Ahtisari beson në mundësinë e zhvillimit të qëndrueshëm në Kosovë

Ahtisari beson në mundësinë e zhvillimit të qëndrueshëm në Kosovë

Nju Jork, 21 dhjeto 2005 /TN /QIK r - "Një nga çështjet kryesore me të cilën do të përballemi pas festës është mbrojtja e joshqiptarëve në Kosovë. Të gjithë e pranojnë se kjo nënkupton një reformë të strukturës së administratës lokale.

Shqiptarët e Kosovës këtë patjetër duhet ta kenë parasysh dhe patjetër duhet të kyçen në bisedimet për decentralizimin", është shprehur i dëguari i posaçëm i KB për Kosovën, Marti Ahtisari gjatë konferencës me gazetarë në Nju Jork, duke shtuar se bisedimet më intensive për decentralizimin mund të priten në pjesën e dytë të janarit në Vjenë.
Sipas "Zërit të Amerikës", Ahtisari i ka këshilluar shqiptarët që të shfrytëzojnë mundësinë dhe gjatë procesit të negociatave statusore të bëjnë më shumë në implementimin e standardeve demokratike, ndërsa serbët e Kosovës i ka porositur se është e domosdoshme të marrin pjesë në të gjitha proceset dhe institucionet e Kosovës. "Porosia ime për Beogradin ka qenë e qartë - se patjetë rduhet të jenë realistë kur bëhet fjalë për parimin se nuk ka kthim në gjendjen e mëparshme dhe se Kosovës patjetër duhet t'i lejohet që të zhvillohet politikisht dhe ekonomikisht me mundësi që të gëzojë të gjitha beneficionet e institucioneve financiare ndërkombëtare".
Ahtisari ka paralajmëruar se këtë mundësi së shpejti do ta analizojnë juristët ndërkombëtarë.
Ai tha se beson në mundësinë e zhvillimit të qëndrueshëm në Kosovë, nëse në mënyrë adekuate shfrytëzohen të gjitha resurset.
Ahtisari të hënën në Uashington, lidhur me aktivitetet e gjertanishme e ka njoftuar sekretaren amerikane të Shtetit Kondoliza Rajs dhe këshilltarin për siguri kombëtare të Presidentit amerkian, Stiven Hedël. Ai tha se edhe nga ata mu sikur edhe nga shefi i diplomacisë ruse Lavrov si dhe nga përfaqësuesit e tjerë të Grupit të Kontaktit ka marrë mbështetjen për "krijimin hapësirës për negociata".
"Duhet të krijojmë hapësirë për negociata. Në qoftë se palët edhe më tutje mbeten pranë pozicioneve të tyre, të cilat m'i kanë prezantuar, për mua aty punë nuk ka. Prandaj tani po përpiqemi t'i bindim negociatorët që të lëvizin nga qëndrimet e tyre jofleksibile", tha Ahtisari.
Ai tha se përfaqësuesit e shqiptarëve i kanë kumtuar se nuk pranojnë asgjë përveç pavarësisë, ndërsa zyrtarët e Beogradit i kanë thënë se pavarësia është e papranueshme.
"Kam kërkuar edhe nga shqiptarët edhe nga serbët që të m'i dorëzojnë dokumentet për pozicionet më të rëndësishme fillestare për negociata dhe sa kuptova - ata po punojnë intensivisht që ato letra të m'i dorëzojnë".
Diplomati finlandez tha se Kofi Ananin e ka njoftuar edhe për "bisedimet me përfaqësuesit e pushtetit në vendet fqinje, në Podgoricë, Shkup, dhe Tiranë, të cilët kanë ndihmuar shumë".
"Fqinjët kanë vendosur që në këtë proces të jenë aktivë, por jo edhe aktorë, gjë që e përshendes dhe çmoj qëndrimin e tyre konstruktiv", tha Ahtisari.
Duke folur përt afatet e negociatave, ai u shpreh se ato do të përfundojnë sa të zgjasë mandati që ia ka besuar bashkësia ndërkombëtare.
"Edhe pse synojmë që procesin ta nisim menjeherë, ne nuk i detyrohemi afateve artificiale. Nuk fsheh se do të doja që punën ta kryejmë për një vit, megjithëse mund të them se bashkësia ndërkombëtare do të mbetet e angazhuar në Kosovë në një periudhë më të gjatë kohore, pavarësisht nga statusi", tha Ahtisari.