Agjencitë, trustet dhe kompanitë publike në 2006-ën do t'i nënshtrohen ligjeve vendore, tha Shatri

Agjencitë, trustet dhe kompanitë publike në 2006-ën do t'i nënshtrohen ligjeve vendore, tha Shatri

Prishtinë, 21 dhjetor 2005 /TN /QIK - Të gjitha agjencitë dhe kompanitë publike pas njohjes së pavarësisë detyrimisht do t'i nënshtrohen përgjegjësive ndaj institucioneve vlerësoi sot ministri i Ekonomisë dhe Financave Haki Shatri.

Ai e bëri këtë vlerësim në një takim solemn me gazetarë kushtuar miratimit të buxhetit të Kosovës për 2006-ën, duke nënkuptuar këtu si mjetet e Trustit Pensional të Kosovës, që ka një fond aktual prej më se 200 milionë eurosh që e mban jashtë vendit, si dhe kopmanitë PTK-në e KEK-un, që vazhdojnë të vjelin nga qytetarët TVSH në emër të shtetit, pa ia dorëzuar asnjë cent atij.
Miratimi i buxhetit të Kosovës për vin 2006, është ngjarja më e rëndësishme e vititi 2005 për Ministrinë e Ekonomisë dhe Financave, vlerësoi ministri Haki Shatri. Ai tha se tashmë buxheti Kosovës duhet të jetë shpallur që mbrëmë nga kryeadministratori i Kosovës, pasi dje Këshilli Ekonomik Fiskal ka vlerësuar pozitivisht amandamentet e miratuara nga Kuvendi i Kosovës.
Shatri tha se për herë të parë në buxhetin e Kosovës ka kontribuar me një lartësi prej 28 për qind tatimi nga bruto prodhimi vendore që vlerësohet të jetë 2.4 miliardë euro, që i korrespondon mesatares rajonale, ndërsa shkallë më të lartë kanë vetëm vendet me zhvillim të lartë, si Suedia që ka një shkallë tatimore rreth 45 për qind, ndërsa SHBA-të mbi 30 për qind.
Ministri Shatri tha se një ngarkesë më e madhe buxhetore nuk mund të bëhet kur kihen parasysh edhe të ardhurat vjetore për kokë banori në Kosovë, të cilat variojnë nga 1.000 deri në 1.200 euro. Ai tha se programet buxhetore janë të bazuara në Kornizën afatmesme buxhetore, dokument ky që e kanë pak vende në rajon, i miratuar këtë vit nga Kuvendi i Kosovës.
Ai hartimin dhe miratimin e buxhetit e quajti rezultat i një pune sistematike vjetore, gjatë së cilës kohë ministria ka hulumtuar të gjitha çështjet e nevojshme përfshirë edhe kërkesat e agjencive buxhetore, të cilat tha se kanë respektuar kërkesat projektuese dhe programore.
Ministri Shatri ritheksoi se edhe pse buxheti i Kosovës për vitin e ardhshëm në shifra është më i ulët se i vitit që po e lëmë, pohoi se shpenzimet buxhetore nuk do të jenë më të vogla. Ndërsa, vlerëson se ato nuk do ta tejkalojnë shifrën e paraparë prej 700 milionë eurosh.

Po ashtu në shpenzimet e përafërta të këtyre dy vjetëve do të jenë edhe nga fakti se MEF-i ka zvogëluar shpenzimet në mallëra dhe shërbime, ndërsa ka i ka rritur në paga dhe investime me rreth 4 për qind. Rritja në paga rrjedh nga detyrimi i qeverisë që të përmbushë marrëveshjen për nivelizimin e pagave në arsim dhe poashtu nga nevojat sociale, pas marrëveshjes me sindikatat që pagesa për lehoninë të zgjatet nga tre në gjashtë muaj.
Ministri Shatri e ka vlerësuar lart nënshkrimin e një dokumenti që Kosovës i mundëson përkrahje financiare nga Komisioni Evropian dhe Fondi Monetar Ndërkombëtar. Sipas tij. Kosova edhe para zgjidhjes së statusit ka përmbushur detyrimet e nevojshme që të përfitojë nga këto institucione, për dallim nga disa vende që janë edhe anëtare të OKB-së dhe nuk përfitojnë nga FMN-ja.
Në pyetjen tonë në kontekst të buxhetit për 2006 kur pritet edhe njohja e pavarësisë së Kosovës, se si do të veprohet me Fondin e Trustit Pensional të Kosovës dhe kompanitë publike që vjelin taksën TVSH nga qytetarët e Kosovës dhe nuk e derdhin në buxhetin e vendit, ministri tha se këtyre çështjeve do t’i jepet fund dhe se ato do t'i nënshtrohen autoriteteve vendore.
"Për institucionet që kanë të bëjnë me ekonominë, ne do të përgatisim një platformë tonën për periudhën e diskutimit të statusit. Ne do të jemi të qartë se si mendojmë të jetë e organizuar dogana, BPK-ja, si do të jetë Trusti i Pensioneve. Normalisht që pas definimit të statusit, qofshin ato agjencione, truste ose të tjera do të jenë institucione kosovare dhe detyrimisht, do t'i nënshtrohen të gjitha rregullave ligjore që vlejnë për institucionet vendore. Edhe ndërmarrjet publike do të transformohen dhe bordet e tyre janë kosovarizuar, por jo në masë të mjaftueshme", tha minsitri Shatri.
Ndërsa, për kompanitë publike shtoi se ndonëse në bordet e tyre ka mjaft vendorë, një pjesë e tyre janë të emëruar nga UNMIK-u dhe se poashtu nuk është i kënaqur me rezultatet atje, edhe pse pjesërisht janë koorporatizuar. Por, ai tha se në këtë kontekst prania ndërkombëtare është e mirëpritur në rolin konsultues. Pas këtij takimi, ministria ka organizuar ceremoninë e dorëzim-pranimit të detyrës së drejtorit të Administratës Tatimore të Kosovës (ATK-në) detyrë që e mori këshilltari i parë i ministrit Shatri, Jonuz Krasniqi nga Mustafë Hasani, që për katër vjet ka udhëhequr ATK-në.