Pavarësia e Kosovës do të ishte zgjidhja më e mirë, i tha Berisha një delegacioni të Kosovës

Pavarësia e Kosovës do të ishte zgjidhja më e mirë, i tha Berisha një delegacioni të Kosovës

Tiranë, 20 dhjetor 2005 /TN /QIK - Kryeministri i Shqipërisë Sali Berisha priti mbrëmë Sabri Hamitin, Bajram Rexhepin, Mahir Jagxhillarin dhe Alush Gashin që janë në përbërje të delegacionit të Komisionit të Jashtëm të Kuvendit të Kosovës. Bashkëbiseduesit thanë se pavarësia e Kosovës do të ishte zgjidhja më e mirë.
Kryeministri Sali Berisha pas takimit me delegacionin e Kuvendit të Kosovës ka theksuar se Qeveria e Shqipërisë rikonfirmon se pavarësia e Kosovës do të kontribuojë për paqen dhe qëndrueshmërinë e rajonit, dhe se është shumë i rëndësishëm respektimi i të drejtave të pakicave serbe dhe të tjera në Kosovë.
Sipas Kryeministrit Berisha është i rëndësishëm edhe procesi i decentralizimit në Kosovë.
Në këtë takim u shpreh vullnetit nga të gjitha palët për ta filluar edhe mëtej bashkëpunimin ndërmjet Tiranës dhe Prishtinës në të gjitha fushat, në veçanti në ndërtimin e rrugës Durrës ? Kukës, si dhe në turizëm.
Delegacioni nga Kosova do të takohet sot me Komisionin e Politikës së Jashtme të Parlamentit të Shqipërisë dhe me Kryeparlamentaren Jozefina Topalli.


Kryeministri Berisha sot shkon në Irak për të vizitua kontigjentin e trupave shqiptare

Tiranë, 2O dhjetor 2005 /TN /QIK - Kryeministri shqiptar Sali Berisha pritet të niset sot drejt Irakut ku do të vizitojë kontigjentin e trupave shqiptare pjesëtare të koalicionit ndërkombëtar ushtarak, të udhëhequr nga Shtetet e Bashkuara.
Fillimisht qeveria kishte vendosur që për arsye sigurie të njoftonte për këtë vizitë vetëm pas mbërritjes së kryeministrit në Irak, por zoti Berisha e bëri të ditur vetë vizitën e tij gjatë debateve të mbrëmshme në parlament.
Ushtarakët shqiptarë u vendosën në Irak menjëherë pas rënies së regjimit të Saddam Husseinit. Një kompani prej 130 komandosh, trupat elitë të ushtrisë shqiptare, veprojnë në Mosul nën komandën amerikane për të garantuar sigurinë e aeroportit të këtij qyteti.