Kryeministri Kosumi priti sekretarin në Ministrinë e Mbrojtjes së Portugalisë

Kryeministri Kosumi priti sekretarin në Ministrinë e Mbrojtjes së Portugalisë

Prishtinë, 2O dhjetor 2005 /TN /QIK - Kryeministri Bajram Kosumi priti mbrëmë në një takim të veçantë një delegacion të Ministrisë së Mbrojtjes të Portugalisë, të kryesuar nga Manuel Lobo Antunes, sekretar në këtë ministri.
Fillimisht, kryeministri Kosumi ka njoftuar mysafirët me aktivitetet e Qeverisë dhe të institucioneve të Kosovës lidhur me procesin negociues për statusin e ardhshëm të Kosovës, zbatimin e standardeve, si dhe për angazhimet dhe politikat integruese të ekzekutivit në raport me grupet etnike në vend.

Kryeministri Kosumi ka theksuar se në Kosovë është arritur progres i madh në shume fusha, duke shtuar se tashmë Kosova ka ndërtuar institucione të qëndrueshme dhe efikase, të cilat kanë kapacitete për të marrë përsipër përgjegjësi dhe për të ndërtuar një të ardhme evropiane.
Në këtë funksion, ai ka theksuar se përmbushja e standardeve të KB së vazhdon të jetë prioritet dhe në këtë kuadër Qeveria e Kosovës nga janari do të startojë me planin e saj për implementimin e standardeve evropiane, duke vlerësuar se synim i institucioneve të vendit mbetet integrimi në BE dhe në institucionet tjera relevante ndërkombëtare.
"Krijimi i shtetit të Kosovës do të jetë faktor paqeje dhe stabiliteti në rajon. Bërja e shtetit të Kosovës ka synim edhe zhvillimin tonë më të shpejtë ekonomik dhe anëtarësim në institucionet monetare ndërkombëtare", është shprehur kryeministri Kosumi.
Në këtë takim Kosumi dhe Manuel Lobo Antunes kanë biseduar edhe për zhvillimet ekonomike në Kosovë, për çështjen e decentralizimit, duke u ndalur me theks të veçantë për procesin e negociues për definimin e statusit.

Sa i përket procesit negociues, ka shtuar Kosumi, pala kosovare angazhohet që deri në qershor të vitit 2006 të definohet çështja e statusit dhe më pas Kosova dhe institucionet të saj do të fokusohen në drejtim të zhvillimit ekonomik dhe integrimeve evropiane.
Sekretari portugez në Ministrinë e Mbrojtjes, Manuel Lobo Antunes Petros, në emër të delegacionit portugez, ka falënderuar Kryeministrin Kosumi për takimin e frytshëm dhe njoftimet lidhur me situatën në Kosovë, duke siguruar gjithashtu se Portugalia, si aktor aktiv në marrëdhëniet ndërkombëtare, është e gatshme të jap kontributin e saj për paqe, stabilitet dhe për ndërtimin e vlerave evropiane në Kosovë, thuhet në një komunikatë nga ky takim.