Një delegacion i Degës së LDK-së të Vushtrrisë, viziton Kuvendin e Komunës në Mitrovicë

Një delegacion i Degës së LDK-së të Vushtrrisë, viziton Kuvendin e Komunës në Mitrovicë

20 dhjetor 2005 /TN

Një delegacion i Degës së LDK-së të Vushtrrisë, në përbërje Hajzer Krasniqi, anëtar i Kreyesisë Qendrore të LDK-së e kryetar i degës, Shemsi Hajrizi, zëvendëskryetar i Kuvendit të Komunës së Vushtrrisë, Eset Uka e Ismet Gashi, ka vizituar Kuvendin e Komunës, me ç’rast janë pritur nga Mursel Ibrahimi, kryetar, Fatmire Berisha, zëvendëskryetare dhe Sadri Ferati, kryeshef i Ekzekutivit, të Kuvendit të Komunës.

Mysafirët nga Vushtrria fillimisht kanë përgëzuar udhëheqjen komunale të Mitrovicës për zgjedhjen në postet me përgjegjësi që po i ushtrojnë, duke shprehur njëkohësisht bindjen e tyre se ata kanë aftësi dhe autoritet profesional e moral që me sukses të drejtojnë Kuvendin e Komunës në realizimin e kërkesave të qytetarëve dhe të detyrave që shtrohen para tyre për zgjidhjen e problemeve të shumta që ka komuna e Mitrovicës.

Profesor Hajzer Krasniqi ka thënë me këtë rast se çështja e Mitrovicës, përkatësisht problemet siç janë integrimi i qytetit, normalizimi i jetës këtu, liria e plotë e lëvizjes për të gjithë, kthimi i qytetarëve në pronat e tyre dhe të tjera, janë probleme që i preokupojnë shumë dhe i brengosin edhe qytetarët e Vushtrrisë fqinje, por edhe ata të vendit, prandaj nevojitet një përkrahje shumë më e madhe e të gjithëve, para së gjithash të institucioneve të vendit, për udhëheqjen dhe qytetarët e Mitrovicës, me qëllim të tejkalimit sa më të sukseshëm të këtyre problemeve dhe vështirësive, përkrahje e cila nga qytetarët dhe institucionet e Vushtrrisë nuk ka munguar asnjëherë dhe nuk do të mungojë as në të ardhmen.

Kryetari i Kuvendit të Komunës së Mitrovicës, Mursel Ibrahimi, pasi që ka falendruar mysafirët për vizitën, interesimin e tyre të vazhdueshëm dhe gatishmërinë për të përkrahur Mitrovicën, i ka informuar ata për gjendjen e përgjithshme në komunë dhe për përpjekjet e udhëheqjes dhe të organeve komunale për zgjidhjen e problemeve të shumta që ka Mitrovica, si një komunë me gjendje specifike në vend.

Kryetari Ibrahimi ka thënë me këtë rast se udhëheqja komunale është plotësisht e vetëdijshme për përgjegjësitë që ka për integrimin e qytetit dhe për zgjidhjen e problemeve të shumta me të cilat ballafaqohen qytetarët, andaj edhe është duke u angazhuar dhe punuar konform këtyre përgjegjësive, në mënyrë që të mos abuzohet me votën e qytetarëve, me të cilën ata kanë shprehur besim tek kjo udhëheqje.

Takimi ka përfunduar me dakordimin e të dyja palëve se është i nevojshëm bashkëpunimi edhe më i intensifikuar i midis dy komunave fqinje, sidomos në këto momente vendimtare për vendin, me qëllim që proceset të zhvillohen në drejtimin e duhur për realizimin e aspiratave të popullit, si dhe bashkëpunimi në fusha të ndryshme me interes të përbashkët për qytetarët e të dyja komunave.