edhe një vit të mbetej në duart e ndërkombëtarëve.
Ombudspersoni ndërkombëtar Novicki, për 5 vjet e gjysmë të punës, sipas vlerësimeve të tij, kishte arritur ta ruante pavarësinë e institucionet që drejtoi, por jo edhe ta arrijë ndonjë rezultat të ndjeshëm në mbrojtjen e të drejtave të njeriut.
Novicki tha se deri në miratimin e Rregullores për Ombudspersonin kosovar, këtë detyrë do ta kryejë zëvendësi i tij, Hilmi Jashari.